O Outou o O’u Lima
I le avea ai ma soo o Iesu Keriso, ua valaauina i tatou ia lagolago ma faamalolo atu ae lē o le tausalaina.
O se tala na faamatalaina, i se aai na faatafunaina i le taimi o le Taua Lona II a le Lalolagi, lea na matua faaleagaina ai se faatusa telē o Iesu Keriso. Ina ua maua e tagata o le aai le faatusa i faatafunaga, sa latou faanoanoa ona sa avea lea o se faailoga pele o lo latou faatuatuaga ma le faatasi ai o le Atua i o latou olaga.
Na mafai e tagata popoto faapitoa ona faaleleia le tele o vaega o le faatusa, ae ona sa matua faaleagaina ona aao o lea na le mafai ai ona toe faaleleia. Na fautua mai nisi latou te aumaia se tagata fau faatusa e toe faia ni lima fou, ae o isi na latou mananao e tuu ai pea faapea—o se faamanatu mautu lea o le tulaga matautia o le taua. Na iu lava ina tuu ai lava le faatusa e aunoa ma ni lima. Ae peitai, na faaopoopo e tagata o le aai i le pito i lalo o le faatusa o Iesu Keriso se faailoga e i ai upu nei: “O outou o o’u lima”
O i Tatou o Aao o Keriso
E i ai se lesona loloto i lenei tala. Pe a ou mafaufau i le Faaola, e tele lava ina ou mafaufauina o Ia ma Ona aoao mafola; o aapa mai e faamafanafana, faamalolo, faamanuia, ma le alofa. Ma e talanoa o Ia i taimi uma e—aunoa ma le vaai maulalo lalo i tagata. E alofa o Ia i e lotomaualalo ma e agamalu ma savavali faatasi ma i latou, ma aoao atu ia i latou ma ofoina atu le faamomoe ma le faaolataga.
O le mea lena na Ia faatinoa i le taimi o Lona soifuaga faaletino; o se mea foi semanu Na te faatinoina pe ana fai o loo Ia soifua faatasi ma i tatou i le aso; ma e ao foi ona tatou faatinoina i le avea ai ma Ona soo ma ni tagata o Le Ekalesia a Iesu Keriso o le Au Paia o Aso e Gata Ai.
Ua tosina atu o tatou manatu ma loto ia te Ia, i lenei taeao matagofie o le Eseta—o le Faamoemoe o Isaraelu ma le Malamalama o le Lalolagi.
Ao tatou mulimulitai i Ana faataitaiga atoatoa o le a mafai ai la ona avea o tatou lima ma Ona aao; o tatou mata, ma Ona fofoga; o tatou Loto, ma Lona finagalo.
E Mafai e o Tatou Lima ona Opoina Mai
Ou te matuai fiafia i le ala o loo auauna atu ai tagata o le Ekalesia i isi. Ao matou faalogoina a outou osigataulaga le manatu faapito ma le alofa ofoofogia, e faatumuina o matou loto i le agaga faafetai ma le fiafia. O outou o se malamalama pupula i le lalolagi, ma ua iloa outou i lo outou agalelei ma le agaalofa i le kelope atoa.
Ae paga lea, mai lea taimi i lea taimi tatou te faalogo ai foi i tagata o le Ekalesia o e ua lotovaivai ma, sosoo ai, ma le le toe o mai ma auai mai i sauniga Lotu, ona ua latou manatu latou te le talafeagai.
A o ou laitiiti, i le taimi o le maea ai o le Taua Lona II o le Lalolagi, na i ai Siamani i se tulaga faatafunaina ma faaleagaina. O le toatele o tagata na fiaai, mamai, ma maliliu ai. Ou te manatuaina lelei lava ia uta agaalofa o meaai ma lavalava mai le Ekalesia i le Aai o Sate Leki. E oo mai i lenei aso, ou te manatuaina pea le manogi o lavalava ma le mafai lea ona ou tofoina pea le suamalie o apa fualaauaina.
Sa i ai foi nisi na liliu mai i le Ekalesia ona o oloa sa latou mauaina ai i lena taimi. O nisi o tagata o le ekalesia na vaai maualalo i nei tagata fou na liliu mai. Na latou faaigoaina i latou i se igoa faaonoono o le: Büchsen Mormonen po o “Mamona-Meaai Tuuapa.” Latou te le fiafia i nei tagata fou o le ekalesia ona sa latou talitonu faapea e uma loa ona foia o latou manaoga faaletino, ona latou tuua lea o le ekalesia.
