Ko e Temipalé mo e Fokotuʻutuʻu Totonu ʻo e Nofo-malí
Ko e fakamatala hono ua eni naʻe fai ʻe ʻEletā Heifeni ʻa ia ʻe tokoni ki hono fakamanatua ʻo e taʻu ʻe 20 ʻo e “Ko e Fāmilí: Ko ha Fanongonongo ki Māmaní.” Naʻe paaki atu ʻa e ʻuluaki fakamatalá ʻi he makasini Liahona ʻo ʻAokosi 2015.
Mei ha lea, “Nofo-malí, Lao ki he Fāmilí, mo e Temipalé,” ne fakahoko ʻi he Faeasaiti Fakataʻu ʻa e J. Reuben Clark Law Society ʻi Sō Leiki Siti ʻi he ʻaho 31 ʻo Sānuali, 2014.
Ko e temipalé ko e haʻi ia ʻokú ne fakatahaʻi e langí mo māmani.
Toʻohemá: faitaaʻi ʻe Gustavo Hartel; toʻomataʻú: ʻata ʻo e Vaitafe Kolomupiá Temipale Uasingatoní ne faitaaʻi ʻe Russ May
ʻI he taimi ʻoku tau puputuʻu ai ʻi ha anga fakafonua fekauʻaki mo e ʻuhinga ʻo e nofo-malí, ʻoku tau faʻa foʻi mo holomui vave. Ka ʻoku kei ʻi ai pē ʻa e ʻamanaki lelei. ʻOku lava ʻe he sīpinga taʻengata ʻo e temipalé ʻo tokoniʻi kitautolu ke tau ikunaʻi ʻa e ngaahi moveuveu ʻo e ʻahó ní.
ʻI he taimi kotoa pē ʻoku tau ʻalu ai ki he temipalé, ʻoku toe fakamanatu mai ʻe he ngaahi ouaú ʻa e fokotuʻutuʻu totonu ʻo e ʻuniveesí, ʻo kau ai ʻa e fokotuʻutuʻu totonu ki he nofo-malí. Hangē ko e kau kaivai ʻo onoʻahó, ʻoku tau siofia e langí ke fai mei ai ʻetau tūkufuá—pea ʻoku tau fai ia ʻi he temipalé. Ne hiki ʻe he tangata poto Māmonga ko Hiu Nipilī ʻo pehē:
ʻOku langa ʻa e temipalé ke fakafofongaʻi ʻa e ngaahi tefitoʻi moʻoni ʻi hono fokotuʻutuʻu ʻo e ʻunivēsí. Ko e ʻapiako ia ʻoku ako ai ʻa e tangata fakamatelié ki he ngaahi meʻá ni. …
“… Ko e temipale ʻi māmaní [ʻoku] ʻi he lotolotonga ia ʻo e meʻa kotoa pē, … ʻo takatakai ʻi he ngaahi ngāue fakalangi kotoa pē, ko e haʻi ʻokú ne fakatahaʻi e langí mo māmaní.”1
Ko ia, ʻoku maʻu ai ʻe he temipalé ʻa e mālohi ke tohitongi ʻi hotau lotó e ngaahi fono totonu ʻa e ʻOtuá ki he nofo-malí mo e moʻui fakafāmilí.
Ko e Nofo-mali ʻa ʻĀtama mo ʻIví
ʻOku tau ako ki he akonaki fakatemipale ko ia fekauʻaki mo e malí ʻi he talanoa ʻo ʻĀtama mo ʻIví—ko e talanoa faʻunga ia ʻo e temipalé: Ne fehuʻi mai ʻe hoku kaungāmeʻa, “Kapau ko Kalaisi ko e uho ia ʻo e ongoongoleleí mo e temipalé, ko e hā hono ʻuhinga ʻoku ʻikai akoʻi ai e talanoa ki he moʻui ʻa Kalaisí ʻi he ʻenitaumēniti fakatemipalé? Ko e hā e meʻa ko ʻeni fekauʻaki mo ʻĀtama mo ʻIví?”
Kuó u ongoʻi ko e moʻui ʻa Kalaisí ko e talanoa ia ʻo hono foaki ʻa e Fakaleleí. Ko e talanoa ʻo ʻĀtama mo ʻIví ko e talanoa ia ʻo hono maʻu ʻo e Fakaleleí, neongo e ngaahi fakafepaki mālohi ʻo e moʻui matelié.
