Tautehina ʻi he Hingoá mo e Tuí
ʻOku ʻikai ngata ʻi he hoko ʻa Malia mo Taiana D. ko ha ongo tautehiná; ka ʻokú na toe hoko foki ko e ongo kaungāmeʻa lelei. ʻOku taʻu 10 ʻa Taiana, pea naʻe taʻu 12 ʻa Malia ʻi ʻAokosi ʻo e taʻu kuo ʻosí. ʻOkú na nofo ʻi Lumēniá, ʻa ia ʻoku ʻi ai ha kau mēmipa ʻo e Siasí ʻe toko 3,000. ʻOkú na tauhi ʻena tui kia Sīsū Kalaisí ke mālohi ʻaki ʻena ʻalu ki he lotú, lau e folofolá mo e lotú.
ʻOku pehē ʻe Malia, “Kuó u ako ʻi he siasí ke maʻu e tui ki he ʻOtuá.” Naʻe ʻi ai ha ʻaho naʻe fai ai ʻene sivi, pea naʻá ne lotu ʻo kole ha tokoni mei he Tamai Hēvaní ʻi he huafa ʻo Sīsū Kalaisí. ʻI he taimi naʻá ne maʻu ai ha maaka leleí, naʻá ne ongoʻi naʻe tokoniʻi ia ʻe he Tamai Hēvaní.
ʻOku pehē ʻe Taiana ʻoku tokoniʻi ʻe he Tohi ʻa Molomoná ke ne tui. ʻOkú ne pehē, “Ko e ʻaho kotoa pē ʻoku ou lau ai e Tohi ʻa Molomoná, ʻoku hoko ia ko ha ʻaho lelei kiate au. Ko e talanoa ʻoku saiʻia ai mei he folofolá ko e talanoa ʻo Siosefa Sāmitá. ʻOkú ne pehē, “Naʻá ne lotu, pea tokoniʻi ia ʻe he ʻOtuá mo Sīsū Kalaisi.”
Sokoleti
ʻOku saiʻia ai e ongo tautehiná ʻi he hikingaua ʻoku ngaohi ʻaki e kokó: ʻoku saiʻia ʻa Malia he palauní (brownies) kokó, pea saiʻia ʻa Taiana he keke kokó.
Hiva Manakoá
ʻOku fakatou tā piano ʻa Malia mo Taiana. Ko e hiva ʻoku saiʻia ai ʻa Maliá ko e “Ke Mou Feʻofaʻaki.” ʻOku fakamatala ia ki he fekau ʻa Sīsū ke ʻofa ki he kakai kehé. ʻOku meimei lava ʻa Taiana ʻo taaʻi lelei ia, ka ʻokú ne pehē ko e konga faingataʻa tahá ʻa e konga fakaʻosí.
ʻOku ou Fie Siofia e Temipalé
ʻOku loto ʻa Malia mo Taiana ke na mali ʻi he temipalé ha ʻaho. ʻOkú na nofo ʻi he Vahefonua Temipale Kivi ʻIukuleiní.
ʻI he taimi ʻe kiʻi matuʻotuʻa ange ai ʻa Taianá, te ne ʻalu ki he Temipale Kivi ʻIukuleiní ʻo fakahoko ai e papitaiso maʻá e kau pekiá. Kuo matuʻotuʻa feʻunga ʻa Malia he taimí ni ke ʻalu ki ai. ʻOku meimei ke maile ʻe 500 (km ʻe 805) e mamaʻo ʻo e temipalé.
Fakamuʻomuʻa e Fāmilí
ʻOku ʻofa ʻa Malia mo Taiana heʻena ongomātuʻá. ʻOku pehē ʻe Malia, “ʻOku fakafiemālieʻi kimaua ʻe heʻema faʻeé he taimi ʻokú ma puke aí. ʻOku pehē ʻe Taiana, “ʻOku ʻave kimaua ʻe he Tangataʻeikí ki he akó.”
Ngaahi Himí
Ko e himi ʻoku saiʻia taha ʻa Taianá ko e “ʻA e Kau Tauhi-sipi ʻi Siuteá,” ʻa ia ʻoku fakamatalaʻi ai hono ʻaloʻi ʻo Sīsū Kalaisí. ʻOku fakaʻaongaʻi ʻe he kāingalotu ʻi Lumēniá ʻa e tohi himi lanumata ʻa e Siasí. ʻOku ʻuhinga ʻa e “Imnuri” ʻi he lea faka-Lumēniá ko e “ngaahi himí.”
Tā ʻo e kau fafiné fai ʻe Adam C. Olson; tā fakatātaaʻi ʻo e keké mo e pisiketé ʻe Thomas S. Child