E ui o nisi na o ese, ae toatele na tumau ai—na latou o mai i le lotu, tofo i le suamalie o le talalelei, ma lagona le opo alofa mai a uso ma tuafafine popole. Na latou mauaina le malo.” Ma i le taimi nei, o le tolu ma le fa autupulaga mulimuli ane, o le toatele o aiga ua saili lo latou auai i le Ekalesia i tua i nei tagata na liliu mai.
Ou te faamoemoe o le a tatou faafeiloaia ma alolofa atu i fanau uma a le Atua, e aofia ai i latou o e atonu e oofu, foliga, tautatala, pe faatinoina ni mea e ese mai ai. E lē lelei le faia ina ia lagonaina e isi latou te le atoatoa. Ia tatou, siitia i latou o e o siomiaina i tatou. Ia tatou tuu atu se lima faafeiloai. Ia tatou tuu atu i luga o o tatou uso ma tuafafine i le Ekalesia se fuataga faapitoa o le agaalofa, agalelei, ma le alofa ina ia latou lagonaina, ua latou mauaina lo latou aiga.
Pe a tofotofoina i tatou e faamasino atu, ia tatou mafaufau i le Faaola, o le “alofa i le lalolagi, e oo ina tuuina atu lona lava soifua ina ia aumaia tagata uma ia te ia.
[Ma] na fetalai mai o ia: O mai ia ia te au o outou tuluiga uma o le lalolagi … [a o le], tofi o tagata uma e tutusa lava ma ua le vaosia se tasi.”1
Ao ou faitau i tusitusiga paia, e foliga mai o i latou o e mauaina aoaiga sili ona malosi a le Faaola e matele lava ia i latou o e manatu faamaualuga ia i latou lava ona o a latou oa, faatosinaga, pe amiotonu faafoliga.
O se tasi o mea na tupu lea na aoao atu ai le Faaola i se faataoto i ni alii se toalua o e na o i le malumalu e tatalo. Na tatalo se tasi o alii, o se Faresaio faaaloalogia, “Le Atua, ou te faafetai atu ia te oe, ina ua ou le pei o isi tagata, o e fao mea, o e amio leaga, o e mulilulua, e le pei o le la telona foi. E tailua i vaiaso ona ou anapogi, ou te avatu mea e sefulu ai mea uma ou te maua.”
O le isi tagata, o se telona e itagia, na tu “mamao atu, [ma] e le mafaia ona tepa ae ona mata i le lagi, a ua popo lona fatafata, ua faapea atu, Le Atua e , ia e alofa mai ia te au le tagata agasala.”
Ma na fetalai atu Iesu, “Ou te fai atu ia te outou, na alu ifo lena tagata i lona fale ua tauamiotonuina a e le faapea le isi.”2
O le mea moni lava, tatou te “agasala uma lava, ma ua le oo i le viiga mai le Atua.”3 Tatou te manaomia uma lava le alofa mutimutivale. I na aso amuli pe a valaauina i tatou i luma o le nofoa faamasino o le Atua, pe tatou te le faamoemoe ea ia faamagaloina o tatou faaletonu e tele? Pe tatou te le mananao ea e lagonaina le opo mai a le Faaola?
E matua sao ma tatau lo tatou faalauteleina atu i isi o le mea lava lea o loo tatou faamemelo atu i ai ma le naunautai mo i tatou lava.
Ou te le o fautuaina atu ia tatou taliaina le agasala po o le le manatu i le amioleaga i o tatou olaga faaletagata lava ia po o le lalolagi. Ae ui i lea, i lo tatou naunau, tatou te le mautonu ai i nisi o taimi e uiga i le agasala ma le tagata agasala ma e vave tele ona tatou tausalaina ae laitiiti tele lo tatou agalelei atu. Ua tatou iloa mai faaaliga i nei onapo e “taua tele le aoga o agaga i le silafaga a le Atua.”4 E tusa lava le le mafai ona tatou fuaina o le taua o se isi agaga ma le le mafai ona tatou fuaina o le lautele o le lalolagi. O tagata uma tatou te feiloai i ai o se TST [tagata sili le taua] i lo tatou Tama Faalelagi. Pe a tatou malamalama loa i lena mea, ua mafai foi ona tatou malamalama i auala e tatau ona tatou taulimaina ai o tatou uso a tagata.
