ʻOku Fakaafeʻi Koe
Ko hai ʻoku ʻikai saiʻia ia ke ne maʻu ha tohi fakaafe? Ko e taimi ʻoku tau maʻu ha fakaafe ki ha fakafiefia ʻo ha ʻaho fāʻeleʻi pe malí, ʻoku tau ongoʻi fiefia ke tau lava ʻo fakafiefiaʻi fakataha mo ha niʻihi kehe ʻa e ngaahi meʻa mahuʻinga ʻoku hoko ʻi heʻenau moʻuí. ʻOku toe ʻi he kaveinga ʻo e Mutualé he 2014 ha fakaafe fiefia ʻoku taʻengata hono mahuʻingá: “Haʻu kia Kalaisi, pea fakafisi ʻa kimoutolu mei he ngaahi anga taʻe-māʻoniʻoni kotoa pē” (Molonai 10:32).
ʻOku fie maʻu ʻe ha ngaahi tohi fakaafe lahi ha tali—ha RSVP—ke fakahaaʻi pe ʻoku tau tali e fakaafé pe ʻikai. Kuó ke tali nai ki he fakaafe ko ʻení ʻi hoʻo moʻuí? ʻOku ʻuhinga ʻa e haʻu kia Kalaisí ʻoku tau tauhi ʻa e fuakava toputapu ne tau fai ʻi he papitaisó. ʻOku ʻuhinga ia kuo tau tali ʻa Sīsū Kalaisi ko hotau Fakamoʻui mo e Huhuʻi fakafoʻituitui. ʻOku ʻuhinga ia ʻoku tau tali mo tui ki he meʻa naʻe akoʻi ʻe ʻAlamā ki hono foha ko Sipiloní: “ʻOku ʻikai mo ha toe hala kehe pe founga ʻe lava ai ʻo fakamoʻui ʻa e tangatá, kae ngata pea founga pē ʻia Kalaisi” (ʻAlamā 38:9). ʻOku ʻuhinga hono tali ʻení kuo tau tukupā ke muimui ʻi he sīpinga haohaoa ʻa Kalaisí ʻaki ʻetau angamaʻa mo māʻoniʻoni pea ʻofa mo tokoni ki he niʻihi kehé.
Ko e fakaafé ni ʻoku ʻikai ko ha meʻa ʻoku fakahoko tuʻo taha pē ʻi he moʻuí; ko ha ngāue hokohoko ia. Kuo fakaafeʻi kitautolu ke tau muimui ʻi ha hala te ne taki kitautolu ki he temipalé, ʻa ia ʻoku tau fakahoko ai ha ngaahi fuakava kehe mo ʻetau Tamai ʻi he Langí mo kau ʻi he ngaahi ouau mahuʻinga ki hotau hakeakiʻí. ʻE lava ke kau ʻi he hala ko ʻení ʻa e ngāue fakafaifekaú. ʻE kau ai ʻa e mali temipalé mo e hoko ko e kakai tangata mo e kakai fefine māʻoniʻoni ʻi he puleʻanga ʻo e ʻOtuá. ʻOku toe ʻuhinga ia ke kātaki ki he ngataʻangá. Hangē ko hono fakalea ʻe he fakaafé, ko e taimi ʻoku tau haʻu ai kia Kalaisí, ʻe lava ʻo fakahaohaoaʻi kitautolu ʻiate Ia. ʻOku fakafaingofuaʻi ʻe Kalaisi ke tau nofo ʻi he halanga ʻo e fuakava ko ʻení tuʻunga ʻi he tui kiate Iá pea ʻi he fakatomalá. ʻE lava ke kamata he ʻahó ni ʻa e ngāue ke hoko ʻo haohaoá; ʻoku ʻai ia ʻe he Fakalelei ʻa Kalaisí ke malava.
ʻOku kole mai ʻa e fakaafe ko ʻení ke tau fakafisi mei he ngaahi anga taʻe-māʻoniʻoni kotoa—ke tau kehe mei he ngaahi ākenga, tuʻunga moʻui, mo e ngaahi tōʻonga ʻa e māmaní. ʻOku fakaafeʻi kitautolu ke tau “liʻaki ʻa e ngaahi meʻa ʻo e māmaní, pea fekumi ki he ngaahi meʻa … lelei ange” (T&F 25:10). ʻOku mau fakamoʻoni ʻe fakaiku hono tali ʻo e fakaafe ke “haʻu kia Kalaisi pea hoko ʻo haohaoá” ki he fiefia ʻi he moʻuí ni pea mo e moʻui taʻengata ʻi he maama ka haʻú. ʻOku fakaafeʻi kimoutolu ke mou tali he ʻahó ni!