Ko ʻĀtama mo ʻIvi ʻa e fuofua kakai ke maʻu ʻa e Fakalelei ʻa Sīsū Kalaisí. Ko kinaua foki ʻa e fuofua ongo mātuʻa ke aʻusia e ʻofa ʻo ka fanauʻi ha pēpē foʻou, ngaahi feilaulau lahi ʻoku fai ʻi hono ohi hake e fānaú, mo e mamahi ʻo e mamata ki he fānaú ʻoku nau ngāueʻaki taʻefakapotopoto ʻenau tauʻatāina ke filí.
ʻOku ʻomai ʻe he tamai ko Līhaí ʻa e talanoa fakatokāteline ke mahino ai ʻa ʻenau aʻusiá—mo kitautolu. ʻOkú ne talamai kapau naʻe ʻikai ke kai ʻa ʻĀtama mo ʻIvi mei he fua ʻo e ʻakau ʻo e ʻiló, kuó na mei “nofo [ai pē] ʻi he ngoue ko ʻĪtení. …
“Pea kuo ʻikai te na maʻu ha fānau; ko ia, te na nofo ai ʻi ha anga-taʻehalaia, ʻo ʻikai maʻu ha fiefia, he naʻe ʻikai te na ʻiloʻi ha mamahi; ʻo ʻikai fai ha lelei, he naʻe ʻikai te na ʻiloʻi ha angahala. …
“Naʻe hinga ʻa ʻĀtamá koeʻuhi ke ʻi ai ʻa e faʻahinga ʻo e tangatá; pea ʻoku ʻi ai ʻa e faʻahinga ʻo e tangatá koeʻuhi ke nau maʻu ʻa e fiefiá” (2 Nīfai 2:22–23, 25).
Meʻapango pē ka ʻoku tokoni ʻa e angahalá, faingatāʻiá, mo e fānaú ke ako ai e ʻuhinga ʻo e fiefiá—ko ha founga ne malava ʻi he Fakalelei ʻa Sīsū Kalaisí.
Koeʻuhí ko e Fakaleleí, ʻoku tau lava ai ʻo ako mei heʻetau ngaahi aʻusiá kae ʻikai ke ne fakahalaiaʻi ai kitautolu. Pea ʻi hono maʻu e Fakaleleí, ʻo hangē ko ia ne aʻusia ʻe ʻĀtama mo ʻIví, ʻoku ʻikai ko ha tokāteline pē ia fekauʻaki mo hono tāmateʻi ʻo e ngaahi fehālaakí; ko e tefitoʻi tokāteline ia ʻokú ne fakaʻatā ʻa e fakalakalaka fakaetangatá. Ko ia, naʻe ʻikai ke hanga ʻe he feilaulau ʻa Kalaisí ʻo fakafoki pē kinaua ki ha ʻIteni ʻo e tonuhiá. Ne mei hoko ia ko ha talanoa taʻeʻuhinga pea ʻikai ha tupulaki fakaeʻulungaanga. Ka ne na mavahe mei he ngoué ʻo fepīkitai kiate kinaua pea laka kimuʻa, fakataha, ki he māmani ʻoku tau nofo ai he taimí ní.
Ko e tefitoʻi talanoa ko ia ʻi he temipalé, ko ha talanoa mahino ia ʻo ha ongo meʻa mali ʻokú na fetokoniʻaki ke fehangahangai mo e faingataʻa hokohoko ʻo e matelié. He ko e fepaki pē mo e ngaahi faingataʻá, te na lava ai ʻo ako ke ʻiloʻi ʻa e fiefia moʻoní.
Tuku muʻa ke tau fakakaukau ki ha meʻa ʻe ua fekauʻaki mo ʻetau mahino ki he nofo-malí mei he talanoa ʻo ʻĀtama mo ʻIví ʻUluakí ko e vakai ʻa e Ongoongolelei Kuo Toe Fakafoki Maí ki he lelei ʻo e Hingá. ʻOku tau ʻilo naʻe fili fakapotopoto ʻa ʻĀtama mo ʻIvi ʻi he ngoué koeʻuhí he ko e matelié pē ʻe lava ai ʻo maʻu e ngaahi aʻusia ne fie maʻu ke fakakakato ʻaki e palani ʻa e ʻOtuá maʻanauá—mo kitautolu. Fepaki ia mo e tui faka-Kalisitiané he ʻoku nau akoʻi ko e fili ʻa ʻIví ko ha fehālaaki fakamamahi moʻoni, ʻo tō ai e houhau ʻo e ʻOtuá ki he faʻahinga kotoa ʻo e tangatá. ʻOku kei akoʻi ia ʻe ha ngaahi siasi faka-Kalisitiane koeʻuhí ko e kakai fefiné ko ha ngaahi ʻōfefine kinautolu ʻo ʻIvi vale, ko ia ʻoku totonu ai ke fakaongoongo ʻa e ngaahi uaifí ki honau husepānití.
