ʻI he Siasí Fakakātoa
Tohoakiʻi mai ‘e he Koniseti ‘i Pueto Likó ha Lauiafe
ʻI he ‘aho 18 ‘o Tīsema 2011, ne kau fakataha ai e kāingalotu ‘o ha siteiki ‘e nima ‘i Pueto Liko ‘i ha koniseti faka-Kilisimasi ne fai ‘i Paseo ti lasi ‘Atesi ‘i he kolo ko Kakuasí. Ne kau ha kāingalotu ‘e meimei toko 85 ‘o e Siasí he faivá, pea ne ‘i ai ha meimei toko 2,500 ‘o e koló.
Senitā Foʻou maʻá e Kakai Lalahi Kei Talavoú, ko e Tolu ‘aki ia ‘i ‘Afilika
ʻI he ‘aho 4 ‘o Nōvema 2011, ne fakahoko ai ‘e he kakai lalahi kei talavou ‘o e Siteiki Soueto ‘Afiliká ‘enau fuofua ‘ekitivitī ‘i he fale foʻou ‘a ia ‘e fakaʻaongaʻi tāfataha pē ko ha senitā maʻá e kakai lalahi kei talavoú.
ʻOku laka hake ‘i ha ngaahi senitā ‘e 140 ‘oku tuʻu ‘i ‘Iulope, pea mo ha niʻihi ‘i he ‘Iunaiteti Siteití. Ko e senitā ‘i Souetó, ko e tolu ‘aki ia ‘i ‘Afilika; ko e ongo senitā ko ‘eé ‘oku tuʻu ia ‘i he Lepāpulika Fakatemokālati ‘o Kongokoó pea mo Simipāpuē.
Fakatupu ‘e he Founga Foʻoú ha Ngaahi Fehuʻi
Ne hoko ha foʻi takainga pepa ko ha kamataʻanga ia ‘o e ‘ekitivitī fakafaifekau ko e “Ngaahi Fehuʻi ki he ‘Otuá” ‘i Nisinī Novakoloti, ‘i Lūsia he ‘aho 9 ‘Okatopa 2011.
ʻI ha ngaahi houa siʻi, ne laka hake ‘i ha kakai ‘e toko 150 ne nau tuʻu ‘i ha tēpile ‘e ua he hala femoʻuekiná, ‘o toʻo ha peni ‘utu, pea hiki ‘enau ngaahi fehuʻí. Ko hono fakakātoá, ne hiki ha fehuʻi ‘e 84 he foʻi takainga pepá. Ne fakahaaʻi ‘e ha kakai toko lahi ha holi ke maʻu ha tali mei he kau faifekau naʻe ‘i aí.