Mga Pangutana ug mga Tubag
“Ako nawad-an og usa ka suod nga higala bag-ohay lang. Unsaon nako pagdala ang kasubo?”
Ang kamatayon sa usa ka higala mao ang usa sa labing lisud nga mga pagsulay nga imong atubangon. Ang pagkamasulub-on usa ka normal nga pagbati human sa maong pagkawala. Mobati ka og kaguol tungod kay gimahal nimo ang imong higala. “Kamo magpuyo nga maghiusa sa gugma, sa ingon nga kamo magbakho tungod sa pagkawala kanila nga namatay.” (D&P 42:45).
Pipila sa mga malisud nga mga pagbati nga moabut atol sa proseso sa kasubo naglakip sa kaguol, kasuko, kawalay paglaum, kakapoy, pagkawala sa interes sa mga kalihokan, ug ang pagbati nga nabug-atan. Apan sa samang higayon, ang mga tawo nga nagbangutan sa kasagaran mobati og kalinaw samtang sila magtinguha sa Ginoo ug magpaduol ngadto Kaniya; sila modawat sa Iyang saad: “Bulahan silang tanan nga nagbangutan, kay sila pagahupayon” (3 Nephi 12:4). Ang kasubo masakit, apan kini usab mamaayo.
Samtang ikaw manglimbasug sa imong mga pagbati, paningkamuti ang pagtutok sa positibo. Mahala ang imong nindot nga mga panumduman uban sa imong mga higala. Pag-ampo nga mobati og kalinaw ug kahupayan sa Manluluwas. Pangita og paglaum diha sa gugma, kabuotan, ug plano sa kaluwasan sa Langitnong Amahan.
Ang pagbati sa kasubo wala magpasabut nga ikaw walay hugot nga pagtuo. Si Presidente Thomas S. Monson namulong sa kinatibuk-ang komperensya mahitungod sa pagkamatay sa iyang asawa. Siya miingon, “Ang pagsulti nga gimingaw ko niya dili makahupay sa akong pagbati.” Dayon naghisgot siya sa mga pagsulay ug mitapos: “Nasayud kita nga adunay panahon nga masinati nato ang tumang kasubo, nga kita magbangutan, ug masulayan asa kita kutob. Apan, kanang mga kalisdanan makausab nato sa mas maayo, makausab sa atong kinabuhi sa paagi nga gitudlo sa Langitnong Amahan nato” (“Ikaw Dili Ko Kawangon, ni Biyaan Ko Ikaw,” Liahona, Nob. 2013, 85, 87).
Sa unsang paagi nga ang kamatayon sa inyong higala makadasig ninyo sa pagbuhat og mas maayo?
Maghiusa sa Kasubo ug Hugot nga Pagtuo
Ang pagmasulub-on dili dautan nga butang. (Mahimo kining dili maayo, kon kamo kanunay nga maguol.) Ang paghiusa sa kasubo ug hugot nga pagtuo mao ang labing maayong paagi sa pag-adjust sa mga kalisud nga mawad-an sa usa ka minahal. Hunahunaa ang inyong higala karon, sa kalibutan sa espiritu, ug unsay gibuhat sa inyong higala. Siya nahigugma kaninyo ug gusto nga kamo magmalipayon. Ang pagkat-on mahitungod sa kalibutan sa espiritu makadugang sa inyong pagsabut sa plano sa kaluwasan ug makahatag og kalinaw, paglaum, ug hugot nga pagtuo. Ayaw kalimot sa pag-ampo sa Langitnong Amahan alang sa panabang. Ang Langitnong Amahan ug ang Iyang Anak, nga si Jesukristo, nasayud gayud kon unsay inyong gibati ug motabang ninyo kon kamo sinserong manghangyo.
Mary G., edad 14, Virginia, USA
Ang Dios Nahigugma sa Inyong Higala
Bisan tuod lisud alang ninyo ang pag-atubang sa kasubo, ang plano sa atong Langitnong Amahan sa kaluwasan makahupay ninyo pinaagi sa Espiritu Santo nga sa umaabut inyong mahimamat ang inyong mga higala pag-usab. Ug hinumdumi nga ang kinabuhi dinhi sa yuta mubo ra kaayo alang nato nga masulayan ug matestingan. Ang atong Langitnong Amahan nag-andam og dapit alang sa inyong higala. Ang Dios nahigugma sa Iyang mga anak.
Marvin S., edad 16, Metro Manila, Philippines
Pagmalipayon alang sa Inyong Higala
Sa higayon nga ako mawad-an sa mga tawo nga akong gimahal, akong paningkamutan nga mahinumdom nga ang atong Langitnong Amahan adunay plano alang kanila ug nga makita nako sila pag-usab. Magmalipayon kita alang nila tungod kay sila dili na kinahanglan nga mag-antus sa mga kasakit niining mortal nga kinabuhi. Sakit nga wala na sila sa pisikal, apan kita mahimong magpaabut nga makauban sila pag-usab.
Ariadna T., edad 19, Mexico City, Mexico
Pangita og Tabang diha sa mga Kasulatan
Usa ka maayo nakong higala bag-ohay lang nga namatay sa usa ka makalilisang nga aksidente sa sakyanan. Akong nakaplagan ang kahupayan pinaagi sa pagduol ngadto kang Kristo. Kinahanglan akong makabaton og pagpamatuod sa gugma ni Kristo alang sa matag usa kanato; kinahanglan kong makasabut kinsa kita isip mga anak sa Dios; ug labing importante nga ako kinahanglan nga makasabut sa plano ug kabubut-on sa Dios alang sa Iyang mga anak. Samtang ako miduol ngadto Kaniya pinaagi sa mga kasulatan, sa simbahan, ug sa mga materyal sa Simbahan, ako nakaangkon niana nga pagpamatuod ug mibati sa kalinaw ug kahupayan. Mas nakatabang ang leksyon sa kabatan-onan nga giulohan og “Unsaon nako pagkakita og kahupayan kon ang usa ka tawo nga akong gimahal mamatay?” Ang tanan nga mga kasulatan, mga artikulo, ug mga video nga gibasihan niini nga leksyon talagsaon ug nakapausab sa akong kinabuhi.
Madilin N., edad 18, Iowa, USA