Elder Per G. Malm
O Le Fitugafulu
Ina ua 16 tausaga o Elder Per Gösta Malm, sa galue o ia i le misiona fesoasoani a le Ekalesia e fesoasoani ai e fausia ia falelotu fou i Siamani, Finelani, Netalani, ma Suetena. Sa punouai o ia ma le maelega i le galueaiina o le Ekalesia talu mai lava i lena taimi.
Na soifua mai Elder Malm i le masina o Setema i le 1948 i Jönköping, Suetena, i ona matua o Karl Gösta Ivar ma Karin Anna-Greta Malm. Na ia aoaoina le tele o lesona taua o le olaga mai ona matua, ae faamautu i le molimau a lona tamā na ia tuuina atu a o le’i maliu i le 48 o ona tausaga: “Tumau ma le faamaoni i le talalelei.”
“Sa ia aoaoina i matou e faapea, o le talalelei o le a matou maua ai tali i mea e aupito sili ona taua,” o le saunoaga lea a Elder Malm.
Ina ua mavae le 18 masina o lana misiona faakamuta, sa avea o ia ma faifeautalai faamisiona i le Misiona a Suetena i Stockholm. Ina ua toe taliu mai o ia, sa ia faaipoipo atu ia Ingrid Agneta Karlsson i le Malumalu o Bern Switzerland ia Oketopa, 1969, ma ia tauaveina ai le pisinisi o fale ma fanua a lona tamā, ma sa maua lona faailoga mai le Iunivesite o Göteborg ma se faailoga o le tulafono faaSuetena (LLM) mai le Iunivesite o Lund.
Sa faigaluega o ia o se pule faaitulagi o fanua a le Ekalesia. Mulimuli ane, sa avea ma faatonusili o mataupu faaletino, na tofia o ia e le Au Epikopo Pulefaamalumalu e amataina se tuufaatasiga o le faagaoioiga o mataupu faaletino a le Ekalesia i Eria a Europa Tutotonu, Sasae, ma Matu.
A o tausia e Elder ma Sister Malm la la’ua fanau e toavalu, sa avea o ia ma peresitene o le misiona a le siteki, peresitene o le paranesi, fautua maualuga, peresitene o le siteki, peresitene o le misiona, faatonusili o mataupu tau i le va i fafo mo Suetena, ma se Fitugafulu Eria.
O ona aafiaga ua faamautu ai ia te ia aoaoga a ona matua, lea ua ia faamoemoe e faaaoga i lona valaauga i le Korama Lua a Fitugafulu. “O le talalelei o lo tatou taula lea,” o lana saunoaga lea. “O le a avea pea ma o tatou taula, pe afai tatou te tumau faamaoni ai, ma e maua ai le filemu e le oo i ai le malamalama.”