Ako Nakaila sa Manluluwas
Brian Knox, Arizona, USA
Mga paghulagway pinaagi ni Bradley H. Clark
Sa akong unang tuig sa high school, ako mihimo og pasalig sa pagbasa sa Bag-ong Tugon gikan sa sinugdanan hangtud sa katapusan. Human sa klase ug sa katapusan sa semana, ako moadto sa taas nga andana sa among balay ug mobasa sa mga pulong sa Manluluwas ug sa Iyang mga milagro ug kinabuhi.
Bisan tuod ang akong batan-ong hunahuna kasagaran wala makasabut sa pinulongan sa Biblia, ako nakaila ni Jesukristo. Nakat-unan nako nga Siya mao ang Anak sa Dios ug nga Siya gipadala aron sa pagtubos sa atong mga sala. Nakat-unan nako nga Siya naglakaw, nakigsulti, ug nanalangin sa ordinaryo, huyang nga mga tawo—mga tawo sama nako.
Usahay maglibug ko samtang nagbasa sa lisud nga mga tudling sa mga epistola ni Pablo ug mga sinulat ni Juan sa basahon sa Pinadayag, apan akong gibati kanunay ang kamatuoran sa ilang mga pagtulun-an. Akong nakaplagan nga ang pagbasa sa kasulatan nakatabang nako sa lisud nga mga adlaw sa eskwelahan ug nakahatag nako og giya sa paghimo og importanting mga desisyon.
Mga tuig ang milabay, samtang ako nag-andam alang sa misyon, akong nakita ang akong kaugalingon nga nagpangutana sa akong mga motibo sa pagserbisyo. Mibati ko nga walay butang nga espesyal mahitungod sa akong pagpamatuod o mahitungod nako. Naghunahuna ko kon ako nangandam sa misyon tungod sa obligasyon ngadto sa akong mga ginikanan ug sa akong mga lider, kinsa naningkamot sa pagtudlo nako sa ebanghelyo. Naghunahuna gani ko nga mas maayo pa sa Ginoo nga wala ang akong pagserbisyo.
Usa ka adlaw samtang nagbasa ko sa Basahon ni Mormon, ang mga pulong ni Abinadi mitandog sa akong kasingkasing:
“Siya dad-on, ilansang sa krus, ug patyon. …
“Ug sa ingon ang Dios mibugto sa mga higot sa kamatayon, ingon nga nakaangkon sa kadaugan ibabaw sa kamatayon. …
“Ug karon ako moingon nganha kaninyo, kinsa ang mopadayag sa iyang kaliwatan?” (Mosiah 15:7–8, 10; emphasis gidugang).
Akong gibalik-balik og basa ang katapusang linya, naghunahuna kon diha na ba kini. Pinaagi sa pagbasa sa Bag-ong Tugon, nasayud ko sa kinabuhi sa Manluluwas ug sa henerasyon niadtong kinsa naglakaw uban Kaniya. Apan kadtong henerasyon sa Manluluwas dili makabisita sa mga katawhan karon aron sa pagtudlo sa Iyang gugma, sa Iyang Pag-ula, ug sa Iyang Simbahan. Busa sa unsang paagi ako makabalibad nga dili mopakigbahin sa akong pagpamatuod mahitungod Kaniya?
Ang Ginoo gusto nga ako mopakigbahin sa maayong balita sa ebanghelyo nga akong nadawat. Nasayud ko nga ang ebanghelyo tinuod, ug gusto kong mopaambit sa mga kamatuoran nga akong nakat-unan samtang nagbasa sa mga kasulatan.
Sa wala madugay human niini nga kasinatian ako nagmisyon. Karon akong ipahinungod ang tinguha nga ako kinahanglan nga moserbisyo sa unsay akong nakat-unan mahitungod sa Manluluwas isip usa ka batan-ong estudyante nga nagbasa sa mga kasulatan.