Aua, Aua, Aua Lava Nei Faavaivai!
O le a se mea e finagalo le Alii e te faia? E finagalo o Ia ia avea oe ma se afafine toa ma amio mama o le Atua, ma tautino atu e ola i aso taitasi ina ia e agavaa e mauaina ia faamanuiaga o le malumalu.
Ia Aokuso lea na tea nei na ma aveina ai nisi o fanau a le ma fanau i Timpanogos Cave National Monument, o se tasi o nofoaga sili ona tautaua i Iuta. O se savaliga faavaivai tagata e tasi ma le afa maila (2.4 kilomita) ina ia taunuu i le ana, ae na matua talafeagai lava le taumafaiga na molimauina ai faatulagaga matagofie, o faataamilosaga o le ana. Sa ou mautinoa lava o le a le faigata lea ia Ruthie e iva tausaga, ae na ou mafaufau ia Caroline e ono tausaga pe lava sona malosi ma le naunautaiga e taunuu ai.
Sa matou sagisagi fiafia mo le savaliga, i le taimi muamua, sa televave lava la matou savavali i le auala lamolemole. Sa vave ona matou savalia le kuata e tasi o le auala, ae na fai sina faigata ona ausia le afa o le auala. Sa amata ona faavaivai Caroline. Sa malosi pea Ruthie ma faamalosiau atu ia Caroline ia faaauau pea. Sa matou faagesegese e fua ia Caroline. Ona foliga mai lea ua matua lē lelei mea uma. Na oo mai matagi malolosi ma o pefu mai nei matagi na faigata ai ona iloa atu se mea. Sa fai sina taufaafefe ma e lei gata ai iina, sa matou vaaia se pou o i ai se faaupuga faapea “Nofoaga o Gata Uogo. Ia Tumau i luga o le Ala. Ia Tumau ai Saogalemu.”
Sa matou taumafai lemu atu, ua toe tolu kuata le auala i la matou sini, ae sa i ai foi ma le vaega pito i tu o le mauga e lei a’eina. I lona vaivai, fefe ma le lē mautonu pe na te gafatia, sa nofo ifo ai i lalo Caroline ma tautino mai ma loimata, “Ou te le mafaia! Ua le mafai ona ou savali!”
Sa matou nonofo i lalo ma talanoa po o le a se mea e tatau ona matou faia. Sa matou faia se fuafuaga. Sa matou fuafua e faitau a matou laa ma vaai po o le a so matou lagona pe a mae’a laa e 100. Sa ma fai atu ma Ruthie ia Caroline o le a ma fesoasoani ia te ia. E tatau ona matou vaavaai i ni mea i le auala e faafiafiaina ai i matou ona matou fefaasoaai lea. Sa matou usuina foi ni nai pese o le Peraimeri.
Na i ai se suiga. Na filifili Caroline e mulimuli i le fuafuaga. O laa e selau na foliga faigofie ai le galuega faigata. Sa iloa e Caroline o le a ma fesoasoani ia te ia, ma a o matou vaavaai mo mea lelei o loo siomia ai i matou ma usuina a matou pese, sa matou lagona le fiafia.
Pe na outou fefefe ea ma loto vaivai, a o outou feagai ai ma se luitau e le gafatia e o outou tomai? Pe na outou mananao ea e faavaivai?
Vaai faalemafaufau pe na faapefea le lagona o Iosua, o lē na suitulaga i le perofeta maoae o Mose, i le iloaina lea o ia o le a taitaia le fanauga a Isaraelu i le nuu o le folafolaga. O nisi o taimi, ou te mautinoa na ia tau faavaivai. Peitai na faamafanafanaina o ia e le Alii i le toe faamanatu atu faatolu ia te ia e faamalosi ma loto tele (tagai Iosua 1: 6–9). Faatasi ai ma le faatuatua o le a faatasi le Atua ma i latou, na tautino atu ai le fanauga a Isaraelu: “O mea uma e te fai mai ai … matou te faia lava” (Iosua 1:16).
Ua tumu tusitusiga paia i tala o alii ma tamaitai o e na faaalia le loto tele maoae e faia soo se mea na poloai mai ai le Alii, e tusa lava pe foliga faigata se galuega, ma e tusa lava pe atonu na latou mananao e faavaivai.
