Sa Unsang Paagi ang Family History Makapausab sa Atong Kasingkasing ug Hunahuna
Ang pagsiksik sa atong family history ug pagbuhat og mga ordinansa sa templo para sa atong katigulangan makatabang kanato nga makita ang ka lapad apan ka personal usab sa plano sa Dios.
Sa daghang katuigan, kada higayon nga motambong ko sa templo, maghunahuna ko sa akong apohan nga sungkod nga si Hannah Mariah Eagles Harris (1817–88), apan dili tungod kay kinahanglan ko nga mopahigayon og proxy sa buhat sa templo para kaniya.
Si Mariah (mas gusto niya nga tawagon siya) usa sa mga rason nga ang akong pamilya anaa sa Simbahan. Siya nabunyagan niadtong 1840 sa England, na-endowed sa Nauvoo, Illinois, nabugkos ngadto sa iyang bana sa Winter Quarters, Nebraska, ug namatay sa Utah. Ang akong hunahuna kabahin niya samtang naa ko didto sa templo dili kabahin sa iyang panginahanglan nga mabuhat ang mga ordinansa apan kon sa unsang paagi ang mga ordinansa mibugkos niya ug nako tadlas sa panahon ug dapit.
Sa bata pa ko nagpuyo ko sa samang lungsod sa Utah diin siya nagpuyo, ug sa katapusan mibisita ko sa Winter Quarters, Nauvoo, ug sa gamayng English nga balangay diin siya natawo. Natandog ko sa kalagyo sa mga distansya nga iyang nabiyahe ug sa dakong kalainan sa iya ug akong kinabuhi.
Bisan pa sa ginta sa oras, dapit, ug kahimtang nga nag-uwang kanamo, hinoon, mibati ko nga konektado sa akong apohan nga sungkod pinaagi sa pakigsaad sa pagbugkos ug sa pagkahibalo kabahin sa iyang kinabuhi. Kana nga koneksyon mipaklaro sa mga rason luyo sa buhat sa family history ug sa pagsimba sa templo sa kinatibuk-an.
Ang pag-apil sa pagsiksik sa family history nagtudlo kanato sa kalapad ug katalagsaon sa paglalang sa Dios ug naghatag og gibug-aton sa indibidwal ug maloloy-on nga tabang sa Pag-ula ni Kristo.
Mas Dakong Gugma pinaagi sa Family History
Ang Ginoo mitudlo nga bisan tuod ang kalibutan nga Iyang gilalang para sa Iyang mga anak “dili maihap sa tawo; … ang tanan nga mga butang maihap ngari kanako, kay sila akò ug Ako nakaila kanila” (Moises 1:35). Ang family history ug buhat sa templo nagtanyag kanato og oportunidad sa pag-apil sa buhat ni Jesukristo sa kaluwasan.1 Ang pag-apil niini makatabang nato sa pagkat-on unsaon sa paghigugma ug magmaloloy-on sa atong mga pamilya, silingan, sa tanan nga atong mahimamat, kay silang tanan atong mga igsoon.2
Sa paghinumdom sa ato mismo nga mga katigulangan, atong giila ang gidak-on sa plano ug paglalang sa Langitnong Amahan. Ang Ginoo milalang og dapit aron kita masulayan ug magbaton og hugot nga pagtuo, apan tungod kay diyutay ra kaayo nga mga tawo ang may kahigayunan sa pagdawat sa kahingpitan sa mga pakigsaad sa Dios samtang dinhi sa pagka-mortal, ang kalooy sa buhat sa proxy nagpahinumdom kanato nga ang Ginoo nahigugma sa tanan Niyang mga anak ug nag-andam og paagi nga ang tanan mahimong mopili sa pagdawat sa hingpit nga mga panalangin sa ebanghelyo dili igsapayan sa ilang kahimtang sa pagka-mortal (tan-awa sa 2 Nephi 26:20–28, 32–33).
Dugang pa, ang pagkasayud sa kinabuhi sa atong katigulangan makapahinumdom nato nga dili tanan sa kinabuhi sayon, nga adunay kasagmuyo ug dili patas niining napukan nga kalibutan. Apan ang pagkat-on kabahin sa ilang kinabuhi ug sa pagpahigayon sa mga ordinansa alang kanila makapahinumdom usab nato nga walay tawo nga dili mobati sa gugma sa Dios (tan-awa sa Mga Taga-Roma 8:38–39).
