Panahon sa Kasulatan

Si Jesus Gibunyagan

Ni Erin Sanderson ug Jean Bingham

Ang mga tagsulat nagpuyo sa Utah, USA.

Magkat-on mahitungod sa Bag-ong Tugon niining tuiga!

Unsa kahay sama niini nga makatan-aw sa pagbunyag ni Jesus? Ang Bag-ong Tugon nagsulti nato unsay nahitabo nianang balaan nga adlaw.

“Ug niadtong panahona si Jesus gikan sa Galilea miadto kang Juan sa Jordan, aron magpabunyag kaniya.

“Ug sa nabunyagan na si Jesus, siya mihaw-as dayon gikan sa tubig: ug, tan-awa, nabukas ang kalangitan, ug iyang nakita ang Espiritu sa Dios nga mikunsad nga ingon og salampati, ug mipahiluna kini diha sa ibabaw niya:

“Ug ania karon usa ka tingog gikan sa langit, nag-ingon, Kini mao ang akong Anak nga pinalangga, kaniya may kalipay ako” (Mateo 3:13, 16–17).

Sa espesyal nga adlaw sa dihang kamo gibunyagan ug nakumpirmahan, kamo nagsunod ni Jesukristo. Kamo nahimong sama sa usa ka bag-o nga tawo—kamo misaad nga kanunay nga mohinumdom ug mosunod ni Jesukristo, kamo nahimong miyembro sa Iyang Simbahan, kamo midawat sa gasa sa Espiritu Santo, ug kamo nahimong hingpit nga limpyo. Nahimuot kaayo kaninyo ang Langitnong Amahan. Ang bunyag moabli sa ganghaan sa dalan nga mogiya nato balik ngadto sa Langitnong Amahan.

Pagkat-on pa og Dugang

• Jordan—ang Suba sa Jordan

• Juan—Juan Bautista

• mikawas dayon gikan sa tubig—mibarug pagkahuman nga hingpit nga gipaunlod ilawom sa tubig

• ang Espiritu sa Dios—ang Espiritu Santo

• mikunsad ingon sa salampati—nagpaubos sa hinay-hinay ug malinawon sama sa usa ka salampati

• usa ka tingog gikan sa langit—ang tingog sa Langitnong Amahan

Panag-istorya sa Pamilya

Kadtong kinsa nabunyagan na mosulti unsay ilang gibati nianang espesyal nga adlaw. Makapaambit usab sila kon giunsa nila sa pagtuman sa ilang mga pakigsaad sa bunyag ug sa unsang paagi ang Espiritu Santo migiya, mihupay, mitudlo, o mipasidaan kanila.

Kanta: “When Jesus Christ Was Baptized” (Children’s Songbook, 102).

Mga Kasulatan: Mateo 3:13, 16–17; mga Artikulo sa Hugot nga Pagtuo 1:4

Mga Video: Adto sa Biblevideos.lds.org motan-aw sa “The Baptism of Jesus.”

Mga Pangutana sa Kasulatan

Guntinga ang mga word strip sa ubos ug isulod kini sa sudlanan. Pagpuli-puli sa pagpili og mga pangutana ug sa paggamit sa mga kasulatan sa pagtubag niini.

• Kinsa ang nagbunyag ni Jesus? (Mateo 3:13)

• Nganong si Jesus gusto nga magpabunyag? (Mateo 3:15; 2 Nephi 31:7, 9)

• Nganong kinahanglan man kitang bunyagan? (Juan 3:5)

• Unsay nahitabo human si Jesus bunyagi? (Mateo 3:16–17)

• Unsay buot ipasabut sa pagpaunlod? (D&P 76:51; Moises 6:64–65)

• Unsaon man nato sa pagdawat sa gasa sa Espiritu Santo? (D&P 33:15)

• Unsay atong gisaad sa dihang gibunyagan kita? (Mosiah 18:8–13; D&P 20:37)

• Unsay gisaad sa Langitnong Amahan kanato kon kita bunyagan? (D&P 76:52–56)

• Unsay angay natong buhaton human sa bunyag aron mabuhi sa kahangturan uban sa Langitnong Amahan? (2 Nephi 31:18–20)

Mga Tip sa Kasulatan!

Ang pagmemorya og mga bersikulo sa kasulatan mahimong sayon sama sa 1-2-3.

1. Isulat ang matag pulong sa bersikulo diha sa usa ka lain nga piraso sa papel. Han-aya ang mga kard ug basaha og kusog ang bersikulo.

2. Sagul-sagula ang mga kard ug han-aya kini pag-usab. Basaha pag-usab ang bersikulo.

3. Ipalayo ang usa ka kard ug basaha ang bersikulo pag-usab. Padayon sa pagpalayo og mga kard hangtud imong masulti ang tibuok bersikulo nga wala nay mga kard.

Karon nga namemorya na nimo kini, madala na nimo ang bersikulo bisan asa ka moadto!