Sa Ta’u Mai e Tina ia te Au
Atonu o le mafuaaga lea e masani ai ona tatou tali atu i le alofa o o tatou tina aua o se faailoga lea o le alofa o lo tatou Faaola.
Ua tuuina mai e le Alii i luga o matua se matafaioi o le faafaileleina faaleagaga lea o a latou fanau. O nisi taimi o lenei matafaioi e oo mai i luga o se matua nofotoatasi. O lo’u lava tina sa talavou o ia i le taimi na maliu ai lou tama, ma na tu’ua ai na o ia ma se fanau e toafa. Ae sa feagai o ia ma ona faigata faatasi ma le faatuatua ma le lototele, ma lana folafolaga ia i matou, afai matou te tumau i le ala o le upu moni, o le a sili atu le faaiuga nai lo le amataga. E pei o fanau a tina totoa i le Tusi a Mamona, “matou [te] le masalosalo lava na iloa e o matou [tina]” (Alema 56:48). Uso e ma tuafafine, ou te malamalama i se auala patino i le maoae o uunaiga a tina.
O la’u uo lelei o Don Pearson, sa ia faasoa mai se mea na tupu e faaautu i ai lenei aafiaga. I se tasi po, sa fai atu ai lona atalii e fa tausaga e na te faitauina se tala a o lei moe. Sa piki e Eliki le tusi e fiafia lava i ai o le: The Ballooning Adventures of Paddy Pork, o se tala e faatatau i se aiga sa latou faamautu i ni atumotu ma sa latou feoai mai i lea motu i lea motu i se paluni ea vevela. O se tusi ata e leai ni faaupuga, o lea sa tuu i ai e le alii o Pearson upu e faamatala ai.
“O loo i ai Paddy i totonu o le paluni ea vevela. Ua ia taunuu nei i le motu. O loo ia tuuina i lalo ifo se laina i fafo atu o le paluni.”
Sa taofi o ia e Eliki. “Tama, e le o se laina lena,” o lana tala lea. “O le maea.”
Sa vaai atu Uso Pearson ia Eliki ma toe vaai i le tusi ata, ona ia faaauau lea: “Ua alu nei i fafo Paddy mai i le paluni ma ua pe’a ifo i lalo o le laau. Auoi, leai! Ua lavea lona peleue i le lala o le laau!”
Sa toe taofi o ia e Eliki. “Tama, e le o se peleue lena. O le ofu mafanafana.”
O le taimi lena na le mautonu ai Uso Pearson. “Eliki,” o lana tala lea, “E leai ni faaupuga o i lenei tusi, ua na’o ata. O le a le mea ua e mautinoa ai o se ofu mafanafana?”
Sa tali Eliki e faapea, “Aua sa tau mai e Tina ia te au.”
Sa tapuni e tama le tusi, ma faapea atu, “Eliki, o ai e te manatu e faia faaiuga mulimuli, le pule sili o lenei fale?”
O le taimi lea sa mafaufau lelei ai Eliki ae na te lei tali atu, “O oe lava, Tama.”
Sa ataata le alii o Pearson i lona atalii. O se tali matua maoae lena! “E faapefea ona e iloa lena mea?”
Sa tali vave atu Eliki, “Na ta’u mai e Tina ia te au.”
E pei ona saunoa mai Peresitene James E. Faust: “E leai se mea lelei e sili atu i le lalolagi nai lo le olaga faatina. O le malosi o uunaiga a se tina i olaga o lana fanau e le mafai ona fuatia e se tasi” (“Tama, Tina, Faaipoipoga,” Liahona, Aok. 2004, 3).
I le fuafuaga faaleatua, o le faafaileleina e foliga mai o se vaega o le tupuaga faaleagaga ua tuuina atu i tina. Ma ua ou vaai i ai i o’u afafine, ma o le taimi nei, ua ou vaaia i fanau teine a la’u fanau—mai lava i le taimi ao lei mafai ona latou savavali, sa latou mananao e siiina ma tausi ni pepe meataalo.
