Hangad ngadto sa Dios Matag Adlaw
Ni Elder D. Todd Christofferson
Sa Korum sa Napulog Duha ka mga Apostoles
Gikan sa usa ka fireside sa Church Educational System nga gihatag niadtong Enero 9, 2011.
Pinaagi sa paghatag og inadlaw nga pagkaon, usa ka adlaw matag higayon, ang Dios misulay sa pagtudlo nato og hugot nga pagtuo.
Nalakip sa Pag-ampo sa Ginoo mao ang pagpangamuyo “Hatagi kami karon sa pagkaon namo sa matag adlaw” (Mateo 6:11) o “Sa adlaw-adlaw hatagi kami sa among kalan-on” (Lucas 11:3). Ako nagtuo nga kitang tanan andam moila nga kita adunay panginahanglan matag adlaw nga gusto nato ang tabang sa atong Langitnong Amahan sa pag-atubang niini. Alang sa uban, sa pipila ka adlaw, literal gyud kini nga tinapay—nga mao, ang pagkaon nga gikinahanglan aron sa pagpatunhay sa kinabuhi nianang adlawa. Mahimo usab kini nga espirituhanon ug pisikal nga kalig-on sa pag-atubang sa usa pa ka adlaw sa grabe nga sakit o usa ka sakit nga hinay ang pagkaayo. Sa laing mga kahimtang kini mahimong mga panginahanglan nga dili makita, sama sa mga butang nga may kalabutan sa mga obligasyon o mga kalihokan nianang adlawa—pagtudlo og leksyon o pagkuha og eksaminasyon, pananglitan.
Si Jesus nagtudlo nato, Iyang mga disipulo, nga kinahanglan kitang mohangad ngadto sa Dios matag adlaw alang sa pagkaon—sa tabang ug pagpatunhay—nga atong gikinahanglan nianang piho nga adlaw.
Ang pagdapit sa Ginoo sa pagpangita sa atong pagkaon kada adlaw diha sa mga kamot sa atong Langitnong Amahan naghisgot sa usa ka mahigugmaon nga Dios, nahibalo bisan sa ginagmay, inadlaw nga mga panginahanglan sa Iyang mga anak ug matinguhaon nga motabang kanila, tagsa-tagsa. Siya nag-ingon nga makapangayo kita pinaagi sa hugot nga pagtuo niana nga Nilalang “nga nagapanghatag ngadto sa tanan nga mga tawo sa madagayaon gayud, ug walay pagkasuko; ug kini igahatag” (Santiago 1:5). Mao kana, siyempre, hilabihan ka mapasaligon, apan adunay butang nga naglihok dinhi nga mas mahinungdanon pa kay sa tabang nga makuha adlaw-adlaw. Samtang kita magtinguha ug modawat sa balaanong pagkaon matag adlaw, ang atong hugot nga pagtuo ug pagsalig sa Dios ug sa Iyang Anak motubo.
Ang Pagtan-aw ngadto sa Dios matag Adlaw sa Atong mga Panginahanglan Makaalima sa Hugot nga Pagtuo
Inyong mahinumduman ang mahinungdanon nga exodo sa mga tribo sa Israel gikan sa Ehipto ug sa 40 ka tuig sa kamingawan sa wala pa mosulod sa ilang yuta nga saad. Daghan kaayong mga tawo nga sobra sa usa ka milyon kinahanglang pakan-on. Kana nga gidaghanon sigurado gayud nga dili makalahutay sa pagpangayam, ug ang ilang pagsige og balhin-balhin niadtong panahona dili haum nga mananom o mamuhi og kahayupan sa igong gidaghanon. Si Jehova misulbad sa hagit pinaagi sa milagrosong paghatag sa ilang pagkaon sa matag adlaw gikan sa langit—ang mana. Pinaagi ni Moises, ang Ginoo mimando sa mga tawo nga manguha og igo nga mana matag adlaw alang nianang adlawa, gawas sa adlaw sa dili pa ang Igpapahulay, diin kinahanglan silang manguha og igo sulod sa duha ka mga adlaw (tan-awa sa Exodo 16:19–29).
