Liliu Atu i le Alii
Aua lava nei faatagaina se tulaga faalelalolagi e taofia mai ai oe faaleagaga.
I le tele o tausaga ua mavae, na ou vaai ai i se tulaga o le loto nutimomoia—lea na avea o se mea matautia. O se ulugalii talavou ua lata le fanau mai o le la tama muamua. Sa faatumulia o la olaga i le naunautai ma le fiafia ona o lenei aafiaga taua. I le taimi o le faafanauga, na tulai mai ai ni faigata ma malaia ai le pepe. O le loto nutimomoia na liua i le faanoanoa, o le faanoanoa na liua i le ita, o le ita na liua i le tautuua’i, o le tautuua’i foi na liua i le tauimasui i le fomai lea na tuuaia atoa i le mea na tupu. Na matua aafia lava ia matua ma isi tagata o le aiga, i le sailiga faatasi e faaleaga le tulaga ma le matata a le fomai. Ao faagasolo vaiaso ma masina ma faatumulia le aiga i le ita tele, na oo atu le latou le fiafia i le Alii. “Pe faapefea ona Ia faatagaina lenei mea matautia e tupu?” I le latou teena pea lava pea o taumafaiga a taitai ma tagata o le Ekalesia e faamafanafanaina i latou faaleagaga ma le faalelagona ma, na iu ai, ina latou tavavaeeseina i latou lava mai le Ekalesia. E fa augatupulaga o le aiga ua aafia nei. I se tasi o taimi sa faatuatua ma tuuto i le Alii ma Lana Ekalesia, ae ua leai nei se gaoioiga faaleagaga e soo se tasi o le aiga mo le fia tausaga.
I se tulaga sili ona faigata o le olaga, e tele lava ina na o le tasi lava le puna o le filemu. Ua faalautele mai e le Alii o le Filemu, o Iesu Keriso, Lona alofa ma le valaaulia, “Ia outou o mai ia te au, o outou uma o e tigaina ma mafatia i avega, o au foi e malolo ai outou” (Mataio 11:28). Na Ia toe folafola mai, “O lou manuia ou te avatu ai ia te outou: ou te le avatu ia te outou, faapei ona avatu e le lalolagi” (Ioane 14:27).
E toalua le fanau a matua agalelei a lou tama, o se atalii (o lou tama) ma se afafine. Ina ua maea se misiona ma le auaunaga faamiliteli i Hawaii, na toe foi lou tama i le motu i le 1946 e faamautu o ia lava i se galuega ma tausia lona aiga. Sa nonofo ona matua i le Aai o Sate Leki, faapea ma lona tuafafine. Na faaipoipo [lona tuafafine] i le 1946 ma i le fa tausaga mulimuli ane ua ma’itaga. E i ai se faamoemoega faapitoa mo matua i se la tama teine (i lenei tulaga na o le pau lea o le la tama teine) e fanau mo le taimi muamua. E lei i ai se tasi na iloa o loo ia tauaveina se masaga. O le tulaga na faanoanoa ai, na maliliu uma o ia ma le masaga i le taimi na faafanau ai.
Na nutimomoia loto o matua o lou tama. Ae peitai, o le la faanoanoaga, na vave ai lava ona la liliu atu i le Alii ma Lana Togiola. E aunoa ma le nonofo ai lava ma mafaufau pe aisea ua tupu ai lenei mea ma po o ai tonu e tuuaia, sa la tulimatai atu e ola ai i se olaga amiotonu. E le mauoa matua a lou tama; e le lavea i laua i e maualuluga i le tulaga lautele; la te lei umiaina lava ni tofiga maualuluga i le Ekalesia—ua na o i laua o ni tagata tuuto o le Au Paia o Aso e Gata Ai.
Ina ua la litaea mai galuega i le 1956, sa la siitia atu i Hawaii e faatasi ai ma le la tama lava e toatasi. O tausaga mulimuli mai na la iloa ai le la alolofa i la aiga, o auaunaga i le Ekalesia, ma e faapitoa lava, le la fiafia i le na o le la faatasi lava. La te le fiafia lava e o eseese ma e oo lava i le talanoa ai po o ai e muamua maliu o le a sue se auala e fesoasoani e toe faatasia ai i se taimi vave. O le lata i le 90 o la tausaga ma le mavae ai o le 65 tausaga o le faaipoipoga, na maliliu ai i laua ma e na o ni nai itula na eseese ai le tasi mai le isi i mafuaaga faalenatura. I le avea ai ma la epikopo, sa ou taitaiina le la falelauasiga tuufaatasi.
