Kaumeʻa ki he Kaumeʻa
Teuteu ki he Ngāue Fakafaifekau
“Teuteu homou lotó ki he ʻEikí” (1 Samuela 7:3).
Hili ha ngaahi taʻu lahi mei hono papitaiso hoku fāmilí, naʻe maʻu meʻatokoni hoʻatā maʻu pē e kau faifekaú ʻi homau ʻapí. Ne u ako ke ʻofa he kau faifekaú, pea naʻá ku fie maʻu ke u hangē ko kinautolú.
Naʻe ui au ʻi hoku taʻu 11 ʻe he pīsopé ke ma ʻinitaviu ʻi hono ʻōfisí. Naʻá ne pehē mai, “ʻUlise, kuo taimi ke ke kamata teuteu ki haʻo ʻalu ʻo ngāue fakafaifekau.” Naʻá ku ʻohovale he ko hoku taʻu 11 pē ia! Ka naʻá ne pehē mai, “ʻOku totonu ke ta kamata e teuteu ko iá he taimí ni.”
Naʻe pehē mai ʻeku pīsopé, “ʻE ʻai pē mo u ʻinitaviu koe ke sio ki hoʻo fakalakalaká.” ʻOsi ko iá naʻá ne fai mai ha fakahinohino. Naʻá ne akoʻi au fekauʻaki mo e ngaahi fekaú, lakanga fakataulaʻeikí, moʻui tāú, mo e faitotonú. Ne ongo moʻoni ʻeni kiate au he naʻá ne sio mai ki hoku matá peá ne pehē mai, “Te ke ngāue fakafaifekau ʻo kapau te ke muimui ʻi he ngaahi fakahinohino ʻoku ou ʻoatu kiate koé.”
Ne u manatuʻi maʻu pē ʻene ngaahi leá, kae tautautefito ki he taimi naʻá ku fehangahangai ai mo ha faingataʻa. Hangē ko ʻení, naʻe ʻi ai e taimi ʻe taha naʻe ʻomai ai heʻeku faʻeé ha paʻanga ke u ʻalu mo ia ʻo fakatau mai ʻaki ha fuaʻiʻakau mei falekoloa. Heiʻilo pe naʻe anga fēfē ka naʻe fakafoki mai ʻe he faifakataú ha paʻanga naʻe lahi ange ia he paʻanga naʻá ku ʻoange ke totongiʻaki e fuaʻiʻakaú. Ne u kamata lue mai ki ʻapi, pea ʻi heʻeku ʻai hake hoku nimá, ne u sio hifo ʻoku lahi ange e paʻanga ia aí he paʻanga ne u ʻalu mo iá.
Naʻe feinga ʻa Sētane ke fakalotoʻi au ke u tuku pē e paʻangá maʻaku. Ne u fakakaukau ʻo pehē, “ʻOku ʻi ai ʻeku paʻanga ke faiʻaki ha meʻa pē te u loto ki ai, pea te u fakafoki e fetongi totonú ki heʻeku faʻeé.” Hili ko iá ne u pehē, “ʻIkai, ʻoku ʻikai ko e meʻa ia naʻe talamai kiate au ʻe he pīsope. ʻOku fie maʻu ke u faitotonu ka u hoko ko ha faifekau.” Ne u ongoʻi e Laumālié he taimi ko ʻení peá u foki ki he falekoloá ke fakafoki e paʻangá. Ne u ongoʻi lelei ʻi hoku lotó. Ne u fakakaukau ʻo pehē, “Naʻá ku faitotonu, naʻá ku talangofua ki he ngaahi fekaú, pea ʻoku ou teuteu ki haʻaku ngāue fakafaifekau. Te u hoko ko ha faifekau, pea ʻoku fie maʻu ke u faitotonu.”
ʻI he taimi ne u ako ai he akoʻanga māʻolungá, naʻá ku ngāue ke tānaki ha paʻanga ki heʻeku ngāue fakafaifekaú. Naʻe masiva ʻeku ongomātuʻá ʻo ʻikai ke na lava ke totongi e meʻa kotoa pē. Naʻe ʻikai ke lahi e paʻanga naʻá ku maʻú, ka ʻi he hili ʻeku totongi vahehongofulú, ne u fakakaukau ke u fakatau he māhina kotoa pē hoku vala ki heʻeku ngāue fakafaifekaú. ʻI he māhina ʻe taha ne u fakatau mai ai ha sote, māhina ʻe taha ko e hēkesi, māhina ʻe taha ko ha toe sote. Lolotonga e ngaahi taʻu ko ia ʻe tolú, kuó u maʻu ha paʻanga feʻunga ke fakatauʻaki e meʻa kotoa pē naʻá ku fie maʻú. Ne u tuku makehe ha paʻanga ke totongi ki heʻeku ngāue fakafaifekaú. Ne u ako ʻa e tefitoʻi moʻoni ʻo hono tuku ha paʻangá. Ne u ako e tefitoʻi moʻoni ʻo e talangofua ki he fono ʻo e vahehongofulú mo e lahi ʻo e ngaahi tāpuaki ʻoku tau maʻu ʻi he taimi ʻoku tau totongi vahehongofulu aí.
Ko ha meʻa fakaʻofoʻofa moʻoni ne u aʻusia ʻi heʻeku ngāue fakafaifekaú he naʻe tokoni ia ke mahino kiate au e ngaahi tefitoʻi moʻoni ʻo e moʻuí mo e founga ke u moʻuiʻaki e ongoongoleleí ʻi he ngaahi meʻa ʻoku ou fai fakaʻahó.
ʻE fānau tangata mo fefine, mou teuteu ki ha ngāue fakafaifekau lelei pea mo ha moʻui ʻoku leleí. ʻOku fakatatali ʻa e ʻEikí ke foaki mai kiate kitautolu ʻa e ngaahi tāpuaki kotoa pē ʻoku tau fie maʻú.