ʻOku fepaki mālohi e fakakaukau ko ʻení mo e lau ʻa ha kakai tokolahi he ʻahó ni ʻoku totonu ke tauʻatāina ʻa e uaifí mei hono husepānití. Pea ke hōhoatatau, te nau tānaki mai, ʻoku totonu pē ke toe tauʻatāina mo e husepānití mei hono uaifí. Ka ʻi he taimi ʻoku fakatou tauʻatāina ai ʻa e ongo meʻa malí, ʻokú na tali leva ʻa e “tukupā taʻehaʻisia,” ko ia ʻo e kuongá ní, pea ʻoku takitaha maʻana leva ʻena nofo malí ʻi he taimi ʻoku ngata ai ʻa e fiefiá—pe ʻi he taimi ʻoku kamata ai ʻa e faingataʻá.
Ko fē ʻoku tonú? ko e fakafalalá pe tauʻatāiná? Hala ha taha ʻe tonu. ʻOku akoʻi ʻe he ongoongolelei kuo toe fakafoki maí—ʻikai hangē ko e toenga ʻo e ngaahi Tui faka-Kalisitiané—naʻe ʻikai ko ha fehālaaki pe tupukoso pē ʻa e fili ko ia ʻa ʻIvi mo ʻĀtama ʻi he ngoué; ka, ko ha konga nāunauʻia mo ʻosi kotofa pē ia ʻo e palani ʻo e fakamoʻuí. Ko ia ʻoku pehē ai ʻe he Ongoongolelei Kuo Toe Fakafoki Maí ko ʻIvi—mo e kakai fefine kotoa pē—ko ha kakai fakaʻeiʻeiki kinautolu ʻoku nau tuʻunga tatau kakato mo e kakai tangatá.
Ko ia, ʻoku ʻikai fakafalala ʻa ʻIvi ia kia ʻĀtama; pe tauʻatāina meiate ia. Ka ko ʻIvi mo ʻĀtamá ʻokú na fefalalaʻaki. Ko ha ongo “kaungā-ngāue tuʻunga tatau” ʻokú na fetokoniʻaki ʻi he meʻa kotoa pē ʻokú na faí.2
Ko e Haʻu mo ha Loto Mafesifesi ki he ʻŌlitá
Adam and Eve Kneeling at an Altar, fai ʻe Del Parson; tā fakatātaaʻi ʻe Jerry L. Garns
Uá, ʻi he taimi naʻe mavahe ai ʻa ʻIvi mo ʻĀtama mei he ngoué, naʻe fekau ʻe he ʻEikí ke na langa ha ʻesifeilaulau pea ke na feilaulauʻi ha monumanu. Hili ha ngaahi ʻaho lahi ne fehuʻi ʻe ha ʻāngelo kia ʻĀtama pe ko e hā e ʻuhinga ʻokú ne fai ai ʻa e feilaulaú. Naʻá ne tali ʻo pehē, “ʻOku ʻikai te u ʻilo, tuku kehe pē hono fekau ʻe he ʻEikí kiate au.” Pea toki lea ange leva ʻa e ʻāngeló, ʻo pehē: “Ko hono tatau ʻeni ʻo e feilaulau ʻo e ʻAlo pē Taha naʻe Fakatupu ʻo e Tamaí” (Mōsese 5:6–7).
Ko ia, ko e monumanu ko ia naʻe feilaulauʻi ʻe ʻĀtama mo ʻIví ko e fakataipe ʻo e feilaulauʻi he kahaʻú ʻe he Tamaí hono ʻAló. Naʻe akoʻi leva ʻe he ʻāngeló kiate kinaua ʻe hanga ʻe he feilaulau ʻa Kalaisí mo e palani ʻo e huhuʻí ʻo ʻoange kiate kinaua ha ʻuhinga mo e taumuʻa ki he ngaahi meʻa kotoa pē te na fehangahangai mo iá—ʻio, ki he kotoa ʻo ʻenau aʻusia fakamatelié.