Na fai mai se tasi o tamaitai ma loimata o le na aafia i ni tausaga o tofotofoga ma faanoanoaga faapea, “Ua ou iloa nei ua pei lava a’u o se 20-tala-pepa tuai—ua maanuminumi, masaesae, palapala, sauaina, ma mailaila. Ae o a’u lava o se o se 20-tala-pepa. O loo i ai lo’u aoga. Atonu e ui lava ua lē lelei o’u foliga, ma e ui ua ou palapala ma ua tuai, ae o loo atoa pea lo’u aoga, o se 20 tala.”
E Mafai e o Tatou Lima ona Faamafanafana Atu
I lo tatou iloa ai o nei mea, ia tatou aapa atu i isi ma o tatou loto ma lima mafola, aua o loo savalia e tagata uma lona lava auala faigata. I le avea ai ma soo o Iesu Keriso, lo tatou Alii, ua valaauina i tatou ia lagolago ma faamalolo atu ae lē o le tausalaina. Ua poloaiina i tatou e faanoanoa faatasi ma e faanoanoa ma faamafanafana i e ua tatau i ai le faamafanafanaga.5
I le avea ai la ma ni Kerisiano e le o se tulaga talafeagai lo tatou mafaufau ifo faapea o e ua mafatia ua talafegai tonu lava i ai lo latou puapuagatia. O le Aso Sa o le Eseta o se aso lelei lea e manatua ai le tauaveina ma le naunautai e lo tatou Faaola i Ona Lava luga o tatou tiga ma ma’i ma puapuaga uma lava—e oo lava ia i tatou o e foliga mai ua talafeagai o tatou mafatiaga.6
Ua tatou faitauina i le tusi a Faataoto faapea “e alofa le uo i aso uma lava, ae fanau le uso mo le aso vale.”7 Ia tatou alolofa i taimi uma lava. Ma ia tatou i ai faapitoa iina mo o tatou uso ma tuafafine i taimi o mafatiaga.
E Mafai e o Tatou Lima ona Auauna Atu
O se talafatu anamua a tagata Iutaia i ni auso tama se toalua, o Abram ma Zimri, o e ona se faatoaga ma na galulue faatasi ai. Na la malilie e vaelua tutusa le galuega ma le seleselega. I se tasi po ao lata i le seleselega, sa le mafai ona moe ia Zimri, ona e lei foliga sa’o le maua e Abram na o le ‘afa o le seleselega, aua e i ai lona toalua ma atalii e toafitu e fafaga, a ua tele naua mo ia, aua e na o ia lava e fafaga.
O lea na fai ai ofu o Zimri ma agai lemu atu i le faatoaga, ma ia aveina le tasi vaetolu o lana seleselega ma tuu i le faaputuga a lona uso. Ona ia toe foi lea i lona moega, ua faamalieina ona ua ia iloa ua ia faia le mea sa’o.
Na le mafai foi ona moe Abram ia, mo sina taimi. Na ia mafaufau i lona uso o Zimri, o lē e na o ia lava ma e leai ni ona atalii e fesoasoani ia te ia i le galuega. E le talafeagai ia Zimri, lea e galue malosi na o ia lava, ona ia mauaina na o le afa o le seleselega. E moni lava, e le fiafia i ai le Atua. Ma o lea na alu lemu ai Abram i le faatoaga, ma ave le tasi vaetolu o lana seleselega ma tuu i le faaputuga a lona uso pele.
