FAITOTONÚ

Faitotonu kiate koe, niʻihi kehé, pea mo e ʻEikí. ʻOua naʻá ke fakaʻuhingaʻi hala ʻo pehē ʻoku sai pē ʻa e taʻefaitotonú.

“ʻOku ʻikai ko e faitotonú [pē] ʻa e ʻikai ke te loí. Ko hono tala ia ʻo e moʻoní, leaʻaki ʻa e moʻoní, moʻuiʻaki ʻa e moʻoní, mo e ʻofa ʻi he moʻoní… .

“ʻOku hoko ʻa e kākā ʻi he akó ko ha founga ʻokú te toe kākaaʻi ai pē kita ʻa kita. ʻOku tau ō ki he [ʻapiakó] ke ako. Pea ʻoku tau kākaaʻi pē ʻe kitautolu ʻa kitautolu ʻi he taimi ʻoku tau kākā ai ʻo fakafalala ki he ngāue mo e poto ʻo e kakai kehé… .

“ʻOku hoko ʻa e kaihaʻá ko ha meʻa noa pē ʻi he māmaní kotoa… . ʻOku lahi ʻaupito ʻa e ngaahi founga ʻo e kaihaʻá, ʻoku kau ai ʻa e kaihaʻa mei falekoloá; kaihaʻasi ʻo ha ngaahi kā, letiō, [tepi], ngaahi [keimi] vitiō, mo ha ngaahi meʻa kehekehe ʻa e kakaí; kaeʻumaʻā ʻete kaihaʻa mei he taimi, paʻanga, mo e koloa ʻa kinautolu ʻoku tau ngāue ki aí; … pe ko haʻate nō kae fakakaukau ke ʻoua ʻe totongi fakafoki. Kuo teʻeki ai ha taha te ne maʻu ha meʻa mahuʻinga ʻi he kaihaʻá… .

“ʻOku taʻefeʻunga mo ha tokotaha maʻu lakanga fakataulaʻeiki ke ne kaihaʻa ʻi ha faʻahinga meʻa pē.”

Palesiteni James E. Faust (1920–2007), Tokoni Ua ʻi he Kau Palesitenisī ʻUluakí, “Ko e Faitotonú—Ko ha Kāpasa Totonu,” Tūhulu, Sānuali 1997, 49–51.