Haʻu kia Kalaisi
Kau Talavou ʻo e Lakanga Taulaʻeiki Faka-ʻĒloné, ʻe ueʻi kimoutolu ʻe he taumuʻa ʻo e Mutualé he taʻu ní ke mou fakakaukau ki hoʻomou fetuʻutaki mo Sīsū Kalaisí, ko hotau Fakamoʻui mo e Huhuʻí, mo e founga te mou lava ai ke hoko ʻo tatau mo Iá. Ko ʻetau taumuʻá “Haʻu kia Kalaisi, pea hoko ʻo haohaoa ʻiate ia, pea fakafisi ʻa kimoutolu mei he anga taʻe-māʻoniʻoni kotoa pē” (Molonai 10:32).
Ko ha fakaafe toputapu ʻeni ke ʻunu ke ofi ki he ʻAlo ʻo e ʻOtuá. Te tau lava ʻi Heʻene Fakaleleí ke maʻu ha mālohi ke ngāue, ke tau fakafisi mei he ngaahi anga taʻe-māʻoniʻoni kotoa ʻi heʻetau moʻuí, mo ongoʻi ʻEne ʻofa taʻe-fakangatangatá. ʻI heʻetau fai iá, te tau maʻu ʻa e nonga pea mo e fiefia moʻoní.
ʻI hoʻo tali e fakaafe ke haʻu kia Kalaisí, ʻe mahino leva kiate koe ho fatongia toputapu ke “fakaafeʻi ʻa e kakai kotoa pē ke haʻu kia Kalaisí” (T&F 20:59). ʻE fakafonu homou lotó ʻaki ha holi ke taki ha niʻihi kehe kiate Ia koeʻuhí ke nau lava ʻo maʻu ʻa e ngaahi tāpuaki tatau ʻokú ke maʻú mo hokohoko atu hono maʻu iá.
Naʻe fakahoko ʻe ha talavou ʻe taha ko Maikolo, hono fatongiá ʻaki haʻane tokoniʻi ʻa Hōsea, ko hano kaungāmeʻa ʻi he akó.
Naʻe ʻeke ange ʻe Hōsea ʻi ha ʻaho ʻe taha, “Maikolo, ko e hā ʻokú ke fiefia maʻu ai peé?”
Ne talaange ʻe Maikolo, “Ko hono ʻuhingá he ʻoku ou tokoni.”
“Ko e hā ʻokú ke tokoni aí?”
Hoko mai e talí, “Koeʻuhí he ʻoku ou maʻu ʻa e lakanga fakataulaʻeikí pea ko hoku fatongia.”
Talaange ʻe Hōsea, “ʻOku ou fie ʻilo lahi ki he lakanga fakataulaʻeikí.”
Naʻe fakaafeʻi ʻe Maikolo ʻa Hōsea ki he ngaahi ʻekitivitī ʻa e Siasí pea kimui ange ki he ngaahi houalotu ʻa e Siasí. Naʻe fāifai pea akoʻi ʻa Hōsea mo hono fāmilí ʻe he ongo faifekaú pea nau papitaiso. Naʻe pehē ʻe Hōsea, “Ko e ngāue fakafaifekaú ko e fakavaʻe ia ʻo homau Siasí. Kapau pē te mau faitotonu mo māʻoniʻoni ʻi heʻemau ngaahi tōʻonga fakaʻahó, ʻe fakatokangaʻi ʻe kinautolu ʻoku mau feohí mo ʻeke mai kiate kimautolu ʻo hangē ko ia ne u faí. ʻOku hoko ʻa Maikolo ko e meʻangāue ʻi he palani maʻongoʻonga ʻa e ʻOtuá.”
ʻI hoʻo ʻunu ʻo ofi ki he ʻEikí, te ke maʻu ha holi ke tokoni ki he niʻihi kehé ʻo hangē ko ia naʻe fai ʻe Maikoló. Pea ʻi hoʻo fai iá, te ke ʻilo ʻoku moʻoni e palōmesi ko ʻeni mei a Palesiteni Henelī B. ʻAealingi ʻi he Kau Palesitenisī ʻUluakí: “ʻI hoʻo fai ho lelei tahá ke fakaafeʻi ʻa e kakaí ke haʻu kia Kalaisí, ʻe liliu ai ho lotó. Te ke fai ʻa ʻEne ngāué. Te ke ʻiloʻi ʻokú Ne tauhi ʻa ʻEne talaʻofa ke taha mo koe ʻi hoʻo ngāué. Te ke ʻiloʻi Ia. Pea ʻe hokosia e taimi te ke hoko ai ʻo hangē pē ko Iá pea “hoko ʻo haohaoa ʻiate Ia.’”2
Ko e ʻelito ʻeni ʻo e taumuʻa ʻo e taʻu ní.