I la’u galuega o se faifaatoaga ma se tausi manu, sa i ai se avanoa lelei sa ou maua e iloatino ai ni aafiaga faalenatura faaletina ma iloagofie ai. I le vaitaimi o tautotogo taitasi matou te aveina ai ni lafu povi ma a latou tamai povi e agai atu i le Snake River a Idaho, latou te aai ai i le vao i lalo ifo o mauga mo se masina pe a. Ona matou faapotopoto lea o i latou ma avatu sa’o i le pa. A uma mai iina, ona uta lea o i latou i loli e momoli sa’o ai i nofoaga lafulemu i le taumafanafana i Montana.
I se tasi aso vevela faapitoa o le tautotogo, sa ou fesoasoani ai e tulituli mai le lafu i lou mulimuli atu i tua a o agai atu i se auala pefu i se nofoaga o loo puipuia atoa. O la’u galuega o le tulituli mai lea o ni tamai povi e se ese mai le auala. Sa telegese le solo ma o lea sa maua ai se taimi ou te mafaufau ai.
Ona o le vevela tele, o lea sa tamomoe solo ai tamai povi agai atu i lalo o laau mo se faapaologa. Sa oo o’u mafaufauga i le autalavou a le Ekalesia i nisi taimi e faasalaveia ai i latou mai i le ala sa’o ma le lauitiiti. Sa ou mafaufau foi ia i latou o e ua o ese mai le Ekalesia pe ua latou lagona ua tuua o latou loto e le Ekalesia ina ua faasalaveia i latou. Sa ou mafaufau lava ia te au, o le faasalaveia, e le seiloga o se amioleaga ona tupu lea—o nisi taimi o le paolo lava.
Ina ua mavae ni nai itula o tau tulituli mai tamai povi ua se ese, ma lo’u afu ua sisina ifo i o’u foliga, sa ou valaau atu ai i tamai povi ma lo’u le fiafia, “Se mulimuli i o outou tina! Latou te iloa le mea o loo o i ai! Na latou ui mai muamua foi iinei!” Sa iloa e o latou tina e ui lava ina vevela ma pefu le auala i le taimi nei, ae o le a sili atu le faaiuga nai lo le amataga.
O le taimi lava na tuu ai le lafu i le pa, sa matou iloa ai e tolu ni povi o loo feoai ma le fefe tele i le faitotoa. Sa le’i i ai a latou tamai povi ma sa latou iloaina o loo i ai i latou i le auala na o mai ai. Sa fesili mai se tasi o kaupoe ia te au pe o le a le mea e tatau ona fai. Sa ou fai atu, “O la’u mate ou te iloa le mea tonu o loo i ai tamai povi. Pe tusa ma le kuata maila [0.4 km] pe a i tua atu o le ala o loo i ai se pupu laau. Ou te mautinoa lava o le a tatou maua ai iina.”
E sa’o a, e pei lava ona ou masalomia, sa matou maua atu ia tamai povi sa leiloloa o momoe i le paolo o laau. Sa tetei ina ua matou oo atu, ma sa latou teena la matou taumafaiga e tulituli mai i latou. Sa fefefe aua e le o matou o ni o latou tina! O le tele o lo matou taumafai e tulei i le pa, o le tele foi lena o lo latou le fia gauai mai. Na iu ina ou fai atu i kaupoe, “Malilie ia, ou te iloa le mea e tatau ona fai nai lo lenei. Tatou toe foi e tatala mai o latou tina mai le pa. O le a o mai ia povi e avatu a latou tamai povi, ma o le a mulimuli foi tamai povi i o latou tina.” Na sa’o lava au. Sa iloa lelei lava e aumatua le mea e o i ai e saili ai a latou tama, ma sa latou taitaia atu i le pa e pei lava ona ou talitonuina.
