Ko Hono ʻOmi ʻo e Palaimelí ki ʻApi
ʻOku Akoʻi Au ʻe Sīsū Kalaisi Ke u Fili ki he Totonú
ʻE lava ke ke fakaʻaongaʻi e lēsoni mo e ʻekitivitī ko ʻení ke lahi ange ai hoʻo ʻilo ki he kaveinga ʻa e Palaimelí ki he māhina ní.
Naʻe mahino kia Tena he ʻikai ke tatau e Toetuʻú he taʻú ni mo e ngaahi taʻu kimuʻá. Kuo mālōlō ʻene kuitangatá, pea naʻe loto-mamahi ʻa Tena koeʻuhí he ʻikai lava ke ne toe vahevahe ʻa e taimi makehe ko ʻení mo ia.
Ka naʻe fakamanatuʻi kia Tena he taimi Palaimelí ko e ʻuhinga ʻoku tau fakamanatu ai e Toetuʻú koeʻuhí he ʻoku moʻui ʻa Sīsū! ʻI he taimi naʻá Ne toetuʻu aí, naʻe toe fakataha leva Hono laumālié mo Hono sinó ʻo taʻengata, pea he ʻikai ke ne toe aʻusia e maté. Naʻe ʻilo ʻe Tena ʻe lava ke toetuʻu e tokotaha kotoa pē ʻi ha ʻaho, kau ai ʻene kuitangatá koeʻuhí ko e toetuʻu ʻa Sīsuú!
Naʻe fiefia ʻa Tena ʻi heʻene hivaʻi e foʻi hiva Toetuʻú: [“Kuo toetuʻu ʻa Sīsū, ko Sīsū ʻa hotau kaungāmeʻá. ʻOku fonu hotau lotó he fiefia; he ʻokú Ne toe moʻui.”]1 Naʻe loto ʻa Tena ke vahevahe ʻa e ongoongo lelei ko ʻení ki he tokotaha kotoa pē. Naʻá ne fakakaukau leva te ne tuku he matapā hono kaungāʻapí ha kiʻi haʻinga matalaʻi ʻakau mo ha folofola kau ki he Toetuʻu ʻa Sīsuú kimuʻa he taimi Toetuʻú. Naʻá ne fakakaukauloto atu ki haʻanau malimali ʻi heʻenau ʻilo ʻene meʻaʻofá he pongipongi Toetuʻú.