Kae ʻOua Ke Tau Toe Feʻiloaki
Ko e ʻAmanaki Lelei ʻi he Fakaleleí
Mei ha lea ʻi ha fakatahaʻanga fakalaumālieʻi he ʻUnivēsiti Pilikihami ʻIongí ʻi he ʻaho 4 ʻo Nōvema, 2008. Ke maʻu kakato e leá ʻi he lea faka-Pilitāniá, hū ki he speeches.byu.edu.
Kuo pau ke ʻoua naʻa fakatefito ʻa e ʻamanaki leleí ʻi he ʻiló pē mo e fakamoʻoní ka kuo pau ke ʻai e Fakaleleí ke moʻoni ʻi heʻetau moʻui fakatāutahá.
Kuó u fetaulaki mo ha kakai kuo mole kotoa ʻenau ʻamanakí. ʻOku nau ongoʻi naʻe ʻikai taumuʻa e fakatomalá ia maʻanautolu pea he ʻikai pē lava ke fakamolemoleʻi kinautolu. ʻOku ʻikai ke mahino ki he faʻahinga ko ʻení ʻa e ivi fakamaʻa ʻo e Fakaleleí. Pea kapau ʻoku mahino pē kiate kinautolu, ka ʻoku teʻeki hoko ko hanau konga ʻa e ʻuhinga ʻo e faingataʻaʻia ʻa Sīsū Kalaisi ʻi Ketisemaní pea mo e kolosí. Ka ʻi ai ha taha ʻiate kitautolu ʻoku teʻeki ai ke tui ki he mālohi hono fakahaohaoaʻi ʻetau moʻuí ʻokú ne hanga ʻe ia ʻo fakaʻikaiʻi e fuʻu mahuʻinga, mālohi, mo e lahi ʻo ʻEne mamahi maʻatautolú.
ʻI he ngaahi taʻu siʻi kuo hilí, naʻe vahe ai au ke u ʻalu ki ha konifelenisi fakasiteiki pea ke u fai hano ʻinitaviu ʻo ha tangata taʻu 21 ke fakapapauʻi pe ʻoku feʻunga mo taau ke ʻalu ʻo ngāue fakafaifekau. ʻI he taimi ní ʻoku ʻikai ke toe faʻa ʻinitaviu ʻe he kau Taki Māʻolungá ia ʻa e niʻihi ʻoku teu ke ngāue fakafaifekaú. Naʻe kehe ʻeni ia. Lolotonga ʻeku lau e ngaahi fakamatala ki hono puipuituʻá mo e ʻuhinga te u fai ai e ʻinitaviú, naʻá ku fuʻu ongoʻi ha loto ʻofa moʻoni kiate ia. Kuo fakahoko ʻe he tamasiʻí ni ha ngaahi maumau fono mamafa. Naʻá ku fifili pe ko e hā naʻe fie maʻu ai au ke u ʻaʻahi ki ha taha pehē, koeʻuhí he naʻe ʻosi mahino lelei pē he ʻikai ke u tali ke ʻalu ʻo ngāue fakafaifekau.
Hili e fakataha ʻo e konifelenisí he efiafi Tokonakí, ne u ʻalu leva ki he ʻōfisi ʻo e palesiteni fakasiteikí ke fai e ʻinitaviú. Lolotonga ʻeku talitalí, ne hū mai ha talavou matātangata pea toe fotu fakaʻofoʻofa. Naʻá ku ʻiloʻi ʻokú ne fie talanoa mai kiate au pea naʻá ku fakakaukau pe ʻe anga fēfē haʻaku talaange ʻoku ou lolotonga tali ke talanoa mo ha talavou ʻoku fuʻu faingataʻaʻia. Ka naʻá ne fakafeʻiloaki mai ia. Ko e talavou ia naʻá ku tatali ki aí.
ʻI he lōngonoa ʻo e ʻōfisí, naʻá ku ʻeke ange ha foʻi fehuʻi pē ʻe taha: “Ko e hā ʻoku ou ʻinitaviu ai koé?”
Naʻá ne fakamatalaʻi leva hono kuohili. ʻI he ʻosi ʻene fakamatalá naʻe kamata leva ke ne fakamatalaʻi e ngaahi sitepu mo e faingataʻaʻia fakatāutaha kuó ne fouá. Naʻá ne fakamatala kau ki he Fakaleleí—ʻa e mālohi taʻefakangatangata ʻo e Fakaleleí. Naʻe fai ʻene fakamoʻoní pea fakahaaʻi ʻene ʻofa ki he Fakamoʻuí. Peá ne toki pehē mai, “ʻOku ou tui ʻoku mālohi feʻunga pē ʻa e mamahiʻia fakatāutaha ʻa e Fakamoʻuí ʻi Ketisemaní mo hono tutuki Ia ʻi he kolosí ke fakahaofi ha tangata hangē ko aú.”
Ne ongo kiate au ʻene anga fakatōkilaló pea mo e ueʻi ʻa e Laumālié peá u pehē ange, “Te u fakaongoongoleleiʻi koe ke ke hoko ko ha fakafofonga ʻo Sīsū Kalaisi.” Peá u toe pehē ange, “Te u kole atu ha meʻa pē ʻe taha. ʻOku ou loto ke ke hoko ko e faifekau lelei taha ʻi he Siasí fakakātoa. Ko ia pē.”
Hili mei ai ha māhina ʻe tolu pe fā, ne u lea mo Sisitā ʻEtisilī ʻi ha senitā akoʻanga fakafaifekau. ʻI he ʻosi ʻa e fakataha lotú, ne u pōtalanoa mo ha kau faifekau mo ʻeku fakatokangaʻi atu ha talavou ʻoku ou mata ʻiloʻi.
Naʻá ne pehē mai, “ʻOkú ke kei manatuʻi au?”
Ne u kiʻi ongoʻi mā ʻo u tali ange, “Kātaki pē. ʻOku ou ʻiloʻi pē ʻoku totonu ke u kei manatuʻi ka kuo ngalo ʻiate au.”
Peá ne pehē mai, “Tuku ke u talaatu ko hai au. Ko e faifekau lelei taha au ʻi he senitā akoʻanga fakafaifekaú.” Pea naʻá ku tui ki ai.
Naʻe ʻikai ngata pē hono fakatefito e ʻamanaki ʻa e talavoú ni ʻi he ʻilo mo e fakamoʻoni ʻo e Fakaleleí ka naʻe toe fakatefito ia ʻi heʻene ʻiloʻi fakatāutaha e meʻafoaki ʻo e Fakaleleí. Naʻe mahino lelei kiate ia naʻe fakahoko fakatāutaha ʻa e Fakaleleí maʻana! Naʻá ne ʻilo e mālohi ʻo e Fakaleleí pea mo e ʻamanaki lelei ʻoku maʻu mei aí ʻi he taimi ʻoku hangē ka mole pe ʻikai ke toe ʻi ai ha ʻamanakí.