Uso e ma tuafafine, i se lalolagi o loo i ai i tagata uma le faitalia, o nisi o tagata tatou te alolofa i ai o le a se ese mo se vaitaimi. Ae e le tatau ona tatou fiu ai. E tatau lava ona tatou toe foi e aumai i latou—e le tatau ona taofia lo tatou taumafai e faia pea. Ua tuuina mai e lo tatou perofeta o Peresitene Thomas S. Monson, se aioiga ina ia tatou o atu ma laveai mai i latou o e pele ia i tatou atonu ua leiloloa (tagai mo se faataitaiga, “Tu i Lou Tulaga ua Atofaina,” Liahona, Me 2003, 54–57). Faatasi ai ma le fesoasoani a taitai perisitua, e tatau i matua ona foi i tua ma saili o latou tagata o e o loo leiloloa, ma se faamautinoaga mo i latou o loo i ai se “aiga” i totonu o le auaiga ma le Ekalesia, o loo faatali mai mo lo latou toe foi mai. Tatou te le iloa lava pe o afea e suia ai se loto. Tatou te le iloa pe o afea e vaivai ai se agaga ma faavaivaia e le lalolagi. Pe a tupu lena mea, e foliga mai o a tatou fanau e toeitiiti o taimi uma latou te tapa muamua i o latou Tina, e pei o lagona nei o loo tuuina mai i le solo na saunia e Elizabeth Akers Allen:
Toe solomuli i tua, Aue le tai e o tausaga faanoanoa,
I galuega ma loimata ua ou matua lailoa, …
Ua ou fiu i mea papa’u, e leai se uiga,
Oi lo’u Tina e, ua valaau atu lo’u loto mo oe, Tina! …
E leai se alofa ua faaalia e pei o le alofa o le tina,
Mo a’u, i aso ua tuanai, e tele naua; …
Leai lava se alofa e pei o le tina e mafai ona aveesea ai le tiga
Mai se loto ua momomo ma le faiai ua lailoa i faiga a le lalolagi sauā.
Le moe pa’i maia i o’u mata ua lailoa i le fiamoe;
Luelue a’u seia ou moe, tina, luelue a’u seia ou moe!
(“Rock Me to Sleep,” i le The Family Library of Poetry and Song, ed. William Cullen Bryant [1870], 190–91; ua faaonaponei le faasaoga.)
Atonu o le mafuaaga lea e masani ai ona tatou tali atu i le alofa o o tatou tina aua o se faailoga lea o le alofa o lo tatou Faaola. E pei ona saunoa mai Peresitene Iosefa F. Samita, “O le alofa o le tina faamaoni e latalata atu [i le] faapei o le alofa o le Atua i lo se isi lava ituaiga alofa” (“The Love of Mother,” Improvement Era, Ian. 1910, 278).
Mai i mea uma lava, sa faia e le Faaola se faataitaiga atoatoa i le alofa sa Ia faaalia mo Lona tina faaletino. I le taimi mulimuli ma sili ona taua o Lona soifuaga faaletino—ina ua mae’a lona mafatiaga i Ketesemane, Lona faamasinoga sa tele ai tauemuga, le pale tuitui, le satauro mamafa lea na tu’itu’i faamataga ai o Ia—sa silasila ifo Iesu mai le satauro ma iloa ai Lona tina, o Maria, o le na sau la te faatasi ma lana Tama. O Lana taga mulimuli o le alofa a o lei maliu o Ia, o le mautinoa lea o le a lelei le vaaiga o lona tina, i le faapea atu i Lona soo, “Faauta, o lou tina!” Ma mai i lena taimi sa ave ai e le soo o ia i lona aiga. E pei ona fai mai le mau, ona silafia lea e Iesu o lea “ua uma ona taunuu o mea uma,” ona ifo ai lea o Lona ao ma ua maliu (tagai Ioane 19:27–28, 30).
O le aso ou te tulai atu i o outou luma e tuuina atu la’u molimau o Iesu Keriso o le Faaola ma le Togiola o lenei lalolagi. O Lana Ekalesia lenei, O Le Ekalesia a Iesu Keriso o le Au Paia o Aso e Gata Ai. E finagalo lo tatou Tama Faalelagi ia toe foi atu uma Lana fanau ia te Ia. Ua ou iloa lea mea ma lo’u le masalosalo ona o le molimau a le Agaga i lo’u loto. Ou te lei iloa—i lo’u laitiiti sa ou faalagolago i molimau a o’u matua. Sa faamautinoa mai e lo’u tina afai ou te tumau i le ala sao o le upu moni, e tusa lava pe vevela ma pefu, e tusa foi pe i ai ni mea faasalavei, o le a sili atu le faaiuga nai lo le amataga. O le a faavavau lo’u agaga faafetai ona sa ta’u mai e Tina ia te au. I le suafa o Iesu Keriso, amene.