ʻOku ō hatau niʻihi ki he temipalé ʻi he founga naʻe ʻohake ai ʻe ʻĀtama mo ʻIvi ʻena ngaahi feilaulaú—koeʻuhí pē naʻe fekauʻi kitautolu ki ai, taʻe te tau ʻilo hono ʻuhingá. Ko e talangofuá ʻoku mātuʻaki lelei ange ia ʻi he ʻikai fakahoko ʻa e ngaahi ouaú. Ka ʻoku pau pē ne fie maʻu ʻe he ʻEikí, ʻa ē naʻá Ne fekau mai ʻa e ʻāngeló, ke na ʻilo hono ʻuhingá—pea ʻoku ou tui ʻokú Ne fie maʻu kitautolu ke tau ʻilo hono ʻuhingá.
ʻOku hoko nai ʻa e ngaahi ouau ʻo e temipalé he ʻahó ní ko “ha fakataipe … ʻo e ʻAlo pē Taha naʻe Fakatupú”? Fakakaukau ki he ngaahi ʻōlita ʻo e temipalé, ʻo hangē ko e ʻōlita ʻa ʻĀtama mo ʻIví, ko e ʻōlita ʻo e lotu, feilaulau, mo e ngaahi fuakava. Fakakaukau ki he huʻunga ʻo e ngaahi feilaulaú ʻi he ngaahi fuakava kotoa ʻo e ʻenitaumení.
Talu mei he taimi naʻe fakakakato ai ʻe Kalaisi Hono misiona ʻo e fakaleleí, ʻoku ʻikai ke tau toe fai ai ʻa e feilaulau monumanú, ka ʻoku tau fuakava ke tau feilaulau. ʻO founga fēfē? Ne akoʻi ʻe Kalaisi ʻa e kau Nīfaí, “Pea te mou ʻoatu kiate au ʻa e feilaulau ko e loto-mafesifesi mo e laumālie fakatomala.” (3 Nīfai 9:20; vakai foki ki he 2 Nīfai 2:7).
ʻOku fakataipe ʻe he feilaulau monumanú hono feilaulauʻi ʻe he Tamaí ʻa e ʻAló, ka ko e feilaulau ʻo e loto mafesifesi mo e laumālie fakatomalá ʻokú ne fakataipe ʻe ia hono feilaulauʻi pē ʻe he ʻAló ʻEne moʻuí. Naʻe tohi ʻe ʻEletā Sēmisi E. Talamesi (1862–1933) ʻo e Kōlomu ʻo e Kau ʻAposetolo ʻe Toko Hongofulu Mā Uá naʻe “pekia ʻa Sīsū ʻi he loto mafesifesi”3 ʻOku tau ʻohake ai kitautolu ko ha fakataipe—hotau loto mafesifesí—ʻo hangē ha feilaulau fakatāutahá.4 Hangē ko e pehē ʻe ʻEletā Niila A. Mekisuele (1926–2004) ʻo e Kōlomu ʻo e Kau ʻAposetolo ʻe Toko Hongofulu Mā Uá, “Ko e feilaulau moʻoni mo fakatāutahá ʻoku ʻikai ko hono hili ia ʻo e monumanú ki he funga ʻōlitá. Ka ko ha loto fiemālie ke hilifaki e angakovi ʻiate kitautolú ki he ʻesi feilaulaú pea tuku ke fakamaʻa ia ʻe he afí!5
Lolotonga ʻeku hoko ko e palesiteni ʻo e Temipale Seni Siaosi ʻIutaá, ne ʻamanaki ke u silaʻi ha ongo mātuʻa kei talavou. ʻI heʻeku fakaafeʻi kinaua ki he ʻōlitá pea puke ʻe he tangata malí e nima hono ʻofaʻangá, ne u fakatokangaʻi te na tuku ki he ʻōlita ʻo e fielaulaú ʻena loto mafesifesí mo e laumālie fakatomalá—ko hano ʻohake taʻesiokita ʻo kinaua ki he ʻOtuá ʻi he fakataipe ʻo e feilaulau ʻa Kalaisi maʻanauá. Pea ko e hā hono taumuʻá? Ke na feilaulau ʻi he toenga ʻena moʻuí—ʻa ia, ko e feinga ke moʻui ʻo hangē ko ia naʻá Ne faí—ka na lava ʻo hangē ko Iá.
