Fepōtalanoaʻakí
Ko ha ngaahi fokotuʻu ʻeni ki hono fai ʻo e “taimi fepōtalanoaʻaki” ʻi homou fāmilí:
-
Kole ki hoʻo ongo mātuʻá ke tuku mavahe ha ngaahi miniti siʻi he ʻaho takitaha ke fepōtalanoaʻaki fakataha ai homou fāmilí. ʻE lava pē ke fai ia he taimi maʻu meʻatokoní pe ko ha taimi pau ʻi he ʻahó.
-
Fakapapauʻi ʻoku ʻi ai e faingamālie e tokotaha kotoa ke lea mo fanongo. Fakakau mai e tokotaha kotoa!
-
Fakaʻapaʻapaʻi e ngaahi fakakaukau ʻa e kau mēmipa ho fāmilí. Fakapapauʻi ʻoku ongoʻi ʻe he tokotaha kotoa ʻoku mahuʻinga e meʻa ʻokú ne talamaí.
Ngaahi Vaʻinga Fepōtalanoaʻakí
Fie maʻu ha ngaahi fakakaukau ki he taimi fepōtalanoaʻakí? Feinga ke fai e ngaahi vaʻinga ko ʻení:
Lī Tangai Pīní: Kapau ʻoku tokolahi ho fāmilí pe faingataʻa ke ʻiloʻi e taimi ke nau leá, pea fakaʻaongaʻi ha tangai piini ke ʻilo ai pe ko hai ʻe lea he taimi ko iá. Hili e lea ʻa e tokotaha ʻoku ʻi ai e tangai pīní ki he meʻa ʻokú ne tokanga ki aí, lī leva e tangai pīní ki ha memipa ʻe taha ʻo e fāmilí ke ne hoko atu e leá.
Tokotaha fai ʻinitaviu: Vahevahe ki ha ngaahi kulupu ʻo tautau toko ua pea taufetongi ʻi hono ʻai ke hangē ha kau fai ʻinitaviú. Fakakaukauʻi ha ngaahi fehuʻi ki ho hoá pea ʻeke ki ai e ngaahi fehuʻí. Te ke lava pē ke fakaʻaongaʻi ha maika moʻoni pe ko ha meʻa hiki lea ʻi hoʻo ʻinitaviú.
Ko e hā Te ke Faí? Taufetongi ʻi hono ʻeke ki ho fāmilí ha fehuʻi kehekehe ka ʻoku kamata ʻaki ʻa e “Ko e hā te ke faí … ?” Ko e niʻihi ʻeni ʻo ha ngaahi sīpinga “Ko e hā e meʻa te ke faí kapau te ke hē?” mo e “Ko e hā te ke faí kapau te ke lava ke ʻalu ki ha faʻahinga feituʻu pē ʻi he māmaní?”
Tokoni ki he Mātuʻá: Taimi Fakatāutaha
Neongo ʻoku fakafiefia ke talanoa fakafāmili, ka ʻoku toe mahuʻinga pē ki he mātuʻá mo e fānaú ke ʻi ai hanau taimi fakatāutaha. Fakafaingamālieʻi ha taimi ʻi he ʻahó ke talanoa fakatāutaha ai mo hoʻo fānaú. Fakaafeʻi mai ha taha ʻo e fānaú ke tokoni atu kiate koe ʻi hano fakakakato ha ngāue ʻi ʻapi, ʻalu mo koe ʻo fai ha ngāue, pe talanoa mo koe ʻi ha taimi nounou ʻi ho lokí. ʻE lava ke fai ha ngaahi fepōtalanoaʻaki lelei ʻi he kiʻi vahaʻataimi nounou ko iá.