O le a se mea e finagalo le Alii e te faia? E finagalo o Ia ia avea oe ma se afafine toa ma amio mama o le Atua, ma tautino atu e ola i aso taitasi ina ia e agavaa e mauaina ia faamanuiaga o le malumalu ma toe foi atu ia te Ia. I le lalolagi i lenei vaitaimi, o le a manaomia ai le loto tele. Ua ia te oe le ata o le faaolataga o le a mafai ai ona faia lea tulaga. O le filifiliga saoloto, po o le tomai e filifili ai, o se vaega taua o lenei fuafuaga. Ua maea ona e faia nisi o filifiliga lelei. Ae e te lei fanau mai, sa e faia se filifiliga e sau i le lalolagi ina ia maua se tino ma e faamautinoa atu oe lava. Ua maea ona e faia se filifiliga e papatiso, o le uluai sauniga lea e manaomia i le agai atu i le ala o le ola e faavavau. Ua e tofo nei i le olaga faaletino ma o loo faaauauina ai ona e faia ni filifiliga, aoao, ma tuputupu ae ai pea. O le osia o feagaiga paia ma le mauaina o sauniga o le malumalu o le isi lea laasaga taua i le fuafuaga.
Ae peitai, tamaitai talavou, ao outou tuputupu ae ma amata ona outou matutua, o le a atili tifato le auala, ma atonu o le a outou fiu. O le a sili atu ona faigata le olaga, o le a tumu i filifiliga ma faaosoosoga i soo se itu e te liliu i ai. O le a faaagi mai e Satani ia matagi o le le mautonu e mafua ai ona e ono fesiligia pe o le ala ea lea e te fia uia. Atonu e faaosoosoina oe e sui i se isi ala, e tusa lava pe o i ai faailo o tulaga matautia. Atonu e te masalosalo i lou tomai ma taumatemate e pei ona faia e se tasi o tamaitai talavou, “Pe mafai ea ona tumau ai i le mama i le lalolagi i lenei vaitaimi?” O le tali, au uo talavou e, o le “Ioe!” ma o la’u fautuaga ia te outou e talitutusa lava ma lena na tuuina atu e Winston Churchill i le taimi o le Taua Lona II a le Lalolagi: Aua, aua, aua lava nei faavaivai! (tagai- “Never Give In” [speech, Harrow School, London, England, Oct. 29, 1941]).
O le a manaomia e lenei tulaga le loto tele maoae, peitai o loo ia te outou Lana ata! O le a se mea o le a fesoasoani tou te mulimuli ai i le fuafuaga ma ia avea ai ma afafine totoa ma amio mama o le Atua? Muamua, ia maua se molimau malosi, ia faia i laa taitasi. Lona lua, saili le fesoasoani a le Tama Faalelagi, Iesu Keriso, o lou aiga ma isi o e e lagolagoina oe i au filifiliga e mulimuli i le fuafuaga. Ma le mea mulimuli, ola ina ia agavaa mo le mafutaga a le Agaga Paia.
E uiga i le taua o le mauaina o se molimau malosi, na folafola mai ai e Peresitene Thomas S. Monson i tamaitai talavou faapea, “O lau molimau, a oo ina fafagaina e le aunoa, o le a tausisia lou saogalemu” (Thomas S. Monson, “Ia Outou Maua le Lotototoa,” Liahona, Me 2009, 126).
O le a faamalosia lau molimau “e faasolosolo lava e ala mai i ou aafiaga. E leai se tasi e na te mauaina se molimau atoatoa i se taimi e tasi” (Faamaoni i le Faatuatua, 115). Tou te manatuaina ina ia mafai ona ausia le vaega pito i tu o le mauga, sa tatou faia e ala i laa taitasi. O le mauaina o se molimau, e tatau ona e fafagaina i laa taitasi. “[O lau molimau] o le a faateleina a o e faia filifiliga ina ia tausia poloaiga. A o e siitia ma faamalosiau atu i isi, o le a e vaaia lau molimau ua faaauau pea ona tupu. A o e [faatulagaina sau lava vaisu o le faia o tatalo, suesue i tusitusiga paia, usitai i poloaiga ma auauna atu i isi], o le a faamanuiaina oe i taimi o musumusuga lea o le a [faamausaliina] ai lau molimau” (Faamaoni i le Faatuatua, 115).
