Maʻá e Fānau Īkí
Ko ha Ongo Foʻou
ʻOku nofo e tokotaha ʻoku ʻaʻana e talanoá ʻi Sao Paulo, Palāsila.
“Fakahā mai ʻe he Laumālié maʻu ai pē ʻokú ne moʻui” (Tohi Hiva ʻa e Fānaú, 5).
Naʻe saiʻia ʻa Kepueli he ako fekauʻaki mo Sīsuú. Naʻá ne manako ke fanongo ki he ngaahi talanoa mei he folofolá. ʻOku lau maʻu pē ʻe hono fāmilí ʻa e folofolá he pō kotoa.
ʻI ha pō ʻuha ʻe taha ne nau mohe fakataha ai ʻi honau ʻapi māfaná. Naʻe fai ʻe he Tangataʻeikí ha lotu. Pea lau leva ʻe he Fineʻeikí ha ngaahi talanoa mei he Tohi ʻa Molomoná. Naʻe feinga ʻa Kepueli ke ne fanongo tokanga. Naʻe lau ʻa e Fineʻeikí ʻo kau ki he talanoa ʻa Sīsū ki he fānau iikí.
“Fineʻeiki, naʻe feohi ʻa e fānau iikí mo Sīsū?” Ko e fehuʻi ange ia ʻe Kepuelí.
“ʻOku tonu ia,” ko e talí mai ia. Pea naʻá Ne tāpuekina mo lotua ʻa kinautolu takitaha.
Naʻe ongoʻi ʻe Kepueli ha ongo foʻou ʻi hono lotó. Naʻe ʻikai te ne ʻilo pe ko e hā. Naʻá ne ongoʻi māfana neongo naʻe momoko ʻa tuʻa. Naʻá ne malimali taʻemotu.
Naʻe fie maʻu ʻe Kepueli ke ne vahevahe ʻa e ongo makehe ko ʻení. “ʻOku ou ongoʻi māfana mo fiefia!” ko ia atu ia. Naʻá ne ongoʻi fiefia ʻo hangē ka meimei tangí!
“Ko e ongo makehe ko iá ko e Laumālie Māʻoniʻoní ia,” ko ʻene Tangataʻeikí ange ia. “ʻOkú Ne ʻoatu ha ongo māfana ke tokoniʻi koe ke ke ʻilo ʻoku moʻoni ʻa e folofolá.”
Naʻe mamali pē ʻa e Fineʻeikí mo ne fāʻofua ange kia Kepueli. “ʻOku talaatu ʻe he ongo ko iá kiate koe ʻoku ʻofaʻi koe ʻe Sīsū.”
Naʻe pehē ange ʻa Kepueli, “ʻOku tāpuekina au ʻe Sīsū.” “Hangē tofu pē ko e fānau ʻi he Tohi ʻa Molomoná! Naʻá ne fekau mai ʻa e Laumālie Māʻoniʻoní kiate au!”
Naʻe ʻikai lava taʻofi ʻene mamalí. “ʻOku ou ʻilo ʻoku moʻoni ʻa e folofolá,” “Naʻe talamai ia ʻe he Laumālie Māʻoniʻoní!”