Ki Hono Fakamālohia ʻo e Toʻu Tupú
Ko Hono Fakahoko Hotau Fatongia ki he ʻOtuá
Tauʻatāina ke Filí mo e ʻEkea Meiate Kita ʻa e Meʻa ʻOkú te Fai pe Taʻe Faí
Fili ki he māʻoniʻoní mo e fiefiá, neongo pe ko e hā ʻa e tūkunga ʻokú ke ʻi aí. [Fatongiaʻaki e ngaahi fili ʻokú ke faí]. Fakatupulaki e ngaahi meʻa ʻokú ke lavá mo ho ngaahi talēnití, pea fakaʻaongaʻi kinautolu ki he leleí. Fakaʻehiʻehi mei he fakapikopikó peá ke [loto fiemālie] ke ngāue mālohi.
Loto Fakafetaʻí
Maʻu ha laumālie ʻo e loto fakafetaʻi ʻi he meʻa kotoa pē ʻokú ke fai mo leaʻakí. Fakamālō ki he ʻOtuá ʻi he ngaahi tāpuaki ʻokú ke maʻú pea fakahā mo e houngaʻia ki he niʻihi kehe ʻoku nau tokoniʻi koé.
Akó
Teuteu ke hoko ko ha tākiena leleí ʻi he māmaní. Ako pea loto vēkeveke ke ako. ʻAlu ki he seminelí.
Fāmilí
Fai ho fatongia ʻoʻoú ke fokotuʻu ha ʻapi fiefia. Fakaʻapaʻapa ki hoʻo mātuʻá, pea fakamālohia ho ngaahi vā fetuʻutaki mo ho ngaahi tokoua mo e tuofāfiné.
Ngaahi Kaungāmeʻá
Fili hao ngaahi kaungāmeʻa ʻoku mou feʻinasiʻaki ʻi ho ngaahi tuʻunga ʻulungāanga māʻolungá. Anga lelei mo anga fakaʻapaʻapa ki he tokotaha kotoa pē. Fakaafeʻi ho ngaahi kaungāmeʻa [mei he] ngaahi tui fakalotu kehé ki he ngaahi ʻekitivitī ʻa e Siasí. Ala atu ʻo tokoniʻi e kau papi ului foʻoú pea mo kinautolu ʻoku māmālohí.
Teungá mo e Fōtungá
Teunga taau ke fakahāʻaki hoʻo fakaʻapaʻapa ki he ʻOtuá pea mo koe foki. ʻOua naʻá ke teitei tuku hifo ʻa e tuʻunga taau ʻo ho teungá koeʻuhí ko ha faʻahinga meʻa pē ʻoku hoko. ʻOua te ke maumauʻi ho fōtungá ʻaki ʻa e ngaahi tā-tataú [pe] hoka fakaavaava ʻo ho sinó.
Fakafiefiá mo e Mītia
Fili ʻa e fakafiefia ʻoku [langaki moʻuí]. Fakaʻehiʻehi mei ha faʻahinga fakafiefia pē ʻoku fakaʻaongaʻi ai ha lea kapekape, tōʻonga ʻuli, fakeʻikeʻi, pe [ponokalafí]. Tukupā ke tauhi ki he ngaahi tuʻunga moʻui pe ʻulungāanga ʻo e ʻOtuá.
Hivá mo e Hulohulá
Fakafanongo ki he ngaahi hiva ʻokú ne tokoniʻi koe ke ke toe ofi ange ai ki he Tamai Hēvaní. ʻOua te ke fakafanongo ki he ngaahi hiva ʻokú ne poupouʻi ʻa e angaʻulí, fakahīkihikiʻi ʻa e fekeʻikeʻí, pe fakaʻaongaʻi ha ngaahi lea taʻefeʻungá. ʻI he taimi ʻokú ke hulohula aí, fakaʻehiʻehi mei he hulohula pipikí pe ngaahi [founga] hulohula ʻokú ne fakatupu ha ongo fakasekisualé.
Leá
Fakaʻaongaʻi ʻa e ngaahi lea ʻokú ne langaki hake, poupouʻi mo fakahīkihikiʻi ʻa e niʻihi kehé. Fakaʻaongaʻi maʻu pē ʻa e huafa ʻo e ʻOtuá mo Sīsū Kalaisí ʻi he loto ʻapasia mo e fakaʻapaʻapa. ʻOua naʻá ke fakaʻaongaʻi ha ngaahi lea pe tūkuhua kapekape, fakalielia pe taʻefeʻungá.