O le polokalama o le Alualu i Luma o le Tagata Lava Ia o le a tuuina mai ai se auala matagofie mo oe e fafagaina ai lau molimau i laa taitasi. O mea e fai ma galuega faatino o tulaga faatauaina o laa laiti ia o le a fafagaina lau molimau ia Iesu Keriso ao e aoao i Ana aoaoga ma faaaoga e le aunoa i lou olaga. O le fafagaina pea o le a e tumau ai ma le saogalemu i le ala.
Lona lua, saili le fesoasoani a isi e te maua ai se malosiaga faaopoopo ma le lagolagoina. Ia liliu muamua atu i lou Tama Faalelagi e ala i le tatalo. O oe o Lona afafine. Na te silafia ma alofa ia te oe. Na te faafofogaina ma tali mai i au tatalo. Ua aoaoina faafia i tatou e tusitusiga paia ina ia “tatalo e le aunoa” (tagai, mo se faataitaiga, MFF 90:24). Ao e tatalo, o le a faatasi le Alii ma oe e pei ona faatasi foi le Alii ma Iosua.
Tatou te manaomia taitoatasi le fesoasoaniga a le Faaola ina ia mulimulitai i le fuafuaga ma toe foi atu ai i lo tatou Tama o i le Lagi. Atonu na e faia ni mea sese pe na uia nisi auala. “E mafai ona e salamo, aua e alofa le Faaola ia te oe ma sa Ia ofoina mai Lona soifua mo oe … O le taulaga Togiola a le Faaola ua mafai ai ona faamagaloina au agasala” (Alualu i Luma o le Tagata Lava Ia o Tamaitai Talavou, 71). “O le vave ona e salamo, o le vave foi lea ona e mauaina ia faamanuiaga lea e oo mai ona o le faamagaloga” (Mo Le Malosi o le Autalavou, i. 30).
Filifili nei o le a e faia mea e manaomia e salamo ai. “Ai ma inu ma le agavaa i le faamanatuga i vaiaso taitasi ma faatumu lou olaga i gaoioiga mama o le a aumaia ai le mana faaleagaga. A e faia lenei mea, o le a atili malosi ai lou gafatia e tetee atu i faaosoosoga, tausi poloaiga, ma avea atili ai e faapei o Iesu Keriso” (Alualu i Luma o le Tagata Lava Ia o Tamaitai Talavou, 71).
O loo i ai perofeta o Aso e Gata Ai i le lalolagi ina ia fesoasoani atu foi ia te oe. O loo talanoa mai perofeta mo lenei vaitaimi. Ia gauai atu i a latou upu. O le a latou tuuina atu ia te oe ni faailo o le a lapataia ai oe i tulaga matautia ma tausia oe ia saogalemu i le ala. O faailo e patino lava ia te oe o loo maua i le Mo Le Malosi o le Autalavou. “Mulimuli i Perofeta; na te silafia le ala” (Tusipese a Tamaiti, “Mulimuli i Perofeta,” 58).
O le faatulagaina o i tatou i ni aiga o se tasi lea o faamanuiaga maoae o le fuafuaga. Ua ia te outou ni matua o e o i ai le atamai ma le poto masani sili atu o le a fesoasoani tou te ausia ai tulaga paia e tatau ona outou gafatia. Ia faatuatuaina i latou. Latou te mananao i le mea e sili atu mo outou.
Aoao mai lou tina, lou tinamatua ma isi tina amiotonu e i ai molimau malolosi. O le matafaioi o se tina i le fuafuaga o le avea lea ma se e faafaileleina. Tina, e leai lava se isi e alofa i lau tama teine e pei o oe. O oe o lona taitai, faufautua ma faataitaiga sili. Matou te faamoemoe o le a outou talia le valaaulia e galulue faatasi ma a outou fanau teine i le polokalama o le Alualu i Luma o le Tagata Lava Ia. E pei ona ou aoaoina mai lo ma galulue ai faatasi ma lo’u tina i le tulaga faatauaina o le mama, o le a faamalosia la oulua sootaga ma o le a faamanuiaina uma oulua i lo oulua alofa moni, lagolago ma le faamalosiauga.
