2015
Kon ang Buotang mga Higala Masayop
Pebrero 2015


Kon ang Buotang mga Higala Masayop

Kon ang usa ka higala nga kanhi dunay taas nga mga sumbanan nga midailos og maayo paubos, unsay inyong buhaton?

Imahe
Young woman looking sad.

“Siya ug ako suod nga mga higala, ug kami kanunay susama og mga sumbanan. Apan dayon …”

Pamilyar ba kana? Nakasinati kitang tanan niini o nakakita nga kini nahitabo—usa ka buotan nga higala nagsugod sa pagbuhat og dili maayo ug nag-awhag sa uban sa pag-apil. Ang pipila sa labing lisud nga mga pangutana nga inyong atubangon mao ang “Kinahanglan bang makig-istorya ko sa akong higala mahitungod niini nga kinaiya?” ug “Kinahanglan bang mohunong ko sa paggahin og panahon uban sa akong higala kon kini nga kinaiya magpadayon?”

Walay usa ka tubag nga mohaum sa matag sitwasyon, mao nga ang pagpangita og solusyon magkinahanglan og hugot nga pagtuo ug kaisug sa pagsunod sa tambag sa Alang sa Kalig-on sa Kabatan-onan: “Samtang kamo nagtinguha nga mahimong higala sa uban, ayaw ipaubos ang inyong mga sumbanan. Kon ang inyong mga higala moawhag ninyo sa pagbuhat sa mga butang nga sayop, barug alang sa matarung, bisan kon kamo mag-inusara sa pagbarug. Tingali kinahanglan kamong mangita og laing mga higala kinsa mosuporta kaninyo sa pagsunod sa mga sugo. Tinguhaa ang giya sa Espiritu Santo samtang kamo naghimo niini nga mga pagpili” ([2011], 16–17).

Aniay duha ka mga ehemplo sa mga batan-on kinsa nakig-atubang sa mga higala kinsa nagsugod sa pag-awhag nila sa pagbuhat og sayop.

Hunong sa Pakig-uban

“Duna koy higala nga nagsugod sa pag-awhag nako sa pagbaliwala sa akong mga sumbanan, ug sa makadiyot naminaw ko. Sa katapusan mihukom ko nga igo na ug dili ko motugot nga siya moimpluwensya nako. Nag-ampo ko alang sa kalig-on ug giya, ug tungod kay ako nagpuyo sa paagi nga akong nahibaloan nga maoy sakto, nakadawat ko og giya nga akong gipangayo. Sa katapusan mihunong ko sa pagpakig-uban kaniya, ug sa mga bulan nga milabay, ang akong pagpamatuod mitubo pag-ayo. Kinsa ang inyong mga higala siguradong makahimo og kalainan sa inyong abilidad sa pagsunod sa gitudlo sa ebanghelyo.”

Margaret Denise K., 17, Utah, USA

Pagpadayon sa Paglaum

“Sa sinugdanan sa high school, akong nahimamat ang laing miyembro sa Simbahan kinsa lig-on kaayo sa espirituhanong paagi. Siya usa ka tighupot sa Aaronic Priesthood ug daw usa ka maayo nga ehemplo sa usa ka tawo kinsa nagsunod sa ebanghelyo. Kami nahimong maayong managhigala ug perming mag-istorya kabahin sa Simbahan. Samtang kami nanagko, ang iyang bili sa kaugalingon ug abilidad nga barugan sa iyang mga sumbanan misugod sa pagkunhod. Bisan og kami mga higala pa gihapon, mikuyog siya sa uban kinsa dili kaayo maayong mga impluwensya. Makadungog ko niya nga mamalikas kanunay ug mokomedya mahitungod sa imoralidad ug uban pang mga butang nga dili angay. Pipila sa iyang mga higala dili motuo og Ginoo ug maghisgot og dili maayo kabahin sa ‘Mormonismo.’ Sa wala madugay, naadik siya sa tsa ug, sa edad nga 13, nakauyab siya.

“Wala ko masayud unsay buhaton. Misulay ko sa pagsulti kaniya sa mahigalaon nga paagi sa akong kabalaka alang kaniya sa daghang higayon, apan gibaliwala ko niya. Wala gihapon ko mohunong. Gibarugan ko ang akong mga sumbanan ug naningkamot nga mahimong ehemplo alang kaniya. Dili ko gusto nga mohunong nga iyang higala, apan sa dihang migrabe na gyud ka ngil-ad, kana nga hunahuna sa paghunong nagkanindot buhaton. Sa katapusan, nag-ampo ko sa makadaghang higayon alang sa iyang kaluwasan.

“Dayon ang iyang papa nakatrabaho sa laing estado. Kining umaabut nga pagbalhin nakapabuka sa mga mata sa akong higala sa tanan niyang nahimo. Ang tanan nakong gisulti sulod sa tulo ka tuig, kalit niyang nasabtan. Sa misunod nga mga semana, naningkamot siya’g maayo aron mausab ang iyang naagian kutob sa mahimo. Sa dihang misulti ako niya, siya nagpasalamat nako sa akong ehemplo ug kaandam nga dili siya undangan. Siya labing malipayon ug tinud-anay nga nakasabut unsay gipasabut nga mahimong usa ka Santos sa Ulahing mga Adlaw.

“Kon ang usa ka higala masayop, sa akong hunahuna mas maayo nga siya pahibaloon sa iyang mga aksyon. Apan kon, sama sa akong higala, siya dili maminaw, ayaw og hunong. Tingali mao kini ang higayon nga siya labing nagkinahanglan og tinuod nga higala. Barugi ang inyong mga sumbanan, bisan kon siya motintal ninyo sa paghimo og dili maayo. Pag-ampo alang kaniya. Nasayud ko nga kamo makaangkon og kalig-on pinaagi niini, ug nga kamo wala mag-inusara sa inyong mga paningkamot. Sayon ra nga mobati nga huyang ug wala sa lugar kon kita mobarug alang sa kaayohan. Apan pinaagi sa mahuyang, ang Ginoo mobuhat og kahibulongan nga buhat.”

Collin Z., 16, Wyoming, USA

Imahe
Young pretty black woman with her hands folded over the top of a table. She is praying.

Pag-usab, walay usa ka tubag sa pangutana “Kinahanglan ba akong mohunong sa pagpakig-uban sa akong mga higala?” Apan usa ka butang ang sigurado: pag-ampo kanunay alang sa giya sa Espiritu ug mag-andam sa pagsunod niini. Ang imong nag-unang kinaiya mao ang pagpakabana. Pagpakabana sa imong espirituhanong pagkatawo ug sa imong higala. Pagpakabana sa imong ehemplo ug impluwensya sa imong higala. Pagpakabana sa impluwensya sa imong higala kanimo. Ug samtang ikaw adunay hugot nga pagtuo sa mahigugmaong pag-atiman sa Langitnong Amahan, ikaw makakita sa mga tubag nga imong gipangita.