ʻI heʻena moʻuiʻaki ia he ʻaho kotoá, te na fakatou ofi ange ai ki he ʻOtuá, ʻa ia te ne ngaohi ai kinaua ke na toe vāofi ange. Ko ia, ko hono moʻuiʻaki e ngaahi fuakava ʻo e ouau silá te ne fakamāʻoniʻoniʻi kinaua, ʻo ʻikai ngata pē ʻi heʻena nofo-malí ka ko hona lotó foki mo ʻena moʻuí.
ʻOku mālohi mo faikehekehe lahi ʻaupito ʻa e mahino ko ʻeni ki he nofo-malí mei he anga e vakai he ʻahó ni ki he nofo-malí. ʻI he talanoa fakatātā ʻa Sīsū ki he tauhi sipi leleí, naʻá Ne fakamatalaʻi ai ha unga ngāue—ko ha taha ʻoku totongi ke ne tokangaʻi a e fanga sipí. ʻI he taimi ʻoku haʻu ai ʻa e ulofí, naʻá Ne pehē, ʻoku hanga ʻe he unga ngāué ʻo “siʻaki ʻa e sipí, kae hola ia.” Ko e hā ʻoku hola ai ʻa e unga ngāué? Koeʻuhí ʻoku ʻikai ko haʻane sipi ia ʻaʻana. ʻI he tafaʻaki ʻe tahá, naʻe folofola ʻa Sīsū ʻo pehē, “Ko au ko e tauhi leleí. … ʻOku ou tukuhifo ʻeku moʻuí koeʻuhí ko e fanga sipí.” (Vakai ki he Sione 10:11–15.)
ʻOku fakakaukau e tokolahi he ngaahi ʻahó ni ki he nofo-malí ko ha fokotuʻutuʻu noaʻia pē ʻo ha ongo unga ngāue. ʻI he taimi pē ʻoku fakamanavaheeʻi ai e unga ngāué ʻe he ulofi ʻo e faingataʻá, ʻokú na feholaki leva. Ko e hā ka tukuange ange ʻe ha unga ngāué ʻene moʻuí mo ʻene fiemālié pe fiefiá?
Ka ʻi heʻetau ʻohake ʻa e loto mafesifesí mo e laumālie fakatomalá ʻi heʻetau nofo-malí ko ha fakataipe ʻo e Tauhi Sipi Leleí, ʻoku tau palōmesi ke liʻaki ai ʻetau moʻuí koeʻuhí ko e fanga sipi ʻo ʻetau fuakavá, ʻi ha ʻaho pea naʻa mo ha houa ʻi he taimi ko iá. ʻOku fakaafeʻi kitautolu ʻe he founga ko ʻení ke tau fuesia taʻesiokita ʻa e ngaahi mamahí mo e fiefia hotau malí mo e fānaú fakatouʻosi, ʻo fakataipe ai ʻi ha kiʻi founga siʻi hono fuesia ʻe he Fakamoʻuí hotau ngaahi mamahí.
Naʻe folofola ʻa e ʻEikí kia Pita Uitemā fekauʻaki mo hono hoa faifekau ko ʻŌliva Kautelé, “Ke ke mamahi mo ia ʻi hono ngaahi mamahi kotoa pē” (T&F 30:6). Ne toe fakaongo mai ʻe ʻĪsaia ʻa e kupuʻi lea ko iá ʻi hono fakamatalaʻi ʻo Kalaisi mo kinautolu te Ne huhuʻí: “ʻI heʻenau ngaahi mamahi kotoa pē naʻe mamahi ia, … pea naʻá ne … fua ʻa kinautolu ʻi he ngaahi ʻaho kotoa pē ʻi muʻá” (ʻIsaia 63:9; vakai foki ki he T&F 133:53).
Ne tala mai kiate au ʻe ha tokotaha ngāue temipale ne mālōlō hono uaifí hili ʻene moʻua fuoloa ʻi ha fokoutua, “Ne u pehē ʻe au ne u ʻilo ko e hā ʻa e ʻofa—ne tāpuekina kimaua ʻaki haʻama nofo fakataha ʻi he taʻu ʻe 50 tupu. Kae tālunga mo ʻeku tauhi ia ʻi he tātāiku ʻene moʻuí, ke u toki ʻilo ai ʻa e meʻa moʻoni ko ia ko e ʻofa.”