Faikaumeʻá
ʻOua naʻá ke teiti pe faikaumeʻa [kae ʻoua kuo hoko] ho taʻu 16. Faikaumeʻa pē mo kinautolu ʻoku māʻolunga ʻenau ngaahi [tuʻunga moʻuí]. ʻI he kamata pē ke ke faikaumeʻá, ʻalu fakatokolahi pe kaungā ʻalu mo ha taha. Palani ʻa e ngaahi ʻekitivitī ʻe tokoni kiate koe ke ke vāofi mo e Laumālie ʻo e ʻEikí.
Haohaoa Fakasekisuale
Tauhi koe ke ke haohaoa fakasekisuale pe fakaeangamaʻa. ʻOua naʻá ke feohi fakasekisuale mo ha taha ki muʻa ʻi hoʻo malí. ʻOua naʻá ke kau ki ha faʻahinga talanoa pe ʻekitivitī te ne fakatupu ha ngaahi ongo fakasekisualé. ʻOua naʻá ke kau ʻi he ngaahi ʻekitivitī fekauʻaki mo e nonofo pē ʻa e tangata mo e tangatá pe fefine mo e fefiné. Feinga ke maʻu ha tokoni ʻo kapau naʻe fakamālohiʻi koe ʻi hano tohotohoʻi, hia fakamalaʻia pe ha ngaohikovia fakasekisuale kehe.
Fakatomalá
Tuʻunga ʻi he Fakalelei ʻa e Fakamoʻuí, te ke lava ʻo maʻu ʻa e fakamolemolé pea mo maʻa mei hoʻo ngaahi angahalá he taimi ʻokú ke fakatomala aí. Vete hoʻo ngaahi angahalá ki he ʻEikí pea mo kinautolu ne ke fai hala ki aí. Kapau ʻoku mamafa ʻa e ngaahi angahalá, ʻoku fie maʻu foki ke ke vete kinautolu ki hoʻo pīsopé.
Faitotonú
Faitotonu kiate koe, niʻihi kehé, pea mo e ʻEikí. ʻOua naʻá ke fakaʻuhingaʻi hala ʻo pehē ʻoku sai pē ʻa e taʻefaitotonú.
Tauhi ʻo e ʻAho Sāpaté
Fakaʻaongaʻi e ʻaho Sāpaté ke ke lotu mo hū ki he ʻEikí, ʻalu ki he lotú, toe vāofi ange ai mo ho fāmilí pea ke ke tokoniʻi foki ʻa e niʻihi kehé. ʻOua naʻá ke fekumi ki ha fakafiefia pe fai ha fakamole fakapaʻanga ʻi he ʻaho Sāpaté. Kapau ʻe lava, peá ke fakaʻehiʻehi mei he ngāue he ʻaho Sāpaté.
Vahehongofulú mo e Ngaahi Foakí
[Loto fiemālie] ke totongi vahehongofulu kakato. ʻAlu ki he fakamāʻopoʻopo vahehongofulú. Talangofua ki he fono ʻo e ʻaukaí.
Moʻui Lelei Fakaesinó
Tauhi ʻa e Lea e Potó. Kai e meʻakai fakatupu iví, fakamālohisino maʻu pē, pea mo maʻu ha mohe feʻunga. ʻOua ʻe fakaʻaongaʻi e faitoʻo kona-tapú, [kava mālohí], kofí, tií pe tapaká. ʻOua naʻá ke ngāue hala ʻaki e ngaahi faitoʻo ʻoku ʻoatu ʻe he toketaá pe faitoʻo ʻoku fakatau mei he falekoloá.
Tokoni ki he Niʻihi Kehé
Tokoni ki he niʻihi kehé ʻi ho ngaahi fatongia faka-Siasí pea ʻi homou ʻapí, ʻapiakó, mo e koló. Fekumi fakaʻaho ke maʻu ʻa e tataki ʻa e Laumālie Māʻoniʻoní ke ke ʻiloʻi ai ʻa e tokotaha ke ke [tokoniʻí mo e founga ke] feau ʻenau ngaahi fie maʻú.
Laka Atu ʻi he Tui
[Tauhi moʻoni] ki he ʻEikí mo Hono Siasí. [Lotu lilo maʻu pē] mo lau e folofolá. Tauhi ʻa hoʻo ngaahi fuakavá mo [fakaongoongo] ki he ngaahi fanafana ʻa e Laumālié. ʻE tokoniʻi koe ʻe he ʻEikí ke ke matuʻuaki ʻa e ngaahi ʻahiʻahí mo e ngaahi faingataʻá.