VAHEHONGOFULÚ MO E NGAAHI FOAKÍ
Te u Saiʻia Ange ke Fai Tāpuekina Au!
[Loto fiemālie] ke totongi vahehongofulu kakato. ʻAlu ki he fakamāʻopoʻopo vahehongofulú. Talangofua ki he fono ʻo e ʻaukaí.
ʻOku talanoa e toʻu tupu ʻo e Siasí ʻo Kaianá, ko ha fonua ʻoku tuʻu ʻi he feituʻu fakatokelau ʻo ʻAmelika Tongá, fekauʻaki mo e vahehongofulú mo e ngaahi foakí.
Lolotonga ha lēsoni semineli ʻi he falelotu ʻo Palasati Nekaá ʻi Siositauni, ʻoku pehē ʻe Saimone Lavolo, taʻu 14, “Te u saiʻia ange ke fai tāpuekina au!” Ko e toki ʻosi ia hono lau ʻe he kalasí ʻa e Malakai 3:8–12, ʻa ia ʻoku fakatokanga mai ai ko kinautolu ʻoku nau kaihaʻa mei he ʻOtuá ʻi he ʻikai ke nau totongi vahehongofulú te nau malaʻia, ka ʻoku talaʻofa mai ʻe lahi ʻaupito e ngaahi tāpuaki ʻo kinautolu ʻoku totongi vahehongofulú ʻo ʻikai faʻa lava ʻo tānaki.
ʻOku pehē ʻe he taʻahine taʻu 16 ko Siani Kipini ʻi heʻene kalasí, “Vakai ki he ngaahi meʻa ʻoku talaʻofa maí. ʻE maluʻi koe. Te ke tuʻumālie. ʻE fakaava mai ʻa e ngaahi matapā ʻo e langí kiate koe.”
ʻOku pehē ʻe he tamasiʻi taʻu 17 ko Kilini Kalenitā, ʻo e Kolo Kāteni Paʻake Uá (ʻoku tuʻu foki mo ia ʻi Siositauni), “Ko e meʻa kotoa pē ʻi he māmaní ʻoku mei he Tamai Hēvaní ia. Ko e kiʻi konga siʻi pē ʻokú Ne kole mai ke fakafoki angé ke tokoni kiate kitautolu ʻi hono fakahā ʻo ʻetau loto houngaʻiá. Ko ia ʻoku ou fiefia ai ke totongi vahehongofulu. ʻOku ou fiefia ke ʻaukai tuʻo taha ʻi he māhina ke tokoni ki he masivá. Pea ʻi he taimi ʻoku ou mamata ai ki he meʻa kotoa ʻoku fai ʻe he Siasí ʻi ha tō ha sunami, afā, pe ha fakatamaki kehe—ʻa e vala mo e meʻakai kātoa ko ia ʻoku foaki ʻe he Siasí—ʻoku ou fiefia ke fakakaukau atu ʻoku lava ke u hoko ko ha konga ʻo e ngāue ko iá ʻi heʻeku fai ha foaki ʻoku lahí.”
ʻI ha feituʻu ʻe taha ʻi he Misiona ʻInitīsi Hihifó, ʻoku fakamatala ai ʻe he taʻahine taʻu 17 ko Kēfiu ʻAlí ki he tamasiʻi taʻu 17 ʻe taha ko Maʻake Mengikuleí ʻi he Kolo ko ʻAlimá ʻi he Taulanga ʻo Sipeiní ʻi Tulinitati, neongo ko e kiʻi paʻanga siʻisiʻi pē ʻokú ne maʻu heʻene ngāué, ka ʻokú ne totongi e peseti ʻe 10 ʻo ʻene tupú ko e vahehongofulu pea totongi mo e foaki ʻaukaí foki. ʻOkú ne pehē, “ʻI he founga ko iá, ʻoku ou ʻiloʻi ʻoku tauʻatāina ai ʻa e ʻEikí ke Ne tāpuakiʻi au.” Naʻá ne talanoa kia Maʻake fekauʻaki mo e fakamāʻopoʻopo vahehongofulú mo ʻene ongoʻi fiefia ʻi he lava ke ne fakahā kuó ne totongi vahehongofulu kakató.
Naʻe sio hifo ʻa Maʻake ki ha laʻi foomu vahehongofulu naʻe teʻeki ai ke fakafonu, ʻo ne lau ia peá ne pehē ange, “ʻOkú ke moʻoni, Kēfiu. Te u haʻu mo ʻeku vahehongofulú ki he lotú ʻapongipongi.”