Pinaagi sa paghatag og inadlaw nga pagkaon usa ka adlaw sa matag higayon, si Jehova misulay sa pagtudlo og hugot nga pagtuo sa usa ka nasud nga sobra sa 400 ka tuig nga nawad-an pag-ayo sa hugot nga pagtuo sa ilang mga amahan. Nagtudlo siya kanila sa pagsalig Kaniya, sa “paghunahuna ngadto [Kaniya] sa matag hunahuna; ayaw pagduha-duha, ayaw kahadlok” (D&P 6:36). Siya naghatag og igo alang sa usa ka adlaw sa matag higayon. Gawas sa ikaunom nga adlaw, dili sila mahimong motipig og mana nga gamiton sa mosunod nga mga adlaw. Sa lintunganay, ang mga anak sa Israel kinahanglan molakaw uban Kaniya karon ug mosalig nga Siya mohatag og igong gidaghanon sa pagkaon alang sa sunod nga adlaw sa sunod nga adlaw, ug uban pa. Niana nga paagi Siya dili gayud mahilayo sa ilang mga hunahuna ug kasingkasing.
Salig sa Ginoo—Ang mga Solusyon Moabut sa Paglabay sa Panahon
Kaniadto sa wala pa ako tawaga isip General Authority, ako nag-atubang og personal nga ekonomikanhong hagit nga nagpadayon sulod sa daghang mga tuig. Usahay kini nga hagit nakahulga sa kaayohan sa akong pamilya ug nako, ug ako naghunahuna nga kami nag-atubang og krises sa pinansyal. Nag-ampo ako og milagro nga makaluwas namo. Bisan tuod og mihalad ko niana nga pag-ampo sa daghang higayon uban sa pagkamatinud-anon ug kinasingkasing nga tinguha, ang tubag sa katapusan mao ang “Dili.” Sa katapusan nakakat-on ko sa pag-ampo sama sa gibuhat sa Manluluwas: “Hinoon dili akong pagbuot maoy matuman, kondili ang imo” (Lucas 22:42). Nagtinguha ko sa tabang sa Ginoo sa matag gamay nga paagi ngadto sa katapusang kasulbaran.
Dihay mga higayon nga nahurot na ang tanan nakong mga kapanguhaan, nga wala na akoy kaadtoan o kaduolan nianang higayona. Daghang higayon nga ako miluhod sa atubangan sa akong Langitnong Amahan, nangaliyupo sa Iyang tabang nga naghilak. Ug mitabang Siya. Usahay usa ra ka pagbati sa kalinaw, usa ka pagbati sa kasiguroan nga mamaayo ra ang tanan. Tingali wala nako makita kon sa unsang paagi o unsa nga dalan, apan Siya mitabang nako aron masayud nga, direkta o dili direkta, Siya mohatag og paagi. Ang mga kahimtang mausab, usa ka bag-o ug makatabang nga ideya mosantup sa hunahuna, ang wala paabuta nga kinitaan o laing kapanguhaan moabut sa saktong panahon. Sa ingon adunay kasulbaran.
Bisan og ako nag-antus kaniadto, samtang ako naghinumdom karon, mapasalamaton ako nga walay dali nga solusyon sa akong problema. Ang kamatuoran nga ako napugos sa pagduol sa Dios alang sa panabang sa daghang mga tuig nagtudlo nako unsaon sa pag-ampo ug makakuha og mga tubag sa pag-ampo ug nagtudlo nako sa usa ka praktikal kaayo nga paagi sa pagbaton og hugot nga pagtuo sa Dios. Akong nailhan ang akong Manluluwas ug akong Langitnong Amahan sa paagi ug sa matang nga dili unta mahitabo sa laing paagi o mas dugay pa unta nga makab-ot. Akong nakat-unan nga ang pagkaon usa ka bililhong butang. Akong nakat-unan nga ang mana karon mahimong tinuod sama sa pisikal nga mana sa kasaysayan sa biblia. Nakakat-on ko sa pagsalig sa Ginoo sa tibuok nakong kasingkasing. Nakakat-on ko sa paglakaw uban Kaniya adlaw-adlaw.