Ang akong lola Mariah nadasig niining kamatuoran sa dihang una niya kining nadunggan nga gisangyaw. Niadtong 1840–41, panahon sa unang grupo nga bunyagan og proxy nga gipahigayon sa Mississippi River ug sa wala pa mahuman ang Nauvoo Temple, iyang gipahimuslan ang kahigayunan nga mabunyagan alang sa iyang namatay nga igsoong babaye, kinsa namatay sa wala pa ang mga misyonaryo miabut sa England.3 Bisan tuod og wala nako mahimamat si Mariah, akong nabati ang iyang gugma para sa iyang mga igsoon ug kahibalo nga kining gugma magpadayon lapas sa kamatayon tungod sa mga ordinansa sa templo. Ang pagpakigbahin niana nga kahibalo uban niya nakadasig usab nga higugmaon siya.
Dili ikatingala nga si Propeta Joseph Smith hapit nasanapan niining maanindot ug maloloy-on nga doktrina sa kaluwasan alang sa mga patay, nga iyang gihulagway nga “labing mahimayaon sa tanan nga hilisgutan nga nahiapil sa walay katapusan nga ebanghelyo” (D&P 128:17): “Himoa ang mga bukid nga mosinggit sa kalipay, ug tanan kamo nga mga walog mosinggit og kusog; ug tanan kamo nga mga dagat ug uga nga mga yuta mosulti sa mga kahibulongan sa inyong Walay Katapusan nga Hari! Ug kamo nga mga suba, ug mga sapa, ug mga sapa-sapa, mobaha uban sa kalipay. Himoa ang mga kalasangan ug ang tanan nga mga kakahoyan sa umahan nga modayeg sa Ginoo; ug kamo nga mga gahi nga mga bato mohilak sa kalipay! Ug himoa ang adlaw, buwan, ug mga bitoon sa kabuntagon nga moawit nga maghiusa, ug himoa ang tanan nga mga anak sa Dios nga mosinggit sa kalipay! Ug himoa ang walay katapusan nga mga linalang mopahayag sa iyang ngalan hangtud sa kahangturan!” (D&P 128:23).4
Sama ni Mariah, kinsa madasigong nagpabunyag para sa iyang igsoon, ang ubang nag-unang mga Santos sama kamalipayon. Usa niadtong unang mga Santos, si Sally Carlisle, misulat: “Pagkamahimayaon nga kita nagtuo ug … karon mabunyagan alang sa tanan natong namatay nga mga higala ug moluwas kanila kutob sa atong nasayran kabahin kanila.”5
Para sa Tanan—ug para sa Usa
Sama sa gipakita niining mga ehemplo, ang kalapad sa family history mabalanse sa personal nga kabalaka. Wala lang kita masayud sa kadako apan sa kalawmon usab sa gugma sa Ginoo, kay Siya naghunahuna sa indibidwal. Ang Ginoo kinsa nakakita sa pagkahulog sa goryon ug nangita sa nawala nga nating karnero nga nalayo sa gatusan (tan-awa sa Mateo 10:29; Lucas 15:4) wala motubos kanato isip grupo, apan tagsa-tagsa, sama nga Siya nangalagad ngadto sa mga tawo atol sa Iyang yutan-on nga pangalagad ug sama sa Iyang pagpanalangin sa mga tawo nga nagpundok sa templo sa Bountiful (tan-awa sa 3 Nephi 17).
Sa samang paagi, ang Ginoo mitudlo sa unang mga Santos og usa ka makuti nga sukaranan sa pagtipig og rekord para sa buhat sa proxy nga gihimo sa matag indibidwal (tan-awa sa D&P 128:1–5, 24). Sa ingon, kita magkugi pag-ayo sa pag-ila sa indibidwal nga mga katigulangan, dili lang lista sa mga ngalan. Pinaagi niini nga buhat atong malantaw ang kalooy sa Dios, Iyang kalooy, ug ang bili sa indibidwal nga kalag.