ʻI heʻene vahevahe mai e faingataʻaʻia hono uaifí, ne maʻu ʻe he tangata ko ʻení ha vai mapunopuna ʻo e manavaʻofá ʻi hono lotó ne ʻikai mei ʻilo ia ʻe ha unga ngāue. ʻOku hanga ʻe he tātānaki ʻo ha ʻilo pehē ʻo fakatupu ha founga māʻoniʻoni ʻo e hoko ʻo hangē ko e Tauhi Sipi Leleí—ʻaki e moʻui mo foaki ʻo hangē ko ia naʻā Ne faí. ʻOku hanga ʻe he tōʻonga moʻui ko iá ʻo ʻomi ha ivi fakangalongataʻa ki he fie maʻu fakasōsiale ʻo ʻetau anga fakafonuá.
Ko e Nofo-Malí mo e Fiefia Totonú
Ne ʻeke mai ʻe haku maheni kiate au, “ʻOku tau ofi fēfē ki he haohaoá ka tau toki lava ʻo maʻu e ngaahi talaʻofa fungani ʻo e sila ʻi he temipalé?” ʻOku feʻilongaki lelei ʻaupito ʻa e ngaahi husepānití mo e ngaahi uaifí, tautautefito kiate kinautolu ʻoku nau kumia ha ngaahi tāpuaki taʻengatá, ʻa ia ʻoku nau faʻa fifili he ngaahi ʻaho ʻe niʻihi pe ʻoku nau ofi feʻunga koā ki he haohaoá—pe ko honau ngaahi malí.
ʻOku ou saiʻia ʻi he tali ʻoku hā ʻi he lea tuku ʻa Molonaí: “Pea kapau te mou fakafisi ʻa kimoutolu mei he anga taʻe-māʻoniʻoni kotoa pē, pea ʻofa ki he ʻOtuá ʻaki homou iví, ʻatamaí, mo e mālohí kotoa pē, pea ʻe toki feʻunga ʻa ʻene ʻaloʻofá kiate kimoutolu, koeʻuhi ke … mou haohaoa ʻia Kalaisí” (Molonai 10:32; tānaki atu ʻa e fakamamafá). Ko e founga ʻe taha ke taʻofi ai kitautolu mei he anga taʻe-māʻoniʻoní ko e ofi ki he temipalé he ʻoku [fakahā] ʻi hono ngaahi ouaú “ʻa e mālohi ʻo e anga faka-ʻOtuá” (T&F 84:20; tānaki mai ʻa e fakamamafá). Ko ʻetau ʻofa ko ia ki he “ʻOtuá ʻaki e kotoa [hotau] iví” ʻoku ʻuhinga ia ko e ʻofa ʻosikiavelenga ki he ngataʻanga hotau ivi malava fakatāutahá, kae ʻikai ko e ngataʻanga taʻemalava ʻo ha fua taukakapa ʻo e haohaoá.
