Mga Profile sa Young Adult
Lig-ong mga Bugsay, Lig-ong mga Pagpamatuod sa French Polynesia
Usa ka batan-ong magtiayon sa French Polynesia nakakaplag nga ang ebanghelyo ug ang ilang paborito nga dula adunay pipila ka butang nga komon.
Sa tunga-tunga sa Pacific Ocean nahimutang ang 118 ka isla nga namugna gikan sa underground nga mga bulkan o mga coral atoll. Napuno sa punoan sa palma, itom nga mga perlas, ug mga bulak sa Tiaré, kini nga mga isla panimalay sa mga 275,000 ka mga taga-Tahiti (ang sagad itawag sa mga nagpuyo sa French Polynesia).
Si Gerry Huuti, 29 anyos nga kinabig, usa kanila. Siya malingaw sa nasudnong dula, nga va‘a, o outrigger canoeing, nga nahimong importante nga bahin sa iyang kinabuhi sukad nga 16 anyos siya. Lima ka tuig human siya nagsugod og pagpanlumba, iyang nahimamat si Laydreane—kampeyon nga tigpamugsay ug miyembro sa Simbahan. Salamat sa iyang ehemplo, si Gerry nabunyagan ug nag-misyon sa New Caledonia samtang si Laydreane nagserbisyo sa Tahiti. Sila nagminyo unom ka semana human si Gerry miuli.
Karon, paglabay sa pipila ka tuig ug nakabaton og usa ka anak, si Gerry miapil gihapon sa sangka nga va‘a—apan iyang gisuportahan ang iyang pamilya pinaagi sa paghimo og mga bugsay para sa mga va’a outrigger. “Ang akong negosyo tapad sa akong balay,” siya mipasabut. “Mogawas ko ug mangita og kahoy aron putlon ug ipapilit aron makamugna og mga bugsay.” Ingon og yano kini nga paminawon, apan ang kada usa niining nindot nga kahoy nga bugsay nagkinahanglan og lima ka adlaw sa paghimo. Ug tungod sa 20,000 ka mga tigpamugsay sa isla sa Huutis sa Tahiti, ang mga bugsay kanunay nga gikinahanglan.
Bisan tuod si Gerry ug Laydreane busy sa calling sa Simbahan, sila aduna gihapoy panahon nga moadto sa templo. “Tungod sa among pagtambong sa templo, kami adunay mas maayo nga relasyon,” miingon si Gerry. “Kami napanalanginan usab sa among negosyo. Ang pagbaligya og mga bugsay nga kamo-kamo lang mahimong paigo ra, apan kon inyo kining buhaton uban sa Ginoo, mas maayo.” Kana nga balaanong tabang importante sa mga Huutis. Si Gerry ug ang iyang asawa adunay lig-on usab nga pagpamatuod sa ikapulo. “Kami wala mabalaka nga ang Langitnong Amahan mopanalangin namo,” miingon si Gerry. “Kon mobayad mo sa inyong ikapulo, mas daghan ang inyong madawat.”
Alang sa mga Huutis, ang va‘a labaw pa sa usa ka dula. Ang mga baruganan sa pagpahinungod ug pasalig nga gikinahanglan aron mahimong maayo nga mga tigpamugsay nakatabang nila ni Gerry ug Laydreane nga mas maunungon sa ebanghelyo. “Sa va‘a, ang pisikal mahinungdanon kaayo,” miingon si Gerry, “apan kini dili mao ang pinakaimportante nga butang. Mas importante ang mental—kadeterminado nga humanon ang lumba. Kon kamo magbugsay sulod sa upat ug tunga sa oras, ang inyong lawas mobati nga dili na ninyo kini mahimo, apan ang inyong hunahuna mosulti nga inyo kining mahimo. Sa ebanghelyo, ang determinasyon importante kaayo. Usahay kamo mawad-an og kadasig, apan ang hugot nga pagtuo makatabang ninyo nga molampos pinaagi sa pagsunod sa plano sa Dios sa inyong kinabuhi. Kita kanunay adunay makat-unan gikan sa va‘a nga magamit sa ebanghelyo.”