Dugang pa, ang pagkat-on sa mga istorya sa kinabuhi sa atong katigulangan makatabang kanato nga makat-on sa paghigugma kanila, dili igsapayan sa ilang mga sayop ug kahuyang. Samtang kita makat-on sa unsang paagi ang dili matag-an nga kausaban sa pagka-mortal makaapekto sa pagpili sa atong katigulangan, kita mobati og kalooy alang kanila. Kini nga proseso makahashas sa atong abilidad sa pagpalambo sa samang matang sa gugma para sa mga buhi, sa atong pamilya ug sa tanang mga anak sa Dios. Ang mas lawom nga pagbati nga ang tanang katawhan, gani ang kadaghanan kinsa mianhi sa kalibutan nga walay oportunidad sa pagdawat sa mga pakigsaad ug mga ordinansa, mga anak sa langitnong ginikanan makatabang nato nga makasabut nga ang kinabuhi usa ka pagsulay sa hugot nga pagtuo ug paglig-on sa tanan nga nagpuyo, “sumala sa ilang paggamit sa kahayag nga gihatag [sa Dios] kanila.”6
Ang makalimpyo nga impluwensya sa buhat sa family history makapalambo sa atong kaugalingong kapasidad sa paghigugma. Kon atong makat-unan sa paghigugma ang mga tawo nga dugay nang patay, nga nagkinabuhi nga lahi kaayo kay kanato, nan dili ba kita makaamgo kon unsa ka mahigugmaon ug maloloy-on ang Dios ngari kanato? Ug dili ba nato higugmaon ang atong mga pamilya ug mga silingan ug magmaloloy-on sa ilang mga kahuyang?
Kon ang uban makakita sa bugtong litrato sa akong lola Mariah, kasagaran sila mokomentaryo kon unsa ka mug-ot o ka bati niyang tan-awon ngadto nila. Depensahan dayon nako siya tungod kay nakaila ko niya. Ako nakaila sa tawo nga milakaw subay sa River Severn isip batan-ong babaye ug isip inahan sa gagmay nga mga anak. Ako nakaila sa tawo kinsa milawig tadlas sa kadagatan, nanganak sa iyang ikaupat nga anak atol sa biyahe. Ako nakaila sa tawo kinsa mipadala sa bana ngadto sa gubat ug namatyan og masuso samtang wala iyang bana. Ako nakaila sa tawo kinsa milakaw og 1,000 ka milya (1,609 km) ngadto sa bag-ong panimalay sa kasadpang disyerto sa Amerika. Ako nakaila sa tawo kinsa mitrabaho ug mipakigsaad ug mi-uma ug mihigugma. Ug sa pagkaila niya, nabati nako ang gugma sa langitnong ginikanan para niya ug sa tagsa-tagsa nilang mga anak.
Family History—ang Gidak-on sa Buhat ug ang Maloloy-ong Pagtabang
Ang sentro sa family history dili lang kabahin sa paggamit sa computer; dili kini kabahin sa pagbasa sa karaang agi sa pagsulat o paghimo og detalyadong mga kausaban ug kinutlo. Kadto mga himan o mga kalihokan sa family history, apan dili kini ang sentro sa family history, ni makakuha sa kaimportante nganong ang mga Santos sa Ulahing mga Adlaw nagtinguha sa ilang katigulangan. Ang family history, sa tinuoray nga kahulugan, nagtudlo kanato sa gidak-on sa buhat sa paglalang ug katubsanan ug dungan nga nagpahinumdom kanato sa personal ug maloloy-ong makab-ot sa Pag-ula ni Kristo.
Ang pagsiksik sa atong katigulangan adunay susama nga epekto sa atong kasingkasing ug hunahuna kon kita makaamgo nga kadtong mga tawhana—“dili maihap sama sa balas diha sa baybayon” (Moises 1:28)—mga anak sa langitnong mga ginikanan ug gihigugma ug nailhan nila. Dili ikatingala nga si Joseph mihulagway sa pagsulod sa celestial nga gingharian nga sama sa pag-agi sa ganghaan nga “talagsaon nga katahum” (D&P 137:2), kay unsa pay mas talagsaon nga katahum kay sa maluwas uban niadtong atong kaila ug gihigugma, kinsa, sama nato, natubos usab niadtong malukpanon ug personal nga gugma sa Dios? Naghinam-hinam ko nga mahimamat si lola Mariah nianang ganghaan.