Doktor o Elder?
Mukandila Danny Kalala, Liberia
Mga paghulagway pinaagi ni Bradley H. Clark
Sa dihang nahuman ko sa high school, nasayud ko nga kinahanglang magpaabut ko og dili mominos duha ka tuig sa dili pa mag-misyon. Mihukom ko sa pag-eskwela sa kolehiyo, nag-ihap-ihap nga mahuman ko og eskwela sa medisina sulod sa unom ka tuig kon hingpit ko nga moeskwela. Nagplano ko nga mag-full-time misyon inigkahuman.
Pagkahuman og eskwela sa medisina sa edad nga 24, misugod ko sa clinical apprenticeship, nga nagpalambo sa akong oportunidad sa pagpanarbaho. Niining panahona naglisud ko nga mamili: mag-misyon ba gyud ko, o mopadayon ko og trabaho? Ang akong mga ginikanan, akong magulang nga lalaki (kinsa bag-ohay lang miuli gikan sa iyang misyon), akong bishop, ug usa ka magtatambag sa kapangulohan sa lokal nga misyon miawhag nako sa pagserbisyo.
Nagtuo ko nga husto sila, apan lisud sa paglangay sa akong nagkanindot nga propesyon sa medisina. Nag-ampo ug nagpuasa ko para sa inspirasyon. Usab akong gikonsulta ang akong patriyarkal nga panalangin, nga nagrekomendar nga ako moserbisyo og full-time nga misyon ug may saad nga mga panalangin isip resulta.
Usa ka adlaw, samtang nagsakay og pampublikong sakyanan padulong mouli gikan sa akong apprenticeship, wala damhang nakakita ko sa patriyarka sa stake. Nanganaog mi sa samang hununganan ug, nakakuryuso, misugod mi paglakaw sa sama nga direksyon. Iya kong nailhan nga miyembro sa Simbahan.
Samtang dungan mi nga nanglakaw, nangutana siya kon unsay akong planong buhaton sa akong kinabuhi. Gipasabut nako nga ako usa ka doktor ug naproblema sa pagdesisyon tali sa akong propesyon ug sa misyon. Iyang kong gisultian uban sa ligdong nga tingog sa pagserbisyo sa Ginoo pinaagi sa pag-misyon, nagdugang nga mapanalanginan ko isip resulta. Alang nako, ang iyang tubag ingon og gikan sa Ginoo.
Diha-diha dayon nahinumduman nako ang mosunod nga kasulatan: “Pangita una kamo sa gingharian sa Dios ug sa iyang pagkamatarung, ug kining tanan nga mga butang idugang nganha kaninyo.” (3 Nephi 13:33).
Sigurado ko nga ang Ginoo mitubag kanako. Walay dugang pagduha-duha, nakahukom ko nga ilangan ang akong propesyonal nga trabaho ug mag-misyon. Ang akong kauban nga mga doktor naghunahuna nga akong makalimtan ang medikal nga mga buluhaton tungod kay malayo ko sulod sa duha ka tuig. Namugos gyud sila, apan lig-on ko sa akong desisyon.
Gibiyaan nako ang titulo nga “Dr.”, miserbisyo ko og duha ka tuig sa Democratic Republic of Congo Kinshasa Mission.
Paglabay sa lima ka tuig, naglista ko sa dagkong mga panalangin nga misunod human sa akong pagserbisyo. Labaw sa tanan, nakakaplag ko og asawa—matinud-anon nga miyembro sa Simbahan ug akong hingpit nga kalipay. Sa pagkakaron, kami adunay duha ka anak. Ang among pamilya nabugkos alang sa kahangturan. Sulod sa templo kami naglihok isip mga proxy sa pagpahigayon sa mga ordinansa alang sa among katigulangan. Ako adunay sigurado nga trabaho, nga nakapahimo sa akong pamilya nga mapaningkamuton sa kaugalingon. Kini mao lamang ang pipila ka mga panalangin nga among nadawat gikan sa Ginoo.
Nasayud ko nga ang Langitnong Amahan dili gayud mamakak ug sa katapusan Iyang tumanon ang tanan Niyang mga saad ngari kanato samtang kita mosalig Kaniya ug mosunod sa Iyang mga sugo.