Ne u Ongoʻi ʻOku Totonu Ke u Haʻu
ʻĀlato Fapiō Molaka, Nevata, USA
Hili ha taʻu ʻe ua mo e konga mei hoku papitaiso ʻi Puenosi ʻAealesi ʻi ʻAsenitiná, naʻe kei ongo mai pē e lea ʻa e taha ʻo e ongo faifekau naʻá na akoʻi aú: “ʻOku ou ʻiloʻi ko ha faifekau koe.” Naʻá ku toe manatuʻi foki mo e tali mālohi ne u maʻu ʻi heʻeku lotu ke ʻilo pe ʻoku moʻoni koā e ongo ʻi hoku lotó. Ne u ʻilo ʻoku totonu ke u teuteu ke ngāue fakafaifekau ʻi hoku taʻu 20.
Ka ʻe anga fēfē haʻaku hoko ko ha faifekau? Naʻe ʻikai ke hangē hoku ʻulungāangá ko ha ʻāngeló ʻo hangē ko e ongo talavou naʻá na akoʻi mai e ongoongoleleí kiate aú. Pea ʻe anga fēfē haʻaku liʻaki ʻeku ngāué? Te u nofo ʻi fē ʻi haʻaku foki mai ki ʻapi? Naʻe fuʻu faingataʻa ke maʻu e ʻapi ʻoku ou ʻi aí, neongo ko ha kiʻi loki siʻisiʻi ʻi mui ʻi ha fale ʻo ha taha.
ʻI heʻeku foki ki ʻapi ʻi ha efiafi ʻe taha, naʻá ku toe ongoʻi ʻoku veiveiua ʻeku fakakaukaú. ʻI heʻeku aʻu ki ʻapí ne u feinga ke fai ha fili. Ne u fakakaukau ke tūʻulutui ʻo fai ha lotu ke maʻu ha tokoni. ʻI heʻeku fai iá, ne u ongoʻi mālohi ke ʻalu kia Lianato, ko ha kaungāmeʻa ne hoko ko ha maʻuʻanga ivi lahi kiate au he ngaahi taimi faingataʻá.
Ka naʻe ʻikai ke u loto ke fafangu ia he tuʻapoó. Ne u ʻiloʻi ʻoku ʻā pongipongi ʻo ʻalu ki he ngāué, pea ʻikai ke u loto ke tukituki atu ʻi hono matapaá he taimi ko iá. Ne u fefaʻuhi mo e fakakaukaú ka naʻe ongo mālohi mai pē ke u ʻalu kiate ia. Ka naʻá ku kei fakakaukau ke tuku pē ia.
Naʻá ku fakakaukau ke lue takai ʻi homau feituʻú ke maʻu ha ʻea lelei. Ka ʻi heʻeku manatuʻi ne ʻikai ke u tāpuniʻi e matapaá, ne u toe foki leva ki ʻapi. ʻI heʻeku hū atú ne u sio atu kia Lianato ʻoku tangutu mai ʻi hoku lokí. Ne ongo mālohi mai e Laumālié kiate au, pea ʻikai ke mei hoko ʻeku mānavá. Ne u ʻeke atu ʻi ha leʻo vaivai, “Ko e hā ʻokú ke ʻi heni aí?”
Naʻá ne pehē mai, “ʻOku ʻikai ke u ʻilo. Naʻá ku ongoʻi pē ʻoku tonu ke u haʻu.”
Naʻá ku fakahā ki ai ʻeku veiveiua ke ʻalu ʻo ngāue fakafaifekaú. Naʻá ne fai ʻene fakamoʻoní pea poupouʻi au. Naʻá ne tokoni ke fakafonu ʻeku pepa ngāue fakafaifekaú, peá u ʻave ia ki heʻeku pīsopé he pongipongi hono hokó. Hili ha māhina ʻe ua ne maʻu hoku uiuiʻí ki he Misiona ʻĀsenitina Sālitá.
ʻOku ou ʻilo naʻe hoko hoku kaungāmeʻá ko ha meʻangāue ʻi he toʻukupu ʻo e ʻEikí he pō ko iá, peá u ʻiloʻi moʻoni ʻoku fanongo pea tali mai ʻe he Tamai Hēvaní ʻa e lotu ʻoku fai fakamātoató mo e loto moʻoní.