Ko e Ongo Konga Fakatouʻosi ʻo e Tāpuakí
ʻOku fakatou mahuʻinga ʻa e ʻalu ki he temipalé mo e hisitōlia fakafāmilí; ko e taimi ʻoku fakatahaʻi aí, ʻokú na ʻomi ha ngaahi tāpuaki lahi ange.
Ko e taimi te ke huke ai ʻa e ngaahi peesi ʻo e Liahoná he māhina ní, kumi ʻa e ngaahi lanu kehekehe kuo tuifio ko ē ʻoku nau ʻai ke fakaʻofoʻofa ʻa e fakatātaá, tāvalivalí, pe ʻīmisí takitahá. Ko e lahi ʻo e ngaahi lanú naʻe lava ʻo maʻu koeʻuhí he naʻe huʻi ha lanu ʻe ua ʻo e ngaahi tefitoʻi lanú—ʻa e kulokulá, engeengá, pe lanu puluú—ʻo fakatahaʻi ke faʻu ha lanu foʻou, ʻa ia he ʻikai ke lava ʻo maʻu kapau ʻe kei fakamavahevaheʻi pē ʻa e ngaahi tefitoʻi lanú.
ʻOku faitatau pehē ʻa e hisitōlia fakafāmilí mo e ngāue fakatemipalé mo e ngaahi lanu ko iá: te ke lava ʻo maʻu ha ngaahi tāpuaki lahi ange ʻaki hano fakatahaʻi ʻa e ongo ngāue mahuʻingá ni ʻe ua. ʻOku ʻuhinga ia he ko e hisitōlia fakafāmilí mo e ngāue fakatemipalé ko ha ongo konga ʻo e ngāue pē taha—ko e ngāue ʻo e fakamoʻuí. Te ke kei lava pē ʻo maʻu ha ngaahi tāpuaki maʻongoʻonga ʻi haʻo tokoni ki ha niʻihi ʻi heʻenau hisitōlia fakafāmilí mo ʻalu ki he temipalé ke fai e ngāue maʻá e kakai ʻoku ʻoatu honau hingoá ʻi aí. Ka ʻokú ke maʻu ha ngaahi tāpuaki maʻongoʻonga ange—maʻu kakato ʻa e ngaahi lanú—ʻi he taimi ʻokú ke fakatahaʻi ai ʻa e ongo kongá e ua mo kumi e ngaahi hingoa ho [fāmili] tonú mo fakahoko e ngāue maʻa hoʻo ngaahi kuí ʻi he temipalé.
Hangē ko ia kuo akoʻi ʻe ʻEletā Lisiate G. Sikoti ʻo e Kōlomu ʻo e Kau ʻAposetolo ʻe Toko Hongofulu Mā Uá:
“Ko e ngāue fakatemipalé mo e hisitōlia fakafāmilí ko ha ngāue pē ia ʻe taha ka ʻoku konga ua. …
“ʻOku finangalo e Tamai Hēvaní ke tau maʻu ongo konga fakatouʻosi e tāpuaki ʻo e ngāue fakafofonga mahuʻinga ko ʻení. Kuó Ne tataki ha niʻihi kehe ke fakahaaʻi mai kiate kitautolu e founga ke tau feʻunga aí. Ko hota fatongiá ke maʻu e ngaahi tāpuaki ko iá.
“Ko ha taimi ʻaonga moʻoni haʻo fai ha ngāue ʻi he temipalé, ka ʻi hono fai ko ia e ngaahi ouau fakafofongá ki ha taha hoʻo ngaahi kuí, ʻe toe toputapu ange ai e taimi ʻi he temipalé mo ke maʻu ha ngaahi tāpuaki lahi ange.1
Ko e hā leva ha niʻihi ʻo e ngaahi “tāpuaki lahi ange” ʻoku maʻu ʻi he taimi ʻoku tau maʻu “fakatouʻosi ai ʻa e ongo konga ʻo e tāpuakí”? ʻOku ʻi he tafaʻaki toʻomataʻú ha niʻihi ʻo e ngaahi talaʻofa mei he kau ʻAposetolo ʻo onopōní.
Ko ha Ivi Tākiekina Fakalaumālie Lelei
“[ʻOku ʻi ai ha ivi tākiekina ʻoku ueʻi fakalaumālie ʻi he kāingalotu ʻoku nau fakahoko ʻa e ngāue ʻo e hisitōlia fakafāmilí. ʻOku mahino kiate kinautolu ʻoku nau nonoʻo fakataha honau fāmilí. … Ko e taimi ʻoku tau fakatotoloʻi ai hotau lainé ʻoku ʻikai ke tau kei mahuʻingaʻia pē ʻi he ngaahi hingoá ʻataʻatā pē. … ʻOku liliu ʻe he meʻa ʻoku tau mahuʻingaʻia aí ʻa hotau lotó ki heʻetau ngaahi tamaí—ʻoku tau feinga ke maʻu pea mo tokoniʻi kinautolu.]”2
Konga ʻo ha Ngāue Maʻongoʻonga Ange
“Ko e ngaahi fehokotakiʻangá … ʻoku faʻu. … ʻI he taimi ʻoku tafoki ai hotau lotó ki heʻetau ngaahi kuí, ʻoku hoko leva ai ha liliu ʻi hotau lotó. ʻOku tau ongoʻi ko e konga kitautolu ʻo ha meʻa ʻoku maʻongoʻonga ange.”3
Ko ha Maluʻi mei he Fakatauelé
ʻOku tau monūʻia takitaha koeʻuhí ko kinautolu kuo muʻomuʻa atú. ʻOku tokoni ʻa hono ako e ngaahi talanoá ke mahino lelei ko hai kitautolu pea ko ʻetau haʻú mei fē. ʻOkú ke fakatotolo ki ho fāmilí mo tokoniʻi e niʻihi kehé ʻi heʻenau fakatotoló? Ko e taha ia ʻo e ngaahi maluʻi lelei taha ki ha taha kei talavou, ʻi he māmani angahalaʻiá ni ʻoku tau moʻui aí, mei he ngaahi fakatauele ʻa e filí.4
Tokoni mei he Māmani Taʻe-hā Mai
“[Mahalo kapau te tau fakahoko ʻetau ngāue maʻanautolu ʻi he maama tataliʻanga ʻo e ngaahi laumālié ʻoku fiekaia mo lotua e ngāue te tau lava ʻo fakahoko maʻanautolú, ʻe tokoni mai ʻa e maama tataliʻanga ʻo e ngaahi laumālié kiate kitautolu ʻi he ʻaho ko ʻeni ʻo ʻetau fie maʻu vivilí. ʻOku tokolahi ange ʻa e kakai ʻi he maama ko iá ʻiate kinautolu ʻoku ʻi hení. ʻOku lahi ange mālohi mo e ivi ʻi aí ʻi he meʻa ʻoku tau maʻu ʻi heni ʻi māmaní.]”5
Ko e Hā Te Ke Faí?
Ko e hā te ke fai ke “maʻu ai e ngaahi tāpuaki ko ia” ʻo e kumi e ngaahi hingoa fakafāmilí mo ʻave kinautolu ki he temipalé? Fokotuʻu ha palani he ʻahó ni ke ʻomi e ngaahi talaʻofa ʻo e maʻu e ongo konga fakatouʻosi e tāpuakí ʻi hoʻo moʻuí.
Tā fakatātaaʻi ʻo e ʻatá Welden C. Andersen mo Steve Tregeagle; tā valivali ʻo John A. Widtsoe naʻe fai ʻe R. E. Bird