ʻI heʻetau fakafisingaʻi ʻa e anga taʻemāʻoniʻoni kotoa pē kae ʻofa ki he ʻOtuá ʻaki ʻetau moʻuí kotoa, ʻe fai ʻe he ʻaloʻofa haohaoa ʻa Kalaisí hotau fakakakató. Ne fokotuʻu mai ʻe ha tohi mei he Kau Palesitenisī ʻUluakí ʻi he 1902 ʻa e tuʻunga ʻe ʻi ai ʻo ka fakatahaʻi ʻa e feilaulau kakato ʻa Kalaisí mo ʻetau feilaulau kakato ʻatautolú: “ʻI he hili hono aʻusia e tuʻunga fakahaohaoa ʻo e moʻuí ʻe ʻikai ha toe holi kehe ʻa e kakaí ka ko e moʻuiʻaki pē e anga māʻoniʻoní, ʻo kau ai meʻa ʻokú ne fakauouongatahaʻi kinautolu ko e husepāniti mo e uaifi. … ʻOku fie maʻu ʻa kinautolu ko ia te nau aʻusia ʻa e ʻuluaki toetuʻú pe toetuʻu fakasilesitialé, ke nau maʻa mo māʻoniʻoni, pea ke nau sino haohaoa foki. … Ko e tangata mo e fefine kotoa pē te nau aʻusia ʻa e tuʻunga taʻemahakulea ko ʻeni ʻo e moʻuí, te nau fakaʻofoʻofa ʻo hangē ko e kau ʻāngelo ʻoku nau ʻākilotoa e ʻafioʻanga ʻo e ʻOtuá; … he ko e ngaahi vaivaiʻanga ko ia ʻo e kakanó ʻe ikunaʻi pea fakangaloki ia; pea te na fenāpasi fakatouʻosi mo e fono naʻa ne fakatahaʻi kinauá”6
Ne u maheni mo ha fefine ne mali ʻi he temipalé ʻi he taʻu ʻe 50 kuohilí. Hili ʻena maʻu hā fānau tokolahi mo hono husepānití, ne iku ke na vete pea tupu ʻi he anga fakamālohi hono husepānití naʻe tuʻusi ai ia mei he Siasí. Naʻe mavahe leva ʻa e fefiné mei he Siasí ʻo ne fili ha hala mohu faingataʻa. Hili ha ngaahi taimi, ne mālōlō hono husepānití. Ne u feʻiloaki mo ia ʻi hano ʻomi ia ʻe hano ʻōfefine ki hoku ʻōfisí ke vakai pe ʻe toe lava koā ʻene faʻeé ʻo foki ki he temipalé.
Hili haʻamau talanoa lelei fekauʻaki mo e founga ko ia ke tau ako ai mei heʻetau ngaahi aʻusiá ʻo ʻikai ke fakahalaiaʻi ai kitautolú, ne mau talanoa ki he founga ʻo e fakatomalá, toe papitaiso fakafokí, mo hono toe fakafoki ʻo e ngaahi tāpuaki fakatemipalé. Ne u talaange leva ki ai ʻe toe fakafoki mai ʻe he ngaahi ouau fakafokí ʻene sila ʻi he temipalé. Naʻá ne mateuteu nai ki ai?
Naʻe fuofua lea mai ʻa e ʻōfefiné. Naʻá ne pehē mai, “ʻOku ou fokoutua ʻi he ʻāvanga femaleleakí (bipolar).” “ʻOku ʻāvanga femaleleaki mo hoku fohá. ʻOku mau ʻilo lahi ange ki he fokoutua ko iá mei he meʻa ne mau angamaheni ki aí, pea ʻoku mau folo foʻiʻakau ke tokoni. ʻI heʻeku sio atu ki muí, ʻoku ou tui naʻe fokoutua mo ʻeku tamaí ʻi he ʻāvanga femaleleakí, pea mahalo naʻe fakatupunga ai e ngaahi faingataʻa lahi ʻi he moʻui homau fāmilí. ʻOku ʻikai ke u fakamaauʻi ia he taimí ni.”
Ne tali leʻo vaivai mai ʻe he faʻeé, “Kapau pē te u toe foki ki he temipalé ha ʻaho, te u mateuteu ke toe fakafoki mai ʻeku silá.”
ʻI heʻeku vakai atu ki heʻenau lue atu ʻi he holó, ne u fakatokangaʻi ʻa e hoko e temipalé mo e mālohi fai fakamaʻu ʻa ʻIlaisiaá ko ha maʻuʻanga tokoni ʻo e fefakaleleiʻakí, ʻo ʻikai liliu pē ʻa e loto ʻo e fānaú mo e mātuʻá kae liliu foki ai mo e loto ʻo e ngaahi uaifí mo e husepānití ʻiate kinaua. Naʻá ku toki maʻu ha ongoongo kuo toe papitaiso fakafoki ʻa e faʻeé.
ʻOku ou fakamoʻoni ʻoku mahuʻinga fau e fokotuʻutuʻu totonu ko ia ʻo e nofo-malí ne ʻoange ʻe he ʻOtuá kia ʻĀtama mo ʻIví ke tau feinga ki ai—ke ʻiloʻi, ke langa ai, pea paotoloaki ia ʻi heʻetau moʻuí. ʻOku ou fakamoʻoni foki ko e ngaahi husepānití mo e ngaahi uaifi ko ia ʻoku nau feinga ke moʻui hangē ko e Tauhi Sipi Leleí te nau ʻilo, mo fefoakiʻaki, ha moʻui mahutafea mo fonu fiefia.