LAKA ATU ʻI HE TUI
ʻOku Hanga Atu ʻa e Māmaní Kiate Kimoutolu
[Tauhi moʻoni] ki he ʻEikí mo Hono Siasí. [Lotu lilo maʻu pē] mo lau e folofolá. Tauhi ʻa hoʻo ngaahi fuakavá mo [fakaongoongo] ki he ngaahi fanafana ʻa e Laumālié. ʻE tokoniʻi koe ʻe he ʻEikí ke ke matuʻuaki ʻa e ngaahi ʻahiʻahí mo e ngaahi faingataʻá.
Ko e taimi ʻeni ke laka atu ai ki muʻa ʻi he tuí. Ko e taimi ke tauhi ai e ngaahi fekau ʻa e ʻOtuá. Ko e taimi ke ke ngāueʻaki ai hoʻo tuí ʻaki hoʻo faʻa lotu mo talangofua. ʻI hono ngāueʻaki hoʻo tuí ʻo muimui totonu ki he ngaahi tuʻunga moʻui ko ʻení, te ke ʻiloʻi ai te ke fiefia pea maʻu mo ha ngaahi faingamālie lahi ange ke vahevahe ʻa e ongoongoleleí mo e ngaahi meʻa ʻokú ke tui ki aí mo e niʻihi kehé. Te ke tauʻatāina ʻi hoʻo moʻuiʻaki ʻa e ngaahi tuʻunga moʻui ko ʻení, ka ʻoku ʻikai ko haʻane fakangatangata e ngaahi meʻa ke ke faí.
ʻI hoʻo laka atu ki muʻa ʻi he tuí, te ke maʻu ʻa e ngaahi tāpuaki kuo talaʻofaʻakí pea ʻe lilingi hifo ʻe he ʻEikí ʻa Hono Laumālié kiate koe. ʻI hono tataki koe ʻe Hono Laumālié, te ke ʻiloʻi ai ʻa e meʻa ke faí mo e founga hono tali ʻo e ngaahi tūkunga kotoa pē, pea te ke tauhi ai hoʻo fuakava ʻi he papitaisó ke ke manatu maʻu ai pē kiate Iá.
Kuo fai e kole ki he kau taki ʻo e toʻu tupú ʻi he toʻu kotoa pē ke nau ngāueʻaki ʻenau tuí pea ke nau matuʻaki talangofua. Naʻe ngāueʻaki ʻe Nīfai, Siosefa Sāmita, Lute, mo ha niʻihi tokolahi ʻa e tuí ʻi heʻenau talangofua ki he ʻEikí mo ʻEne kau palōfitá.
Ko e toʻu tupu kimoutolu ʻo ha talatukufakaholo fakaʻeiʻeiki, ko ha toʻu tangata fakaʻeiʻeiki, pea mo ha toʻu tangata ne kikiteʻi. ʻE fakahoko ʻe hoʻomou tuí ha lelei lahi ʻi ha māmani ʻoku fekumi ki he leleí mo e māmá. ʻOku hanga atu ʻa e māmaní kiate kimoutolu ke maʻu mei ai ha faʻifaʻitakiʻanga mo ha tataki. Ko ia, “tuku ke ulo pehē hoʻomou māmá ʻi he ʻao ʻo e kakaí, koeʻuhí ke nau mamata ki hoʻomou ngaahi ngāue leleí, pea fakamālōʻia ʻa hoʻomou Tamai ʻa ia ʻoku ʻi he langí” (Mātiu 5:16).