Sulbara ang Dagkong mga Problema sa Ginagmay, Inadlaw nga mga Paagi
Ang pagpangayo sa Dios sa atong inadlaw, senimana, binulan, o tinuig nga kalan-on, mao usab ang paagi sa pagtutok nato sa gagmay, mas madumala nga mga tipik sa usa ka problema. Sa pag-atubang sa mga butang nga dako kaayo, tingali kinahanglang ginagmayon nato sa pagtrabaho, sa inadlaw nga mga paagi. Usahay mahimo lamang nato sa usa ka adlaw (o bisan kabahin sa usa ka adlaw) sa usa ka higayon. Tuguti ko sa paghatag ninyo og usa ka ehemplo nga wala sa kasulatan.
Niadtong mga 1950 ang akong inahan naluwas sa operasyon sa kanser, apan bisan lisud na kini kaniadto, ang operasyon gisundan sa dinosena nga mga radiation treatment nga gikonsiderar na karon nga kinaraan nga kondisyon sa medikal. Nakahinumdom siya nga ang iyang inahan mitudlo kaniya og butang nianang higayuna nga nakatabang kaniya sukad: “masakiton kaayo ko ug luya, ug miingon ko niya usa ka adlaw niana, ‘Oh, Mama, dili na nako maagwanta ang dugang 16 pa nga mga pagtambal.’ Miingon siya, ‘Makaagwanta ka ba karon?’ ‘Oo.’ ‘Nan, mahal, mao lang kana ang kinahanglan nimong buhaton karon.’ Nakatabang kini nako sa daghang mga higayon kon akong hinumduman ang paglahutay sa usa ka adlaw o usa ka butang sa usa ka higayon.”
Samtang kamo mangayo diha sa pag-ampo sa inyong pagkaon, hunahunaa og maayo ang inyong mga panginahanglan—ang unsay kulang ninyo ug unsay kinahanglan ninyong protektahan. Samtang kamo mopahulay, hunahunaa ang mga kalampusan ug mga kapakyasan nianang adlawa ug unsay makapahimo sa sunod nga adlaw nga mas maayo og gamay. Ug pasalamati ang inyong Langitnong Amahan sa mana nga Iyang gibutang sa inyong agianan nga nakapatunhay kaninyo sa tibuok adlaw. Ang inyong mga pamalandong mopalambo sa inyong pagtuo kaniya samtang inyong makita ang Iyang kamot nga nagtabang kaninyo sa paglahutay sa pipila ka mga butang ug sa pag-usab sa uban. Mahimo kamong maglipay sa usa pa ka adlaw, usa pa ka lakang padulong sa kinabuhing dayon.
Si Jesukristo mao ang Tinapay nga Nagahatag og Kinabuhi
Labaw sa tanan, hinumdumi nga kauban nato Siya diin ang mana usa ka matang ug simbolo Kaniya, ang Tinapay sa Kinabuhi, ang Manunubos.
“Ug si Jesus mitubag kanila, Ako mao ang tinapay nga nagahatag og kinabuhi: siya nga moari kanako dili gutumon; ug siya nga mosalig kanako dili gayud uhawon.” …
“Sa pagkatinuod, sa pagkatinuod, magaingon ako kaninyo, nga ang mosalig may kinabuhing dayon.
“Ako mao ang tinapay nga nagahatag og kinabuhi” (Juan 6:35, 47–48).
Mohatag ko sa akong pagsaksi sa buhing kamatuoran sa Tinapay nga Nagahatag og Kinabuhi, si Jesukristo, ug sa walay kinutuban nga gahum ug maabut sa Iyang Pag-ula. Sa katapusan, ang Iyang Pag-ula, Iyang grasya, mao ang atong pagkaon. Kita kinahanglang magtinguha Kaniya kada adlaw, sa pagbuhat sa Iyang kabubut-on kada adlaw, nga mahimong usa uban Kaniya sama nga Siya usa uban sa Amahan (tan-awa sa Juan 17:20–23). Ako mopanalangin kaninyo nga samtang kamo nagtinguha niini gikan Kaniya, ang inyong Langitnong Amahan mohatag ninyo sa inyong inadlaw nga tinapay.