Tokoni pea Fiefia
“Ke ke fai hoʻo ngāue kotoa pē ki Saione” (T&F 24:7).
Naʻe laulau pē ʻa Sionatane mo heka hake ki he kaá ʻo tangutu he tafaʻaki ʻo hono tokoua ko Maiká. Naʻá ne fie nofo pē ia ʻi ʻapi ʻo vaʻinga he foʻi keimi foʻou naʻe fakatau mai ʻi hono ʻaho fāʻeleʻí he uike kuo ʻosí. Ka naʻe vili ʻene faʻeé ke nau ō kātoa ki he falelotú ʻo tokoni ʻi he ʻaho fakamaʻa ʻo e uōtí.
ʻI he tokoni ʻa Sionatane ki heʻene faʻeé ke fakaheka ʻenau vekiumé ki he kaá, naʻá ne fehuʻi ange, “Ko e hā e meʻa ʻoku tau ō aí?”
Naʻá ne malimali pē mo pehē ange, “ʻE fakafiefia. Pea ko e tahá, ʻoku tau fakaʻaongaʻi kotoa pē e falelotú. Ko ia ko e meʻa totonu pē ke tau faʻa tokoni ki hono fakamaʻa iá.”
Naʻe sio pē ʻa Sionatane ki tuʻa he sioʻatá ki he heʻenau fakalaka he ʻū falé mo e ʻuluʻakaú ʻi heʻenau lele ki ʻapisiasí. ʻI he tau hifo pē ʻa ʻene faʻeé he tauʻanga meʻalelé, naʻe ʻohovale ʻa Sionatane he sio atu ʻoku tau mai ʻa Misa Loasoni ʻo hoko mai pē ki heʻenau meʻalelé.
Naʻe fifili ʻa Sionatane, “Ko e hā e meʻa ʻa Misa Loasoni ʻoku fai hení?”
Ne fuʻu puke lahi ʻa Misa Loasoni ki muí ni mai ʻi he faʻahinga kanisā naʻe ui ko e lukīmiá. Naʻe fuoloa ʻene tokoto ʻi falemahakí. Naʻe manatuʻi ʻe Sionatane hono poupouʻi ia mo Maika ʻe heʻena mātuʻá ke na lotua ʻa Misa Loasoni ʻi heʻenau ngaahi lotu fakatāutaha mo fakafāmilí. Ko e taimi siʻi pē ʻeni e ʻatā mai ʻa Misa Loasoni mei he falemahakí.
Naʻe saiʻia maʻu pē ʻa Misa Loasoni ʻia Sionatane. Naʻá ne motuʻa ange ia ʻi he ongo kuitangata ʻa Sionatané, ka naʻá ne faʻa talanoa kia Sionatane mo ʻeke ange pe naʻe fēfē e akó mo ʻene timi sipotí. Naʻe ʻi ai e taimi ʻe taha naʻá ne ʻalu ai ki he taha ʻo e ngaahi vaʻinga ʻa Sionatané.
ʻI he hifo ʻa Sionatane mei he kaá, naʻe taʻalo mai ʻa Misa Loasoni mo pehē ange, “Mālō e lelei, Sionatane.” Naʻe takai hake ʻa Misa Loasoni ki mui heʻene kaá ʻo toʻo mei ai ha vekiume. Naʻá ne teke pē ʻa e vekiumé mo luelue māmālie ki falelotu.
Naʻe ui ange ʻene faʻeé, “ʻE Sionatane, ʻe lava ke ke tokoni mai heni?” Naʻá ne feinga ke toʻo e vekiumé mei mui he kaá.
Naʻe pehē ange ʻe Sionatane, “ʻIo, fineʻeiki.” Naʻá ne tokoni kiate ia ʻi hono toho vave ki tuʻa e vekiumé pea teke fakavave atu ia mei he tauʻanga meʻalelé.
ʻI he efiafi kotoa ko iá ne ngāue pē ʻa Sionatane mo Maika he tafaʻaki ʻo Misa Loasoní. Ne taimi lahi e helaʻia ʻa Sionatane pea tuʻu ʻo mālōlō, ka naʻá ne fakatokangaʻi naʻe kei hoko atu pē e ngāue ʻa Misa Loasoní. Pea naʻá ne malimali foki! Naʻe pehē ʻe Misa Loasoni, “Meʻa lelei ko e lava ke te tokoni ē?”
Naʻe ongoʻi ʻe Sionatane naʻe ʻi ai ha meʻa naʻe liliu ʻi hono lotó. Naʻá ne fakakaukau ʻo pehē, “Kapau ʻoku lava ke fiefia ʻa Misa Loasoni he taimi ʻoku tokoni aí, ʻe lava ke u fiefia mo au.” Naʻe kamata ke ne toe ngāue mālohi ange.
ʻI heʻenau foki ki ʻapí naʻe pehē ange ʻene faʻeé, Mālō hoʻomo ō mo aú.”
Naʻe pehē ange ʻe Sionatane, “Sai pē ia. Kātaki pē heʻeku lāunga he haʻú. Naʻe ʻikai te u ʻilo ʻe au ʻe lahi e meʻa te te lava ʻo ako mei heʻete vekiumé.”