ʻI he pō ko ia kimuʻa pea kalusefai ʻa Sīsuú, naʻá Ne fekau ki he toko ua ʻo ʻEne kau ākongá ke teuteu ha maʻu meʻatokoni efiafi. Peá Ne toki fakaafeʻi leva ʻEne kau ʻAposetoló ke nau haʻu. ʻI he maʻu meʻatokoni ko iá, ne ui ko e ʻOhomohe Fakaʻosí, naʻe foaki ange ai ʻe Sīsū ki Heʻene kau ākongá ha founga makehe ke nau manatu maʻu ai pē kiate Ia. ʻOku tau lava ʻo lau ia ʻi he Fuakava Foʻoú:
“Pea toʻo ʻe ia [Sīsū] ʻa e maá, ʻo ne fakafetaʻi, ʻo pakipaki ia, ʻo ne ʻatu kiate kinautolu, ʻo pehē, Ko hoku sinó ʻeni, ʻa ia kuo foaki koeʻuhí ko kimoutolu; fai ʻeni ʻi he fakamanatu kiate au.
Naʻe toʻo foki ʻe ia ʻa e ipú ʻo pehē, Ko e ipú ni ko e fuakava foʻou ʻi hoku totó, ʻa ia ʻoku lilingi koeʻuhí ko kimoutolu” (Luke 22:19–20).
ʻI heʻetau kai mo inu ʻa e sākalamenití, ʻoku tau fai ʻa e meʻa tatau ko ia naʻe fakahoko ʻe he kau ʻAposetoló ʻi he ʻOhomohe Fakaʻosí. ʻOku fakamanatu mai ʻe he maá kiate kitautolu ʻa e sino ʻo Kalaisí mo e founga ʻo ʻEne mamahi fakaesino koeʻuhí ko kitautolu. ʻOku fakamanatu mai ʻe he vaí kiate kitautolu Hono taʻataʻá ʻa ia naʻe lilingi koeʻuhí ko kitautolu.
ʻOku toe fakamanatu mai foki ʻe he lotu ʻo e sākalamenití kiate kitautolu ʻa e ngaahi talaʻofa ʻoku tau aʻusia ʻi he taimi ʻoku tau papitaiso aí—ke tau manatuʻi maʻu ai pē ʻa Sīsū Kalaisi. ʻI he taimi te ke fakafanongo ai ki he lotu ʻo e sākalamenití, fakakaukau ki he ngaahi meʻa naʻá ke fakahoko ʻi he uike ko iá ke ke manatuʻi ʻa Sīsū. ʻE founga fēfē nai haʻo manatuʻi Ia ʻi he uike ka hoko maí?