O le faatuatua o Tamamatua o Art ma Tinamatua o Lou, aemaise lava ina ua feagai ma faafitauli, lea ua aafia ai nei augatupulaga e fa na mulimuli mai. I le faamaoni ma le loloto, na aafia ai le la tama tama (a lo’u tamā) ma lo’u tina; ina ua malaia le tama teine lava e toatasi a o’u matua, le la uii, ona o tulaga faigata na mafua mai i le taimi na fanauina ai fanau. I le 34 o ona tausaga, na maliu ai o ia ina ua 10 aso talu lona fanauga, ma tuua ai le fanau e toa 4, e 10 aso i le 8 tausaga le matutua. Faatasi ai ma le faataitaiga na la vaai i ai i augatupulaga na muamua atu, ma e aunoa ma se faatali—na liliu atu ai ou matua—i le Alii mo se faamafanafanaga.
I le lalolagi atoa ma i tagata o le Ekalesia, e i ai le olioli maoae ma le tiga maoae. O vaega uma ia o le fuafuaga. A aunoa ma le tasi, e le mafai ona tatou iloa le isi. “Ua ola tagata ina ia latou maua le olioli” (2 Nifae 2:25) ma “Aua e ao lava ina i ai le faafeagai o mea uma” (2 Nifae 2:11) e le o se feteenaiga; ae la te faapaleniina. I le faamatalaina o ona lagona ina ua ia liliu atu i le Alii, fai mai Alema le Itiiti “Sa faatumuina lou agaga i le olioli matua tele, e tusa ma le tele o lou tiga” (Alema 36:20).
O nisi ua manumalo i ni faafitauli tetele; o isi ua faatagaina faafitauli itiiti e avea o ni mea tetele. O Symonds Ryder sa avea o se taitai a le Campbellite ma na faalogo i le Ekalesia ma fono ai ma Iosefa Samita. I se uunaiga ona o lenei aafiaga, na ia auai ai i le Ekalesia ia Iuni 1831. Na vave lava ona faauuina o ia o se toeaina ma valaauina e auauna atu i se misiona mulimuli ane. Ae peitai, i lana tusi o le valaauga mai le Au Peresitene Sili ma i lana tusi aloaia e talai ai, sa sese le sipelaina o lona igoa—i se mataitusi e tasi. Na tusia lona faaiu o R-i-d-e-r, ae le o le R-y-d-e-r lea e tatau ona i ai. O lenei mea na mafua ai ona ia fesiligia lona valaauga ma i latou o e na afua mai ai. Na ia filifili e le alu i le misiona ma liliu ese atu ai, ma vave ai oo ai i le ita ma le tetee malosi ia Iosefa ma le Ekalesia. Ia Mati 1832, ina ua ave faamalosi Iosefa Samita ma Sini Rikitone mai le fale i le taimi o le po e se vaega toatamai e faataina ma faapipiiina i ai fulumoa, sa faalogoina se leo o valaau “Simonds, Simonds [sic], o fea o i ai le pakete ta?” (History of the Church, 1:262–263). I le itiiti ifo nai le 10 masina, na liua ai Symonds Ryder mai se tagata naunau na liliu mai i se taitai faatupu faalavelave, o lana tetee faaleagaga na amata mai se solitulafono na mafua mai le sese o le sipelaina o lona igoa—i se mataitusi e tasi. E le afaina le tele o le faafitauli, ae o le auala tatou te tali atu ai o le a toe faatonutonuina ai le ala o o tatou olaga.
