Se Upu i le Faaiuga
E auina mai e le molī o le ava a le Alii ia faailoilo e faigofie ona iloa, ma e lē sese lava.
O se sauniga faaiu matagofie tele lenei. E seāseā ona ou faalogo i ni lauga matagofie o aoao mai i ni nai upu itiiti e pei ona tatou faalogo ai i le asō. Ua tatou i ai uma iinei ona tatou te alolofa i le Alii. Tatou te mananao e auauna atu ia te Ia. E silafia i tatou e lo tatou Tama Faalelagi. Ou te molimauina lena mea. Ou te iloa e i ai Lona aao i mea uma.
O se mau puupuu lava se tasi:
“Ia e faatuatua ia Ieova ma lou loto atoa; a e aua le faalagolago i lou lava atamai.
“Ia e manatua o ia i ou ala uma, ona faatonuina ai lea e ia lava ou ala.”1
O le tala lena o lo’u olaga.
O’u uso e ma tuafafine, ua tatou oo mai nei i le faaiuga o se konafesi ua sili ona faagaeetia ma musuia. Ina ua mae’a ona faalogologo atu i fautuaga ma molimau a i latou sa saunoa mai, ou te talitonu ua matua faamanuiaina lava i tatou, ma ua sili atu le naunautai o i tatou uma e ola ai i mataupu faavae o le talalelei a Iesu Keriso. O se mea lelei lo tatou mafuta ai iinei. E momoli atu lo matou agaga faafetai ia i latou uma sa saunoa mai ia i tatou, faapea foi i latou sa faaleoina tatalo.
Sa matagofie musika. Ua faamanatu mai ai ia te au le mau o loo maua i le Mataupu Faavae ma Feagaiga: “Aua e olioli lo’u agaga i le pese a le loto; ioe, o le pese a e amiotonu o le tatalo lea ia te au, ma o le a tali i se faamanuiaga i o latou luga.”2
Ia manatua o savali sa tatou faalogo i ai i lenei konafesi, o le a lolomiina i lomiga o mekasini o le Ensign ma le Liahona o Me. Ou te uunaia outou ina ia suesue i savali, mafaufau loloto ia latou aoaoga, ona faaaoga ai lea i lou olaga.
Ou te iloa ua outou aufaatasi ma a’u i le faaalia o le agaga faafetai mo na uso ma tuafafine sa faamalolo i le konafesi lenei. Sa latou galulue lelei ma faia so latou sao taua tele i le galuega a le Alii. Na atoatoa lo latou tuuto. Matou te faafetai atu ia i latou mai le ta’ele o o matou loto.
O le asō, sa tatou lagolagoina ai foi, e ala i le siitia o lima, ia uso ma tuafafine ua valaauina i tofiga fou i lenei konafesi. Matou te mananao ia latou silafia, ua matou naunau foi e galulue faatasi ma i latou i le galuega a le Alii.
O’u uso e ma tuafafine, o le taimi nei pe a tatou vaavaai atu i le lalolagi o loo siomia ai i tatou, ua tatou feagai ma faafitauli matautia ma o se popolega tele lea ia i tatou. Ua foliga mai ua se’e ese atu le lalolagi mai taula o le saogalemu, ma ua tafea ese atu ai mai le uafu o le filemu.
O le taliaina o soo se amioga, ola lē mama, ponokalafi, lē faamaoni ma le anoanoai o isi mea faatiapolo ua mafua ai ona felafoaiina le toatele i peau o le agasala ma nutipala ai i aau maamaai o avanoa ua le maua, faamanuiaga ua galoma atu, ma miti ua lē taulau.
O la’u fautuaga mo i tatou uma ia tepa taulai atu i le molī o le ava a le Alii. E leai se puao e sili atu ona mafiafia, e leai se po e sili atu ona pogisa, e leai se matagi e sili atu ona malosi, e leai se tautai e sē e le mafai e le sulu o le moli o le ava a le Alii ona laveai. Na te aumaia le faailo i afā o le olaga. E auina mai e le moli o le ava a le Alii ia faailoilo e faigofie ona iloa, ma e lē sese lava.
Ou te fiafia lava i upu o loo maua i le Salamo: “O Ieova o lo’u papa ia, ma lo’u ‘olo, ma lo’u faaola; o lo’u Atua, o lo’u malosi ou te faatuatua i ai; … Ou te valaau ia Ieova … ina ia [mafai] ona faaolaina ai a’u i e ua ita mai ia te au.”3
E alofa le Alii ia i tatou, o’u uso e ma tuafafine, ma o le a faamanuiaina i tatou pe a tatou valaau atu ia te Ia.
E maeu lo tatou loto faafetai mo le talalelei toefuataiina a Iesu Keriso ma mea lelei uma ua aumaia ai i o tatou olaga. Ua liligi mai e le Alii Ana faamanuiaga i o tatou luga, o se nuu. Ou te tuuina atu la’u molimau ia te outou, e moni lenei galuega, o loo soifua lo tatou Faaola, ma o loo Ia taialaina ma taitai Lana Ekalesia i luga o le fogaeleele.
Ia, ua tatou oo mai i toe taimi o lenei konafesi, ua tumu lo’u loto ma ua ootia lava o’u lagona. E momoli atu o’u alofaaga ma le agaga faafetai ia te outou. Faafetai atu mo a outou tatalo mo a’u faapea foi le Au Pulega Aoao uma o le Ekalesia. Ua faafofogaina e le Alii a outou tatalo ma ua faamanuiaina i tatou ma taitaia i tatou i mataupu o Lona malo i luga o lenei fogaeleele. O lea tatou te matua faafetai ai lava.
A o tatou tuua lenei konafesi, ou te talosagaina faamanuiaga o le lagi i o outou luga taitoatasi. A outou toe taliu atu i o outou aiga i le salafa o le lalolagi, ou te tatalo i le Tama Faalelagi ina ia faamanuia ia te outou ma o outou aiga. Talosia ia faaaoga ia savali ma le agaga o lenei konafesi i mea uma tou te fai—i o outou aiga, i a outou galuega, i a outou fonotaga, ma a outou gaoioiga uma lava.
Ou te alofa ia te outou. Ou te tatalo mo outou. Ia faamanuia outou e le Atua. Ia ia te outou Lona filemu na folafola mai i le asō ma aso uma lava, i le suafa o Iesu Keriso, amene.