2015
Kanunay Adunay Panahon sa Pag-ampo
Pebrero 2015


Kanunay Adunay Panahon sa Pag-ampo

Ang tagsulat nagpuyo sa Bavaria, Germany.

Lisud kaayo ang pag-eskwela. Moarang-arang ba kini?

“Mag-ampo ko matag adlaw. Moistorya sa Amahan” (“I Pray in Faith,” Children’s Songbook, 14).

“Dali na, Fynn. Manglakaw na ta!” miingon si Johan.

Ang igsoong lalaki ni Fynn, si Johan, naghulat nga wala nay pasensya diha sa atubangang pultahan. Dili siya gusto nga maulahi sa eskwelahan.

Si Fynn nagmug-ot. Dili siya gustong moeskwela. Bag-o lang mibalhin ang iyang pamilya sa bag-ong balay. Kini ang iyang unang tuig sa eskwelahan, ug wala pa siyay higala sa eskwelahan. Gimingaw siya sa iyang naandang mga higala.

“Nahadlok ko!” miingon si Fynn, nagdagan padulong sa iyang inahan. “Nganong kinahanglan ko nga moeskwela?”

Ang inahan ni Fynn migakos niya. “Mahimong OK ra kini. Mag-ampo ta,” miingon siya. “Kanunay adunay panahon sa pag-ampo.”

Sila miluhod ug mihangyo sa Langitnong Amahan sa pagtabang ni Fynn. Dayon si Fynn ug ang iyang igsoon nga lalaki miadto sa eskwelahan. Ang adlaw miarang-arang.

Kada buntag human niadto, si Fynn moluhod ug mag-ampo nga naghangyo sa Langitnong Amahan og panabang.

Hinay-hinay, ang mga panghitabo miarang-arang. Si Fynn aduna nay higala, ug dili na siya mahadlok. Sa wala madugay, si Fynn ganahan na nga moeskwela.

Usa ka adlaw si Fynn ug ang iyang igsoon nga lalaki naglakaw padulong sa eskwelahan, ug si Fynn malipayon. Iyang namatikdan nga ang adlaw misanag. Siya naghunahuna sa tanang makalingaw nga butang nga iyang nakat-unan. Kalit lang, mihunong siya.

“Aduna koy nakalimtan!” miingon siya kang Johan. Si Fynn midagan pabalik sa ilang balay.

Ang iyang inahan nabalaka sa dihang midagan siya pasulod.

“Unsay problema?” nangutana siya.

“Nakalimot ko sa pag-ampo!” miingon si Fynn. Miluhod siya. Gusto niya nga magpasalamat sa Langitnong Amahan sa pagtabang kaniya.

Pagkahuman sa iyang pag-ampo, iyang gigakos ang iyang mama. “Kanunay adunay panahon sa pag-ampo!” miingon siya.

Si Fynn mipahiyom. Mipahiyom ang iyang mama. Samtang nagdagan si Fynn aron makaabut sa iyang igsoon, naghunahuna siya nga tingali ang Langitnong Amahan nagpahiyom usab.