Taimi Feʻinasiʻakí
Te u Hoko ko ʻEne Tamaioʻeiki
“Ko ia, ko kimoutolu ʻoku kamata ke fai ʻa e ngāue ʻa e ʻOtuá, mou tokanga ke mou tauhi kiate ia ʻaki homou lotó, iví, ʻatamaí mo e mālohí kotoa, koeʻuhí ke mou tuʻu taʻehalaia ʻi he ʻao ʻo e ʻOtuá ʻi he ʻaho fakaʻosí” (T&F 4:2).
Naʻe ʻalu ha faifekau Nīfai maʻongoʻonga ko ʻĀmoni ki he fonua ʻo e kau Leimaná ke “fakahā kiate kinautolu ʻa e folofola ʻa e ʻOtuá” (ʻAlamā 17:12). ʻI he hū atu ʻa ʻĀmoni ki he fonuá, naʻe haʻi ia ʻe he kau Leimaná ʻo ʻave ki he tuʻí. Naʻe ʻeke ange ʻe he tuʻí kia ʻĀmoni pe naʻá ne fie nofo ʻi he fonuá. Naʻe kole ange ʻe ʻĀmoni ki he tuʻí pe ʻe lava ʻo hoko ko ʻene tamaioʻeiki.
Naʻe ngāue ʻa ʻĀmoni ki he tuʻí ʻaki hono lotó, iví, ʻatamaí, mo e mālohí kotoa. Naʻá ne fakahā ʻa e ʻofa ki he kakaí. Naʻá ne ngāueʻaki hono mālohí ke maluʻi e fanga sipi mo e kau tamaioʻeiki ʻa e tuʻí. Naʻá ne ngāueʻaki hono ʻatamaí ke ako e ongoongoleleí pea vahevahe ia mo e tuʻí. Naʻá ne ngāueʻaki hono iví ke tuʻu maʻu mo taʻeueʻia ʻi hono moʻuiʻaki ʻo e ongoongoleleí. (Vakai, ʻAlamā 17–18.)
ʻOku fakamanatu mai ʻe he ngaahi lea ʻo e hiva Palaimeli ko e “Te u Lototoʻá” (Tohi Hiva ʻa e Fānaú, 85) ke tau hangē ko ʻĀmoní.
ʻOku fie maʻu ʻe he ʻEikí ha kau tamaioʻeiki lototoʻa,
Ke fai ʻene ngāue [ʻi he ʻaho kimui ní],
Muimui [ki he ngaahi akonaki ʻa Sīsū]
[Pea tokoniʻi hono kakaí ʻi ha founga ʻofa].
ʻE lava ke tau ako ke tokoni ki he niʻihi kehé ʻo hangē pē ko ʻĀmoní. ʻE lava ke tau fakahā ʻa e ʻofá kiate kinautolu ʻoku tau feohí kae tautautefito ki hotau fāmilí mo e kaungāmeʻá. Te tau lava ʻo ngāueʻaki hotau iví ke fai ha ngaahi meʻa ʻoku lelei hangē ko e angaʻofá pe tokoní. Te tau lava ʻo ngāueʻaki hotau ʻatamaí ke ako e ongoongoleleí ʻaki hono lau e folofolá pea fakafanongo ki heʻetau mātuʻá mo e kau faiakó. Te tau lava ʻo fili ke tau tuʻu maʻu mo taʻeueʻia ʻi hono fai ʻo e ngaahi meʻa ʻoku totonú.
[Te u] hoko ko ʻene tamaioʻeiki
[Pea] fai ki he fuakavá.
Mo mateaki ʻi he lototoʻa.
ʻE falala mai ai ʻa e ʻEikí.
ʻEkitivitií
Kosiʻi ʻo toʻo e ongo laʻipepa fuopotopoto fuolōloá, fakafesituʻaʻaki e ongo laʻi pepá ʻo fakapipiki fakatahaʻi kinaua. Kosiʻi ʻo toʻo e ngaahi konga ʻe fā ʻoku ʻikai tapafā tataú, pelu ua kinautolu pea fakapipiki fakataha ʻa e tafaʻaki ki muí ke maʻu mei ai ha ngaahi tapafā. Kosiʻi ʻo toʻo e foʻi siakalé ke ngaohiʻaki e konga ki ʻolunga ʻo e mopailá, pea fakaavaava he ngaahi feituʻu ʻoku fakahā atú. Fakapipiki hao laʻitā pe tā ha fakatātā ʻoʻou ʻi he ʻesia fuolōloá. Fakaava e tafaʻaki ki ʻolunga ʻo e ʻesia fuolōloá pea ʻi he foʻi tapafā takitaha ʻe faá. Fakaʻaongaʻi ha konga afo pe kulasi ke fakakakatoʻaki e mopailá. Tautau e mopailá ʻi he feituʻu te ne fakamanatu atu ai kiate koe ke ke tauhi ki he ʻEikí mo tokoni ki he niʻihi kehé.