NGAAHI ONGOONGO FAKAMĀMANILAHÍ

Fakatahaʻanga Siasi hono 100 Kuo Fokotuʻu ʻi Taiuaní

Hili hono fokotuʻu ʻo e Kolo Mingisiení ʻi Mē 2008, kuo aʻu ki he 100 e ngaahi fakatahaʻanga ʻa e Siasí ʻi Taiuaní. Ko Mingisiení ko ha kiʻi kolo siʻisiʻi ʻi he lotoloto ʻo Taiuaní. ʻOku ʻi he ngaahi ʻiuniti ko ʻeni ʻe 100 ha kāingalotu ʻoku ofiofi ki he 50,000.

Naʻe tūʻuta e fuofua kau faifekaú ʻi he konga ki mui ʻo e ngaahi taʻu 1950, pea naʻe faʻa fakafatongiaʻaki e kau faifekaú ke nau taki ʻi he ngaahi fakatahaʻangá. ʻI he ʻaho ní ʻoku ui e kau takí mei he kāingalotú.

Langa ʻe ha Fakataha mo e Kau Fai Ongoongo ʻi Falaniseé ha Vā Fetuʻutaki, Mafola ʻa e Ongoongoleleí

Naʻe fokotuʻutuʻu ʻe he kau taki fakasiteiki ʻi Lioni, Falaniseé ha fakataha mo e kau fai ongoongó fekauʻaki mo e founga tauhi lēkooti foʻou ʻo e FamilySearch. Naʻa nau ngāueʻaki e ʻaho 13 ʻo Meé, 2008, ke ʻoatu e tokāteline ʻo e Siasí ki he kau faiongoongo fakalotofonuá mo e kau taki ʻi he ngaahi koló ʻi heʻenau fakamatalaʻi e mahuʻinga ʻo e hisitōlia fakafāmilí ʻi he moʻui ʻo e kāingalotu ʻo e Siasí mo e tefitoʻi moʻoni ʻo e ngaahi fāmili taʻengatá. Naʻe pehē ʻe Taniela Moselini ko e palesiteni ʻo e Siteiki Lioni Falanisē, “Naʻe ʻi ai e tokanga lahi e niʻihi naʻe ʻi he fakatahaʻanga.”

Maʻu ʻi he ʻInitanetí ʻi he lea faka-Hōlani, Tenimaʻake mo Hungalí ʻa e Ngaahi Folofola ʻe Tolú

Kuo lava ʻeni ke maʻu ʻa e ngaahi folofola ʻe tolú ʻi he lea faka-Tenimaʻake, Hōlani mo faka-Hungalí ʻi he ʻInitanetí ʻi he http:// scriptures.lds.org. ʻOku maʻu ʻi he folofolá ʻa e ngaahi futinouti, tokoni fakafolofola, mape, ngaahi tā pea malava ke fakaʻilongaʻi ʻe ha ngaahi potufolofolá. Ke tokoni ke tokolahi ange e kāingalotú ʻoku nau maʻu ʻa e folofolá, naʻe fokotuʻu ʻe he Siasí ki muʻa e ngaahi folofolá ʻi he ʻinitanetí ʻi he lea faka-Pilitāniá, Falaniseé, Siamané, ʻĪtalí, Potukalí mo e faka-Sipeiní. ʻOku lolotonga fai e ngāue ke lava ʻo fokotuʻu ki he ʻInitanetí ʻa e ngaahi folofola ʻoku ngāueʻaki ʻe he Siasí ʻi ha ngaahi lea fakafonua ʻe uofulu mā fā nai.

Ngāue Tokoni Ha Kau Fineʻofá ʻi he Fakaʻosinga e Uiké

Naʻe fakaʻaongaʻi ʻe he Kau Fineʻofa ʻo e Siteiki Fauniteni Kololató ʻi Kololato Sipilingi, Kololato, ʻAmeliká, ʻa e fakaʻosinga ʻo e uike hono ua ʻo Meé ke kili, sanipepaʻi, tuitui mo ngāue tokoni. Hili haʻanau toʻo toto ki he pangikē toto fakakoló, naʻe fakatahatahaʻi ʻe he Kau Fineʻofá ha ngaahi nāunau fakafiemālie ʻe 200 mo hokohoko ha ngaahi kafu ʻe 40 ʻo foaki ki he Kolosi Kulá.

Naʻa nau foaki atu foki mo ha ngaahi papa vaʻinga ne lahi hake he 500, ngaahi monomono ʻe 25 mo ha ngaahi tamapua ʻe 82 ki he Senitā Tokoni ʻOfa Fakaetangata ʻa e Siasí, fakataha mo ha ngaahi vala foʻou ʻe 187.

ʻAʻahi ki he www.lds.org/ humanitarianservices pe telefoni ki he 1-801-240-5954 ki ha fakamatala fekauʻaki mo e foaki ki he Ngaahi Ngāue Tokoni ʻOfa Fakaetangatá.