Jean A. Stevens
Fesoasoani Muamua i le Au Peresitene Aoao o le Peraimeri
E talitonu Jean Alldredge Stevens o le lagonaina o le alofa mai lava a o laiti e i ai se aafiaga loloto i tamaiti uma lava. O le i ai o aafiaga o le alofa e fesoasoani i tamaiti ia iloa ma malamalama i le alofa sili o le Tama Faalelagi ma le Faaola mo i latou.
Na soifua mai Sister Stevens ia Novema i le 1952 i le Aai o Sate Leki, Iuta, ISA, ia Claron ma Helen Alldredge.
Na saunoa Sister Stevens, “Sa tausia au e ni matua e maoae le faatuatua. Sa la alolofa i le Alii, ma sa la aoaoina le talalelei i totonu o lo matou aiga. Sa faapitoa ona i ai i lo’u tina se mana maoae o le alofa i tagata.” Na te manatua le lagonaina a o laitiiti lava le alolofa o ona matua ia te ia ma fiafia e auauna atu i le Alii.
Na faatulagaina foi e Sister Stevens lena lava mamanu i lona lava aiga ina ua faaipoipo ia Mark Stevens i le Malumalu o Sate Leki i le aso 12 o Setema, 1973. E toalima o laua alo.
E lagona e Sister Stevens le loto faafetai e auauna atu i le Alii ma e faapitoa lona agaga faafetai mo le avanoa e auauna atu ai i tamaiti o le Peraimeri.
Na saunoa Sister Stevens, “O tamaiti e ese le mataalia i mea faaleagaga. Latou te o mai i lenei olaga ma ni loto talitonu. E mafai ona e lagonaina lo latou natura paia a o latou o mai i lenei lalolagi i le faatoa tuua ai lava o le afioaga o lo latou Tama Faalelagi.”
E talitonu Sister Stevens o taitai ma faiaoga o le Peraimeri e faia se vaega taua e fesoasoani atu ai i matua i le aoaoina o le talalelei a Iesu Keriso. “O le Peraimeri o se nofoaga matagofie lea mo tamaiti e lagona ai le alofa ma mo faiaoga ma taitai e faamamafa ai lesona na aoao i le aiga,” o lana saunoaga lea.
A o lei valaauina e avea o se fesoasoani muamua i le au peresitene aoao o le Peraimeri, sa tautua Sister Stevens i le pulega aoao o le Peraimeri. Sa avea foi o ia ma se peresitene o le Aualofa i le uarota, fesoasoani i le au peresitene o le Peraimeri i le uarota, ma se faiaoga o le vasega o Aoaoga Faavae o le Talalelei. Na faauu Sister Stevens mai le Iunivesite o Iuta ma se tikeri o le tagata malaga i le matematika ma se tusi faamaonia faafaiaoga.