FAKAFIEFIÁ MO E MĪTIÁ

Fili ʻa e fakafiefia ʻoku [langaki moʻuí]. Fakaʻehiʻehi mei ha faʻahinga fakafiefia pē ʻoku fakaʻaongaʻi ai ha lea kapekape, tōʻonga ʻuli, fakeʻikeʻi, pe [ponokalafí]. Tukupā ke tauhi ki he ngaahi tuʻunga moʻui pe ʻulungāanga ʻo e ʻOtuá.

Tupu mei he lahi e ngaahi fakafiefia kehekehe ʻoku hoko takatakai ʻiate kitautolú, ʻe lava pē ke faingataʻa e ngaahi fili ke tau faí. Ko ha ngaahi fakahinohino ʻeni ke tokoni kiate kitautolu ʻi hono fili ʻo e ngaahi fakafiefia ʻoku langaki moʻuí:

1. Ki muʻá peá ke vaʻinga ʻi ha keimi vitiō pe sio ʻi ha foʻi faiva, fekumi ki hono fakakalakalasí mo e meʻa ʻoku ʻasi aí.

2. Fehuʻi hifo pē kiate koe pe ʻoku feʻunga e ngaahi meʻa ʻoku ʻasi ʻi he keimí pe foʻi faivá, neongo pe ko e hā hano fakakalakalasi. Fakaʻehiʻehi mei ha faʻahinga meʻa te ne tuli ʻa e Laumālié.

3. Kapau ʻoku taʻefeʻunga e meʻa ʻoku ʻasi aí, ʻoku ʻikai hano kovi ke ke hū ki tuʻa mei ai, tāmateʻi, pe tuku ia.

4. Kumi e ngaahi keimi, faiva, mo e mūsika lelei ʻa ia te ne fakamāmaʻi foki mo ho ʻatamaí.

5. ʻIlo ki he ngaahi meʻa ʻoku hoko ʻi māmaní ʻo mavahe mei he televīsoné, telefoni toʻotoʻó, mo e komipiutá, ʻo hangē ko e lue lalo, heka pasikala, ako ha poto fakaengāue foʻou, pe ako ki he ngaahi ʻulungāanga fakafonua kehé.

6. Fiefia ʻi he ngaahi ʻekitivitī ʻoku ngaue ai ho ʻatamaí pea moʻui lelei mo ho sinó.

Ko e hā e ngaahi tuʻunga moʻui ʻa e ʻOtuá te ne lava ʻo fakahinohino kitautolu ʻi heʻetau fili e mītiá ke fakaʻaongaʻí? “Kapau ʻoku ʻi ai ha meʻa ʻoku māʻoniʻoni, fakaʻofoʻofa, pe ongoongolelei pe feʻunga mo hono vikivikiʻí, ko e ngaahi meʻa ia ʻoku mau fekumi ki aí” (Ngaahi Tefito ʻo e Tui 1:13).