I le taeao na sosoo ai, na o ane le auso i le faatoaga ma na ofo uma i laua i le vaai atu e foliga tutusa lava ia faaputuga. I lena po na o lemu ai le auso i fafo ma toe faia foi a la’ua taumafaiga o le po na mavae atu. Ae i le taimi la lea na maua e le tasi le isi, ma ina ua la iloaina, sa la fetagisi ma feopoai. Sa le mafai ona la tautatala, ona ua matua aafia o la loto i le alofa ma le agaga faafetai.8
O le agaga lenei o le alofa: ia tatou alolofa atu i isi e pei o i tatou lava,9 saili lo latou fiafia, ma faia ia i latou e pei ona tatou faamoemoe ia latou faia mai foi ia i tatou.10
E Manaomia e le Alofa Moni ia Faatinoga
E manaomia e le alofa moni ia ni faatinoga. E mafai ona tatou tautatala i le alofa i le aso atoa—e mafai foi ona tatou tusia ni faamatalaga po o ni solo e folafola mai ai, lagiina ni pese e vivii mai ai, ma lauga mai i sauniga e faamalosiauina ai—ae seiloga ua tatou faaalia lena alofa i ni faatinoga, e le aoga a tatou upu ua na o se “apa memea taalili, po o se sumepalo tagitagi.”11
Sa le na ona fetalai mai o Keriso e uiga i le alofa; na Ia faaalia i aso taitasi o Lona soifuaga. Na te lei aveeseina lava o Ia mai isi tagata. I le lotolotoi o tagata na aapa atu ai Iesu i le toatasi. Na Ia laveaiina le na leiloa. Na te lei aoaoina se vasega e uiga i le aapa atu ma le alofa ona tuu atu lea o le galuega moni i isi. Sa lē na ona Ia aoao atu ae na Ia faaali mai foi ia i tatou le ala e “fesoasoani ai i e vaivai, ia sii ae lima o loo tautau i lalo, ma faamalosia tulivae vaivai.”12
E silafia e Keriso le auala e auauna atu ai isi ma le atoatoa. Pe a aapa mai aao o le Faaola, o le a uunaia i latou o e pai atu ia te Ia e avea ma tagata sili atu le maoae, sili atu le malosi, ma sili atu le lelei i le avea ai ma se taunuuga.
Afai la o i tatou o Ona aao, pe le tatau ea ona tatou faia faapea?
E Mafai ona Tatou Alolofa e pei ona Ia alofa mai
Na faaali mai e le Faaola ia faamuamua atoatoa mo o tatou olaga, o o tatou aiga, o a tatou uarota, o o tatou nuu, ma o tatou atunuu, ina ua Ia fetalai e uiga i le alofa, o le poloaiga sili “ua autu ai le tulafono uma ma le au perofeta.”13 E mafai ona tatou faaaluina o tatou olaga e mafaufau faavalea ai i mea o le olaga, le tulafono, ma lisi uumi o mea e fai; peitai afai tatou te lē amana’iaina tulafono sili, ua tatou misia le fatu ma o ni āo i tatou e leai se vai o i ai, ua felafoaiina foi i matagi; ma o ni laau foi e leai ni fua.14
A aunoa ma lenei alofa i le Atua le Tama ma o tatou uso a tagata, ua na o ni faafoliga i tatou o Lana Ekalesia a ua leai se tino. O le a le aoga o lo tatou aoao atu e aunoa ma se alofa? O le a le aoga o a tatou galuega faafaifeautalai, malumalu, po o le uelefea e aunoa ma se alofa?
O le alofa na musuia ai lo tatou Tama Faalelagi e fausia o tatou agaga; o le mea lea na taitaiina ai lo tatou Faaola i le Togalaau o Ketesemane ina ia totogiina e Ia a tatou agasala. O le alofa o le mafuaaga aupito maualuga lea o le ata o le faaolataga, o le puna o le fiafia, o le toe faafouina o le tautotogo o le faamaloloina, ma o le puna taua o le faamoemoe.
Ao aapa atu o tatou lima ma loto i le alofa faaKeriso i isi, o le a tupu ia i tatou se mea matagofie. O le a faamaloloina, ma toe faaleleia, ma sili atu ona malosi o tatou lava agaga. O le a sili atu ona tatou fiafia, sili atu ona toafilemu, ma sili atu ona mataala ma iloa musumusuga a le Agaga Paia.
Faatasi ai ma lo’u loto ma lo’u agaga atoa, ou te tuuina atu le faafetai i lo tatou Tama Faalelagi mo Lona alofa mo i tatou, mo le meaalofa o Lona Alo, mo le soifuaga ma faataitaiga a Iesu Keriso ma mo Lana taulaga atoatoa ma le le manatu faapito. Ou te olioli i le mea moni e lē o maliu Keriso ae ua toetu mai le tuugamau! O loo soifua o Ia ma ua toe afio mai i le lalolagi e toefuatai Lana pule ma le talalelei i tagata. Ua Ia tuuina mai ia i tatou le faataitaiga tonu o le ituaiga o alii ma tamaitai e tatau ona avea ai i tatou.
I lenei Aso Sa o le Eseta, ma i aso uma, pe a tatou mafaufau ma le migao ma le matau i auala o loo opoina atu ai i tatou, ma faamafanafanaina i tatou, ma faamaloloina ai i tatou e lo tatou Faaola, ia tatou tautino atu e avea ma Ona aao, ina ia mafai ai e isi e ala atu ia i tatou ona lagonaina Lana opo alofa mai. I le suafa o Iesu Keriso, amene.