Ko e Fononga ʻa Mamā Sefi ki he Temipalé
Peti Venisula, ʻIutā, USA
Lolotonga ʻeku ʻi he ʻōfisi ʻo e Misiona Mekisikoú ʻi ha ʻaho ʻe taha he taʻu 1940 tupú, ne aʻu ange ha sisitā mei he kiʻi kolo ko ʻOsumá, ʻoku tuʻu he tafaʻaki ki lalo Popokatepé, ko ha moʻunga afi ʻoku kei vela ʻoku meimei maile nai ʻe 43 (kilomita ʻe 70) ki he fakatonga hahake ʻo Mekisikou Sití. Naʻa mau ʻiloʻi kotoa ia. Ko hono hingoá ko Mamā Sefi.
Naʻe nofo ʻa e ongo faifekaú ʻi hono kiʻi fale simá, ʻa ia naʻá ne teuteuʻi maʻu ai pē ha loki maʻa kinaua. Naʻe maʻu e moʻui ʻa Mamā Sefí, naʻe ʻikai aʻu ʻo fute ʻe nima (mita ʻe 1.5) hono maʻolungá, ʻaki ʻene fakatau fuaʻi ʻakau ʻi he ngaahi māketi e ngaahi kolo takatakai ʻi ʻOsumá. Ko e kolo kotoa pē naʻe kehe hono ʻaho māketí, pea naʻe alu ki he ngaahi māketí takitaha ke fakatau ʻene fuaʻi ʻakaú.
Naʻe hū mai ki he ʻōfisi misioná he ʻaho ko iá ʻokú ne toʻo ha fuʻu tangai mahoaʻa lahi. Naʻe fonu ʻi he tostones, ko e ngaahi paʻanga siliva naʻá ne tānaki mai ʻi he ngaahi taʻú. Ko ha niʻihi ʻo e ngaahi konga paʻangá ko e haʻu mei he ngaahi ʻaho ʻo Potifiliō Taiasí, ʻa ē naʻá ne puleʻi ʻa Mekisikou mei he 1884 ki he 1911. Ko e fononga pasi mai ʻeni ʻa Mamā Sefi mei ʻOsuma ki he ʻapi fakamisioná mo ʻene tangai paʻangá. Naʻá ne fakahā ki he Palesiteni Fakamisioná ko e taʻu lahi ʻeni ʻene tānaki koʻeuhí ke lava ʻo ʻalu ki he Temipale Sōlekí ke maʻu hono ʻenitaumení.
Naʻá ne maʻu ha ngofua ke mavahe mei he fonuá, foaki ange ʻe ha faifekau ha katoleta, pea mau ʻave leva ia ki he lēlué. Naʻe telefoni ʻa Palesiteni Piesi ki ha taha ʻi ʻEla Paso ʻi Tekisisi, ke fakafetaulaki ki he lēlué ʻi ha tafaʻaki ʻe taha ʻo e kauʻāfonua ʻo ʻAmeliká pea fakaheka ʻa Mamā Sefi ʻi ha pasi ki Sōleki Siti. Naʻe tonu ke fakafetaulaki ʻa e kāingalotu ʻo e kolo lea faka-Sipeini ʻi Sōleki Sití ki he pasí, pea tokangaʻi ʻene ngaahi fie maʻu ki he nofoʻangá, mo tokoniʻi ia ʻi he temipalé.
ʻOsi ha ngaahi uike siʻi mei ai, kuo foki ʻa Mamā Sefi ki Mekisikou Siti pea ki ʻOsuma. Kuó ne lavaʻi lelei ʻa e fononga lōloá. Naʻe toe hoko atu leva ʻene fakatau ʻo e fuaʻi ʻakaú ʻi he ngaahi fakatauʻangá.
Naʻe ʻikai ke lea faka-Pilitānia ʻa Mamā Sefi, pea mau ʻeke ange pe naʻe anga fēfē ʻene fakahā ʻene meʻakaí ʻi he lolotonga ʻo ʻene fononga he pasí mei ʻEla Paso ki Sōleki Sití—ko ha fononga lau-ʻaho. Talamai ʻe ia naʻe akoʻi ia ʻe ha taha ki he anga ʻo e puʻaki e “pai ʻāpelé” ʻi he lea faka-Pilitāniá, pea ko e taimi kotoa pē naʻe tuʻu ai ʻa e pasí ke fai e maʻumeʻatokoní, naʻá ne talaange ko e pai ʻāpele.
Koeʻuhí ko e ngaahi foʻi lea pē ia naʻá ne ʻilo he lea faka-Pilitāniá, naʻe moʻui ai pē ʻi he pai ʻāpelé he lolotonga ʻene fononga pasi he ngaahi siteití—ʻi he ʻalu atú mo e foki maí. Ka naʻe ʻikai tokanga ki ai ʻa Mamā Sefi ia. Naʻe foki houngaʻia pea mo fofonga malimali mei heʻene aʻusia ʻi he temipalé.