Tamaitai talavou, ia filifili ni uo lelei o e o le a lagolagoina outou ia outou filifiliga amiotonu e mulimuli i le fuafuaga. E pei o Ruthie, o le sa tuuina atu ni faamalosiauga ia Caroline, matou te iloa o le toatele o outou e mafai ona faia le tele o mea e faamalosi ai e le tasi le isi. Pe a uma ona e mauaina le taui o le Aloaiaina o le Tulaga Faatamaitai Talavou, o lou avanoa la lea e avea ai ma “uso matua.” O le mauaina o lau asoa o le Pi Faamamaluina o le a e maua ai le avanoa e faamalosia ai se isi tamaitai talavou i au faataitaiga amiotonu ma lau molimau ao avea oe ma ana faufautua i lana polokalama o le Alualu i Luma o le Tagata Lava Ia.
Ma le mea mulimuli, ola ia agavaa mo le mafutaga ma le Agaga Paia. Ina ua ma fesoasoani ia Caroline, e vaavaai mo mea lelei o loo siomia ai i matou, ma na oo lava i le usuina o pese o le Peraimeri, sa matou valaauliaina le Agaga. Sa matou lagonaina le alofa, olioli ma le toafilemu, o fua ia o le Agaga (tagai i le Kalatia 5:22). O le a e manaomia lena toafilemu ma le faamautinoaga pe a taumafai Satani e faapopoleina oe i matagi o le masalosalo, pe faaosoosoina oe e suia se isi auala, pe ulagia pe faia foi e nisi ni upu le lelei e uiga i lou talitonuga.
Ou te fia faasoa atu se tulaga na oo ia Julie, o se tamaitai talavou na mafai ona taulimaina se luitau e ala i le mulimuli i musumusuga a le Agaga Paia. Ao ia suesue i le Feagaiga Tuai i se tasi aso na oo mai se manatu i lona mafaufau, “Faitau le Mataio e 5. Faitau le Mataio e 5.” Na ia mafaufau faapea, “Aisea na oo mai ai lea manatu ina ia faitau le Feagaiga Fou?” Na ia faatinoina loa lena musumusuga ma faitau i le Mataio, “Ia outou alolofa atu i e ua ita mai ia te outou, ia outou faamanuia atu i e ua fetuu mai ia te outou, ia outou agalelei atu i e ua inoino mai ia te outou, ia outou tatalo foi mo e ua tuuai fua mai ma faasaua mai ia te outou” (Mataio 5:44).
I le aso na sosoo ai, sa i ai ni faafitauli ma ana uo o e sa agaleaga ma faalataina o ia. I le taimi muamua, sa matua le fiafia, ona ia manatu lea, “Sa saunia au mo lenei mea. Na musuia au e le Agaga e faitau le Mataio ma e tatau ona ou alofa ma tatalo mo a’u uo.” O se laa laitiiti e faitauina ia mau, na saunia ai o ia e tali atu i se auala faaKeriso. Mai lena aafiaga, sa faamautinoa atu ai ia te ia e silafia o ia e le Alii ma e ala i musumusuga a le Agaga Paia, na ia iloa ai le mea e tatau ona ia faia.
A’u tamaitai talavou pele, ua ou feiloai atu i le toatele o outou, o ē, e pei lava o Julie, na lē faavaivai ina ua feagai ma ni tulaga faigata, ae na filifili e mulimulitai i le fuafuaga. Ou te tatalo o le a faaauau pea ona outou faamalosia a outou molimau i laa taitasi. Saili le fesoasoani a lo tatou Tama Faalelagi, Iesu Keriso, perofeta, ma isi o e o le a lagolagoina oe i au filifiliga e mulimuli i le fuafuaga. Ola i se olaga mama ina ia e maua le mafutaga ma le Agaga Paia e taitai saogalemu ai oe. Ou te molimau atu pe a outou faia nei mea, o le a mafuta le Alii ma outou ma o le a mafai ona outou tumau ai i le ala lea e taitaiina atu ai i le malumalu ma le ola e faavavau. “Ia e faamalosi ma loto tele” (Iosua 1: 9) ma aua, aua, aua lava nei faavaivai! I le suafa o Iesu Keriso, amene.