Ngaahi ʻUlungaanga Fakalangi ʻo Sīsū Kalaisí: Mālohi mo Nāunauʻia

Ako ʻi he faʻa lotu ʻa e fakamatala ko ʻení pea feinga ke ʻiloʻi ʻa e meʻa ke vahevahé. Ko e hā ha founga ʻe hanga ai ʻe ha mahino kiate koe e ngaahi ʻulungaanga fakalangi ʻo e Fakamoʻuí, ʻo fakatupulaki hoʻo tui kiate Iá mo tāpuekina ai ʻa kinautolu ʻokú ke tokangaʻi ʻi he faiako ʻaʻahí? Ke maʻu ha fakamatala lahi ange ʻalu ki he reliefsociety.lds.org.

ʻĪmisi

Christ at the tomb of Lazarus. He has His hand extended to the entry of the tomb as He commands Lazarus to rise from the dead. Lazarus (in burial robes) is visible standing inside the entry to the tomb. A man is moving the stone door of the tomb away from the tomb entry. Several people (men and women) are watching the miracle in amazement.

Fakaikiikí mei he Fokotuʻu ʻe Sīsū ʻa Lāsalosi mei he Maté, fai ʻe Carl Heinrich Bloch

ʻOku akoʻi mai ʻe he folofolá naʻe maʻu ʻe Sīsū Kalaisi “ʻa e mālohi kotoa, ʻi he langí pea ʻi he māmaní fakatouʻosi, pea naʻe ʻiate ia ʻa e nāunau ʻo e Tamaí, he naʻá ne ʻafio ʻiate ia.” (T&F 93:17). Ne pehē ʻe ʻEletā M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá ne fakatupu ʻe he Fakamoʻuí ʻi he mālohi ko ʻení ʻa e ngaahi langí mo māmani, fakahoko e ngaahi maná, mo kātekina e faingataʻa ʻo Ketisemaní mo Kālevalé.¹ ʻI he mahino ʻeni kiate kitautolú, ʻe tupulaki ai ʻetau tui kia Kalaisí, pea te tau hoko ʻo mālohi ange.

ʻI heʻetau fakahoko mo tauhi e ngaahi fuakava ʻo e temipalé, ʻe faitāpuekina kitautolu ʻe he ʻEikí ʻaki Hono mālohí. Ne pehē ʻe Linitā K. Pātoni, ko e Palesiteni Lahi ʻo e Fineofá: “ʻOku hanga ʻe he tauhi fuakavá ʻo fakamālohia, fakaivia, mo maluʻi. … Ne u feʻiloaki kimuí ni mai mo haʻaku kaungāmeʻa mamae foʻou. Naʻá ne fakamoʻoni ʻi he hili ʻene maʻu hono ʻenitaumeni temipalé, naʻá ne ongoʻi ʻoku fakamālohia ia ʻaki ʻa e mālohi ke matuʻuaki e ngaahi ʻahiʻahí.”²

ʻOku fakamoʻoni ʻa Nīfai ki he mālohi ʻo e fuakavá: “Ko au, Nīfai, naʻá ku vakai ki he mālohi ʻo e Lami ʻa e ʻOtuá, pea naʻe tō ia … ki he kakai ʻo e fuakava ʻo e ʻEikí, … pea naʻe fakamahafu ʻa kinautolu ʻaki ʻa e māʻoniʻoní pea mo e mālohi ʻo e ʻOtua ʻi he fuʻu nāunau lahi.” (1 Nīfai 14:14).

Ngaahi Potufolofola Kehé

Selemaia 51:15; Fakahā 1:6; Sēkope 4:6–7; Mōsaia 3:17

Mei he Folofolá

ʻI he manavaʻofa ʻa Sīsū kia Māʻata mo Mele, naʻá Ne fokotuʻu ʻa hona tuongaʻane ko Lāsalosí mei he maté ʻaki ʻa e mālohi ʻo e ʻOtuá naʻá Ne maʻú.

Ne aʻu mai ʻa Sīsū ki he ʻapi ʻo Māʻata mo Melé hili ia ha ʻaho ʻe fā ʻo e ʻi he fonualotó ʻa Lāsalosí. Ne nau fononga atu ki he fonua loto ʻo Lāsalosí, pea fekau ʻe Sīsū ke toʻo ʻa e makakafú. Pea lea ʻa Sīsū kia Māʻata, “ʻIkai naʻá ku tala kiate koe, kapau te ke tui, te ke mamata ki he māfimafi ʻo e ʻOtuá?” Peá Ne toki lotu ki he ʻOtua ko e Tamaí pea “lea leʻo lahi ia, Lāsalosi, tuʻu mai.

“Pea naʻe tuʻu mai ʻa ia naʻe maté, kuo haʻihaʻi hono nimá mo e vaʻé ʻaki ʻa e kofu tanú.” (Vakai ki he Sione 11:1–45.) ʻOku fakaʻaongaʻi ʻe he Fakamoʻuí Hono mālohí ke huhuʻi mo fakaivia kitautolu. ʻE tupulaki ʻetau tui kiate Iá ʻi heʻetau manatuʻi ʻokú Ne fonu ʻi he mālohi mo nāunauʻiá.