Founga ke Fakatomala Moʻoní
Fai ʻe ʻEletā D. Todd Christofferson
ʻO e Kōlomu ʻo e Kau ʻAposetolo ʻe Toko Hongofulu Mā Uá
Toʻo mei ha lea naʻe fakahoko ʻi he konifelenisi lahi ʻo ʻOkatopa 2011.
Tā fakatātaʻi ʻo e taá ʻe David Winters
Ko e fakatomala ko ha kaveinga ia ʻoku lahi, ka ʻoku ou fie lea ki ha tafaʻaki pē ʻe nima ʻo e tefitoʻi moʻoni ko ʻeni ʻo e ongoongoleleí pea ʻoku ou ʻamanaki ʻe ʻaonga.
ʻUluakí, ko e fakaafe ke fakatomalá ko e fakahaaʻi ia ʻo e ʻofa. ʻI he taimi naʻe “kamata malanga ai ʻa [e Fakamoʻuí] ʻo pehē, Mou fakatomala: he ʻoku ofi ʻa e puleʻanga ʻo e langí” (Mātiu 4:17), ko ha pōpoaki ia ʻo e ʻofa, ʻoku fakaafeʻi ai ʻa e kakai kotoa pē ʻoku fie tāú ke kau fakataha mo Ia “pea fiefia ʻi he ngaahi folofola ʻo e moʻui taʻengata ʻi he māmani ko ʻení, mo e moʻui taʻengatá [ʻiate ia] ʻi he maama ka hoko maí” (Mōsese 6:59). Kapau he ʻikai ke tau fakaafeʻi ʻa e kakai kehé ke nau liliu pe ʻikai ke tau fakatomala kitautolu, ʻoku ʻikai leva ke fakahoko e tefitoʻi fatongia ʻoku totonu ke tau fai ki he niʻihi kehé mo kitautolú foki.
Uá, ʻoku ʻuhinga ʻa e fakatomalá ko e fāifeinga ke liliu. ʻE hoko ia ko e manuki ki he mamahi ʻa e Fakamoʻuí ʻi he Ngoue ʻo Ketisemaní pea ʻi he kolosí ke tau ʻamanaki ʻoku totonu ke Ne liliu kitautolu ke tau hoko ʻo hangē ha kau ʻāngeló taʻe te tau fai ʻe kitautolu ha ngāue. ʻOku tau fekumi ki Heʻene ʻaloʻofá ke fakahikihikiʻi mo fakapaleʻi ʻetau ngaahi ngāue faivelenga tahá (vakai ki he 2 Nīfai 25:23). Mahalo naʻa fiemaʻu ʻe he fakatomala mo e liliu moʻoní ha toutou feinga pe ngāue ki ai ka ʻoku ʻi ai ʻa e meʻa ʻoku maʻa mo māʻoniʻoni ʻi he faʻahinga feinga pehení.
Tolú, ʻoku ʻikai ʻuhinga e fakatomalá ki hono siʻaki pē ʻo e angahalá ka ko e tukupā ke talangofua. ʻOku fakamatalaʻi ʻe he Bible Dictionary ʻo pehē, “ʻOku ʻuhinga ʻa e fakatomalá ki hono fakatafoki ʻo e lotó mo e fakakaukaú ki he ʻOtuá, [pehē foki ki hano] liʻaki ʻo e angahala ʻoku fakanatula ʻetau fakahehema ke fakahokó.” (“Fakatomala”). Ke tau tafoki kakato ki he ʻEikí, kuo pau ke ʻoua naʻa toe siʻi hifo ia ʻi he fuakava ke talangofua kiate Iá.
Faá, “ʻOku fie maʻu ki he fakatomalá ʻa e fakamātoato ʻo e taumuʻá mo e loto fiemālie ke vilitakí, neongo ʻa e mamahí. Mahalo ʻe ʻaonga ki ha niʻihi ʻa e feinga ke faʻu ha lisi ʻo ha ngaahi sitepu pau ʻo e fakatomalá, ka ʻe hoko pē ia ko ha ngāue pē ke fai ʻo ʻikai ha ongoʻi moʻoni pe ha liliú. ʻOku ʻikai fakangalingali ʻa e fakatomalá. ʻOku ʻomi ʻe he ʻEikí ha fie maʻu ʻe ua, “Te mou ʻilo ʻi he meʻá ni ʻo kapau ʻoku fakatomala ha tangata mei heʻene ngaahi angahalá—vakai, te ne vete ia pea liʻaki ia” (T&F 58:43).
Nimá, neongo pe ko e hā ʻa e totongi ki he fakatomalá, ʻoku folo hifo ia ʻe he fiefia ʻo e fakamolemolé.
ʻOku ou fakahā ʻeku loto houngaʻia mo e fakamoʻoni ʻoku hanga ʻe he mamahi, pekia mo e Toetuʻʻu hotau ʻEikí ʻo “fakahoko ʻa e tuʻunga ʻo e fakatomalá” (Hilamani 14:18). Ko e meʻaʻofa fakalangi ʻo e fakatomalá ʻa e kī ki he fiefia ʻi hení mo e maama kahaʻú. ʻI he folofola ʻa e Fakamoʻuí pea ʻi he loto fakatōkilalo moʻoni, ʻoku ou fakaafeʻi ʻa e kakai kotoa pē ke “mou fakatomala: he ʻoku ofi ʻa e puleʻanga ʻo e langí” (Mātiu 4:17). ʻOku ou ʻiloʻi ko hoʻomou tali ko ia ʻa e fakaafé ni, te mou maʻu ai ʻa e fiefiá ʻi he taimí ni pea ʻi he taʻengatá fakatouʻosi.