Mensahe sa Visiting Teaching
Mga Kinaiya ni Jesukristo: Walay Sala
Mainampoong tun-i kini nga materyal ug tinguhaa nga masayud unsa ang angay nga ipakigbahin. Sa unsang paagi nga ang pagsabut sa kinabuhi ug ang tahas sa Manluluwas makapalambo sa inyong pagtuo diha Kaniya ug mopanalangin niadtong inyong giamuma pinaagi sa visiting teaching? Alang sa dugang nga impormasyon, adto sa reliefsociety.lds.org.
Hugot nga Pagtuo, Pamilya, Kahupayan
Ang atong Manluluwas, si Jesukristo, mao lang ang makahimo sa pag-ula para sa katawhan. “Si Jesukristo, ang Kordero nga walay lama, andam nga mihalad sa Iyang kaugalingon sa altar sa sakripisyo ug mibayad sa bugti sa atong mga sala,” miingon si Presidente Dieter F. Uchtdorf, Ikaduhang Magtatambag sa Unang Kapangulohan.1 Ang pagsabut nga si Jesukristo walay sala makatabang kanato sa pagpalambo sa atong hugot nga pagtuo diha Kaniya ug maningkamot sa pagsunod sa Iyang mga sugo, paghinulsol, ug mahimong putli.
“Si Jesus … nilalang sa unod ug espiritu, apan wala Siya magpadala ngadto sa pagtintal (tan-awa sa Mosiah 15:5),” miingon si Elder D. Todd Christofferson sa Korum sa Napulog Duha ka mga Apostoles. “Makapangayo kita og tabang Kaniya … tungod kay Siya makasabut. Siya makasabut sa pakigbisog, ug Siya usab makasabut kon unsaon nato pagkamadaugon sa pakigbisug. …
“… Ang gahum sa Iyang Pag-ula makapapas sa mga epekto sa sala ngari kanato. Kon maghinulsol kita, ang Iyang maulaong grasya makapasaylo kanato ug makalimpyo kanato (tan-awa sa 3 Nephi 27:16–20). Sama ra kini nga wala kita makasala, nga daw wala kita magpabuntog ngadto sa pagtintal.
“Samtang maningkamot kita sa matag adlaw ug sa matag semana sa pagsunod sa ehemplo ni Kristo, ang atong espiritu magpatigbabaw sa iyang kahalangdon, ang pakigbisog diha sa atong kaugalingon mismo magkahinay, ug ang mga pagtintal mohunong sa paghasol.”2
Dugang nga mga Kasulatan
Gikan sa mga Kasulatan
Gibayaran sa Manluluwas ang bugti sa atong mga sala pinaagi sa Iyang balaanon nga Pagkaanak, Iyang walay sala nga kinabuhi, Iyang pag-antus ug sa pagpaagas sa Iyang dugo diha sa Tanaman sa Getsemani, Iyang kamatayon diha sa krus ug sa Iyang Pagkabanhaw gikan sa lubnganan. Pinaagi sa Pag-ula ni Jesukristo, kita mamahimong limpyo pag-usab kon kita maghinulsol sa atong mga sala.
Si Haring Benjamin mitudlo sa iyang katawhan kabahin sa Pag-ula ni Jesukristo ug dayon nangutana kon sila mituo ba sa iyang mga pulong. “Silang tanan misinggit sa usa ka tingog, nag-ingon: … ang Espiritu … nakahimo og dako nga kausaban dinhi kanamo, o dinhi sa among mga kasingkasing, nga kami wala nay hilig sa pagbuhat og dautan, apan sa pagbuhat og maayo sa kanunay. …
“Ug kami mauyunon sa pagsulod ngadto sa usa ka pakigsaad uban sa atong Dios sa pagbuhat sa iyang kabubut-on, ug magmasulundon sa iyang mga sugo diha sa tanan nga mga butang” (Mosiah 5:1–2, 5).
Kita usab mahimong makabaton og “dakong kausaban” sama sa mga katawhan ni Haring Benjamin, kinsa “wala nay hilig sa pagbuhat og dautan, apan sa pagbuhat og maayo sa kanunay” (Mosiah 5:2).