Na tuuina mai e le Perofeta o Iosefa Samita se faatusa i le taulimaina o faafitauli ma feteenaiga patino. Na faaalia ia te ia lenei taitaiga paia ao i ai i siosiomaga le lelei i le Falepuipui o Liperate (lea, o se vaega, sa avea o se faamatalaga auiliili o le olaga o Iosefa i lena taimi ma o se lapataiga foi): Afai “o le a faia foi oe ma tauemuga e tagata valelea … Afai foi e valaauina oe e ui atu i puapuaga; … afai e oo atu ou fili i luga ia te oe … afai e tuulafoaiina foi oe i le lua, po o lima o e fasioti, … ma au faatasi elemene uma e puipuia le ala; a e pito atu i mea uma, afai o isi auvae lava o seoli o le a faamaga tele le gutu e faasaga atu ia te oe, ia e iloa ai, lou atalii e, e tuuina atu ia te oe le poto masani ona o ia mea uma, ma avea mou lelei” (MFF 122:1, 5–7). Sosoo ai ma le faamatalaga loloto: “Na oo ifo i lalo o mea uma le Atalii o le Tagata. Pe sili ea oe i lo ia?” (fuaiupu e 8). Na sosoo ai ma se faatonuga manino ma ni folafolaga maoae. “O lea, ia tumau ai pea i lou ala, ma … aua le fefe ai i mea e mafai e tagata ona faia, ae e i ai le Atua faatasi ma oe e faavavau faavavau lava” (fuaiupu e 9).
I le aluga o tausaga na sosoo ai, na faaauau ai pea ona tumau ma le amiotonu Iosefa Samita i se olaga na tumu i faigata. Na ia ofoina mai lenei manatu e faatumulia i le faatuatua, “A e faatatau i mea faigata ua valaauina au e ui atu i ai, e peiseai o mea faatauvaa ia te au… . o le vai loloto o le mea lea ua ou masani ona aau i ai… . ua ou … mitamita i puapuaga; aua … o le Atua … [o le a] laveaiina foi au mai lenei lava aso” (MFF 127:2). O le lototele o Iosefa i le foiaina o feteenaiga faifai pea na faavae lea i lona tomai ina ia faaauau pea ona liliu atu i le Alii.
Afai e te lagona na faaseseina oe—e se tasi (o se tagata o le aiga, o se uo, o se isi tagata o le Ekalesia, o se taitai o le Ekalesia, o se uo faipisinisi), po o soo se mea lava (o se maliu o se tasi e pele, faafitauli tau le soifua maloloina, o le suia o tulaga tau tupe, saua, o ni mausa)—ia taulimaina sao lava le mataupu ma lou malosi uma o i ai. “Ia tumau pea i lou ala” (MFF 122:9); o le faavaivai e le o le filifiliga lea. Ma, ia aunoa ma le faatuai, ia liliu atu i le Alii. Faaaoga uma lou faatuatua o i ai ia te Ia. Ia faasoa atu ia te Ia ou mafatiaga. Ia faatagaina Lona alofa tunoa e faamāmāina lau avega. Ua uma ona folafola mai o le a “le tigaina i latou i se puapuaga e tasi, vagana ona ua faaumatia ai i le olioli ia Keriso” (Alema 31:38). Aua lava nei faatagaina se tulaga faalelalolagi e taofia mai ai oe faaleagaga.
I Lana galuega sili ona atoatoa o le Togiola, na manaomia ai Iesu e alu ifo “i lalo o mea uma” (MFF 88:6) ma onosai “i tiga o tagata uma” (2 Nifae 9:21). O lea, ua tatou malamalama ai e lautele le faamoemoega o le Togiola nai lo le sauniaina o se auala e manumalo ai i se agasala. E tuuina atu e le Faaola le mana i lenei faatinoga silisili nai lo se isi lava mea i le lalolagi e faataunuuina ai lenei folafolaga; “Afai tou te liliu atu i le Atua ma le loto atoa, ma outou faalagolago ia te ia, ma auauna atu ia te ia ma le filifiliga atoa o le manatu … , afai tou te faia lenei mea, e laveai o ia … ia te outou ai le nofopologa” (Mosaea 7:33).
Ao tatou faamanatuina lenei taeao o le Eseta, ia tatou liliu atu i le Alii, lo tatou “fetu ao pupula ma le fetu o le taeao” (Faaaliga 22:16). Ou te molimau atu o le a Ia faamalamalamaina e faavavau lo tatou ala, lo tatou upu moni, ma lo tatou ola (Ioane 14:6), i le suafa o Iesu Keriso, amene.