Ua Atoa le Uluai Sefulu Tausaga o le Tautua a le Maota Autu mo Konafesi
O le konafesi ia Aperila o le amataga lea o le isi sefulu tausaga lona lua o le tautua. I lona 10 tausaga muamua, e faitau miliona ma miliona ua silafia le tulaga maualuga tulaga ese o lea ituaiga maota i le silia ma le 100 sauniga o konafesi aoao ma le 4,500 gaoioiga na faia ai, faapea foi ma faasalalauga fesootai.
Sa faia le uluai konafesi aoao i le Maota Autu mo Konafesi i le aso 1 Aperila, 2000. O iina na tulei saunoa ai Peresitene Gordon B. Hinckley (1910–2008) e faapea: “[O Le Maota Autu mo Konafesi] o le a faamaonia o se faaopoopoga maoae lea i lenei aai. E le gata o le a fai ai iinei a tatou konafesi aoao ma nisi foi sauniga faalelotu, ae o le a avea foi ma nofoaga autu faaleaganuu mo faatinoga sili o tomai. Matou te faamoemoe lava o le a o mai i latou e le auai i lo tatou faatuatuaga, ma maua ai lagona lelei i lenei nofoaga matagofie, ma lagona le loto faafetai ina ua i ai lenei maota” (“Molimau Atu i le Lalolagi Atoa,” Liahona, Iulai 2000, 4; Ensign, May 2000, 4).
Na mavae le ono masina, ona faapaiaina lea e Peresitene Hinckley o le maota, i le aso 8 o Oketopa.
Talu mai lena taimi, toeitiiti atoa le fitu miliona tagata ua asiasi mai i le Maota Autu mo Konafesi, e auai i gaoioiga e 4,577 sa faia ai. E 4.8 miliona tagata na asiasi mai e maimoaina le maota, ma sa talimalo ai lenei nofoaga autu i le silia ma le 5,500 o taitai taualoa. O gaoioiga sa faia i le faleapitaga ma le Falefaafiafia Faapitoa o le Maota Autu mo Konafesi e aofia ai konafesi aoao, 10 sauniga aoao a Tamaitai Talavou, 10 sauniga aoao a le Aualofa, tolu sauniga faamanatu (e aofia ai ma le falelauasiga o Peresitene Hinckley), ma faatinoga faamusika e 125, e le aofia ai Afioga Tulei ma Musika a le Aufaipese a le Tapeneko, lea ua faa-186 ona faia i le Maota Autu mo Konafesi.
O na fuainumera ua amata ona vaaia ai le faataunuuina o le saunoaga a Peresitene Hinckley.
E toatele tagata na feiloai ma Brent Roberts, o le faatonusili o fanua ma fale i le laumua, ma sa latou faaali atu ia te ia lo latou agaga faafetai i mea sa latou lagonaina iina. “Sa latou savavali mai i totonu ma loimata i o latou mata ma le Agaga i o latou loto,” o lana tala lea. “Ua le na o se fale, ae—o le Alii, o Lana galuega, ma Lona Agaga.”
Sa fofogaina mai le maota autu i le taeao o le Eseta e Peresitene Hinckley, i le taimi o le konafesi aoao ia Aperila 1996.
O se vaaiga aoao i luitau o le galuega na faatoilaloina i le fauina o le Maota mo Konafesi, na fesoasoani e faamautu ai le tulaga ese o le maota. O lenei faleapitaga e 21,000-nofoa, e tatau ona fausia i le malifa i le va o le Auala Autu o le Aai o Sate Leki ma le Auala o West Temple. E tolu ni kamupani faufale tetele sa soofaatasi i le galuega. E le tatau ona i ai ni puipui lagolago i le faleapitaga, ina ia mautinoa ai e leai se mea e faalavelave i le silasila a tagata uma, o lea na faaaogaina ai e tufuga ia fusi u’amea e ta’i 290-futu le uumi (88 m) e mafai ai ona lagolagoina uta e i le va o le 250 ma le 625 pauna i le sikuea inisi (17–37 kg i le sikuea senitimita). O le mamanu foi lea o le a faatino ai fuafuaga o togalaau mo le tumutumu. Soo se aso lava i le faagasologa o le galuega, pe tusa ma le 1,000 le au faigaluega sa i ai i le nofoaga.
I le taimi o le galuega, sa lavātia e le fale le asiosio malosi e le masani ai i le 1999 i le Aai o Sate Leki, ma e ui lava ina sa mafa’i ai le lima o se siligi tele na i ai, ae na faaauau lava le galuega.
Na maea le maota i le taimi na atofaina, ma sa fiafia i latou sa asiasi mai i le maota autu i masini faaonaponei ma le faatotogaina. Mo televise, ua i ai i le Maota Autu mo Konafesi se faailoilo o peau o le ea e maualuga lona malosi. O le uluai faasalalauga tuusao i Iuta na faia mai le Maota Autu mo Konafesi, o le faamanatuga o le aso soifua lona 90 o Peresitene Hinckley ia Iuni 2000.
Sa fatuina e enisinia se masini mo le leo i le faleapitaga ina ia maua ai leo aupito silisili—pe faalogologo le au asiasi mai i se failauga pe o auai mai i se faatinoga faamusika—ma sa faia ma le faaeteete ia fuafuaga e aofia ai mea i luga o puipui ma le taualuga, o le aofai o tagata e ofi ai i totonu, ma le faakapetaina ma le folaina.
Na saunoa Peresitene Hinckley e molimoli atu foi e le maota se lagona malualii. E mafai ona vaaia lena malualii a o savalivali mai tagata asiasi i faapaologa, lea e mafai ona iloa mai ai se atavane o le Faaola ma le atuao o Peresitene o le Ekalesia; savavali i togalaau i luga o le tumutumu, o laau, fugalaau, pupulaau, ma āfu; tepa a’e i luga i le atufaamalama e iva e faasasaga i luga i le tumutumu o le maota, lea e mafai ona ufiufi mo gaoioiga faatino; ma fiafia ai i atavali i le maota atoa, o le tele lava ua masani ai tagata o le Ekalesia ae toetoe lava o ata uma o ni galuega fou faatoa gaosi.
O lenei maota maoae e tele ona tala faafuainumera matagofie. E aofia ai le 10 eka (4 ha), po o le atufalega atoa e tasi o le aai. O le faauaeaina o totonu o le maota autu lava ia, e mafai ona soo faalua ai le lalolagi pe a li’o ai. E silia ma le 5,900 kalone (22,330 lita) o le vai o loo fefo’ifo’ia’i ai i punavai ma matavai i minute taitasi.
Ae ui o lea, o le vaaiga aupito sili o le maota autu e le o kilomita o le faauaeaina po o le aofaiga o le mamafa e mafai ona gafatia e le taualuga, po o se isi lava o na fuainumera.
“E le o se falemataaga, e ui lava ina maoae lona fausaga,” o le saunoaga lea a Peresitene Hinckley. “O se nofoaga e faaaogaina e faamamaluina ai le Silisiliese ma le faataunuuina o Ona faamoemoega e faavavau” (“This Great Millennial Year,” Liahona, Jan. 2001, 80; Ensign, Nov. 2000, 67).