Hangtud sa Sunod Natong Panagkita
Ang Tinuod nga Gugma
Gikan sa “Ang Dakong Sugo,” Liahona, Nob. 2007, 28–29.
Ang gugma naggiya kanato ngadto sa himaya ug kahamili sa kinabuhi nga dayon.
Ang gugma mao ang sinugdanan, ang tunga-tunga, ug ang katapusan sa dalan sa pagkadisipulo. Kini makahupay, makatambag, makaayo, ug makalipay. Kini naggiya kanato sa walog sa kangitngit ug agi sa tabil sa kamatayon. Sa katapusan, ang gugma naggiya kanato ngadto sa himaya ug kahamili sa kinabuhing dayon.
Alang kanako, si Propeta Joseph Smith kanunay nga mipakita sa tiunay nga gugma ni Kristo. Daghan ang nangutana nganong daghan siya og mga sumusunod ug nakahimo kanila nga nagpabiling naghiusa. Iyang tubag: “Tungod kay ako adunay baruganan sa gugma.”1
Ang istorya gisaysay sa usa ka 14 anyos nga batan-ong lalaki kinsa miadto sa Nauvoo aron sa pagpangita sa iyang igsoong lalaki kinsa nagpuyo duol didto. Ang batan-on miabut panahon sa tingtugnaw nga walay salapi ug mga higala. Sa dihang siya nangutana kabahin sa iyang igsoon, ang batang lalaki gidala ngadto sa usa ka dakong balay nga mora og hotel. Didto iyang nahimamat ang usa ka tawo kinsa miingon, “Sulod, anak, atimanon ka namo.”
Ang batan-ong lalaki midawat ug gidala ngadto sa balay, diin siya gipakaon, gipabati nga komportable, ug gihatagan og katulgan.
Pagkasunod adlaw tugnaw kaayo, apan bisan pa niana, ang batang lalaki andam nga molakaw og walo ka milya ngadto sa gipuy-an sa iyang igsoon.
Sa dihang ang tawo sa balay nakakita niini, siya misulti sa batan-ong lalaki nga magpabilin og kadiyot. Siya miingon nga adunay mga kabayo nga moabut sa dili madugay nga iyang kasakyan.
Sa dihang ang batang lalaki wala mosugot, nag-ingon nga siya walay kwarta, ang tawo misulti kaniya nga dili mabalaka kabahin niana, nga sila ra ang mag-igo kaniya.
Sa wala madugay ang batang lalaki nasayud nga ang tawo sa balay walay lain kon dili si Joseph Smith, ang Mormon nga propeta. Kini nga batang lalaki nakahinumdom niini nga buhat sa gugmang putli sa tibuok niyang kinabuhi.2
Sa usa ka mensahe sa Mormon Tabernacle Choir sa Music and the Spoken Word, usa ka istorya ang gisaysay kabahin sa tigulang nga lalaki ug babaye kinsa naminyo sulod sa daghang dekada. Tungod ang asawa hinay-hinayng nagkahanap ang panan-aw, dili na niya maatiman ang iyang kaugalingon sa samang paagi nga iyang gibuhat sa daghang katuigan. Bisan wala sugoa, ang bana nagsugod sa pagmanikyur sa mga kuko sa iyang asawa.
Litrato pinaagi sa Jupiterimages/liquidlibrary/Thinkstock
“Nasayud siya nga ang iyang asawa makakita sa iyang mga kuko kon iyang ipaduol sa iyang mga mata, sa saktong anggulo, ug kini makapahiyom kaniya. Ganahan siya nga makakita sa iyang asawa nga malipayon, mao nga iyang gimanikyuran ang kuko sa iyang asawa sobra sa lima ka tuig sa wala pa siya mamatay.”3
Kana ehemplo sa tiunay nga gugma ni Kristo. Usahay ang labing dako nga gugma dili makita sa kulbahinam nga talan-awon nga gisulat sa mga magbabalak ug mga magsusulat. Sa kasagaran, ang labing mahinungdanon nga mga pagpakita sa gugma mao ang yano nga mga buhat sa pagkamabination ug pag-amuma nga atong ipabati niadtong atong mahimamat subay sa dalan sa kinabuhi.
Ang tinuod nga gugma molungtad hangtud sa kahangturan. Kini mahangturong mapailubon ug mapasayloon. Kini nagtuo, naglaum, ug molahutay sa tanan nga mga butang. Kana mao ang gugma nga gihatag sa atong Langitnong Amahan alang kanato.