Kiʻi Sivi ʻo e Talanoa Fakafāmilí

Fai ʻe Carolyn Colton

Product Shot from September 2015 Liahona

Ko ha kiʻi keimi eni ke tokoni atu ke ke ako lahi ange ai ki ho fāmilí mo ʻenau ngaahi talanoá!

Teuteú

1. Fakakaukau ki ha faʻahinga kehekehe ʻe fā ʻo e talanoá, hangē ko e Fakaoli, Taimi ʻo e Kei Siʻí, Fakalaumālie, pe Ngaahi ʻEveʻeva Mālōloó. Tohi ʻa e faʻahinga talanoa takitaha ʻi ha lauʻi pepa pea fakapipiki ia ki he holisí.

2. Kumi ha ngaahi talanoa fakafāmili ʻe fā ki he faʻahinga talanoa takitaha. Kole tokoni mei ho fāmilí.

3. Fakakaukau ki ha fanga kiʻi tokoni nounou ki he talanoa takitaha pea tohi ia ʻi ha fanga kiʻi lauʻi pepa.

4. Tohi ʻa e poini 100, 200, 300, pe 400 ʻi he tafaʻaki ʻe taha ʻo e lauʻi pepá. Fakapipiki e fanga kiʻi tokoní ʻi lalo he ngaahi faʻahinga talanoá.

Founga ke Vaʻingá

1. Vahevahe ki ha timi ʻe ua. Ko hai pē naʻá ne tohi e fanga kiʻi tokoní ko e takí ia.

2. ʻE tomuʻa fili ʻe he ʻuluaki timí ha faʻahinga talanoa mo ha mataʻifika, hangē ko e “Fakaoli, ʻi he 200.”

3. ʻE toʻo ʻe he takí ʻa e mataʻifiká peá ne lau ʻa e tokoní. Kapau ʻe lava ʻe he timí ʻo tala ʻa e talanoa ʻoku fenāpasi mo e tokoní, te nau maʻu ʻa e poiní!

4. Kapau ʻoku ʻikai ke nau ʻilo ʻa e talanoá, ʻe tala ʻe he takí ʻa e talanoá ka te ne fakapuliki ha ngaahi fakaikiiki, hangē ko e feituʻu ne hoko aí pe ko hai ʻoku ʻuhinga ki aí. Kapau ʻe lava ʻe he timí ʻo mateʻi ʻa e fakaikiiki ʻoku pulí, te nau maʻu e vaeua ʻo e poiní.

5. ʻE fili ʻe he timi hokó ʻa e tokoní pea nau vaʻinga. Hili hono fili kotoa ʻo e ngaahi tokoní, ko e timi ko ia ʻoku lahi taha honau poiní ʻoku mālohí!