NGAAHI FAKAKAUKAU MAʻÁ E EFIAFI FAKAFĀMILI ʻI ʻAPÍ
ʻE lava ke fakaʻaongaʻi ʻa e ngaahi fokotuʻu fakafaiakó ni ʻi he loki akó pe ʻi ʻapi foki. Te ke lava pē ʻo liliu ke feʻunga ʻa e ngaahi fakakaukaú ni ki ho fāmilí pe kalasí.
“Ko Hono Maʻu ʻo ʻEku Tuí” p. 8: Aleaʻi hono ʻuhinga ʻo ha fakamoʻoni. Fai e talanoa kia Sosiuá. Lau ʻa e ʻEta 12:6, pea aleaʻi hono mahuʻinga ʻo e potu folofola ko ʻení kiate iá. ʻOku siviʻi fēfē ʻetau tuí kae lava ke tupulaki ʻetau fakamoʻoní? Naʻe fakatupulaki fēfē ʻe Sosiua ʻene tuí hili hono papitaisó? Fakaafeʻi e kau mēmipa ʻo e fāmilí ke vahevahe ʻenau fakamoʻoní.
“Founga ʻe 18 ke Tuʻu Mālohi Ai,” p. 25: ʻE lava ke fakaʻaongaʻi e fakamatala ko ʻení ki ha ngaahi efiafi fakafāmili lahi ʻi ʻapi. Hiki e ngaahi tuʻunga ʻulungāanga ʻe 18 ʻi ha fanga kiʻi laʻipepa. Tohoʻi ha laʻipepa ʻe taha pea lau e konga ko ia ʻo e fakamatalá. Mou aleaʻi pe ʻoku kaunga fēfē ʻa e tuʻunga moʻui ko iá ki homou fāmilí. Hili ko iá pea toe toho ha laʻipepa ʻe taha, pea hokohoko pehē atu ai pē ʻo fakatatau ki hoʻomou fie maʻú. Fakamamafaʻi hono mahuʻinga ʻo e ngaahi tuʻunga moʻui ko ʻení ki heʻetau moʻuí. Fokotuʻu ha taumuʻa ke mou muimui ʻi he faleʻi ʻoku ʻomi ki he tuʻunga ʻulungāanga takitaha. Fakaʻosiʻaki hano lau ʻo e konga ko ia ko e “Lakaatu Ki Muʻa ʻi he Tuí.”
“Tokanga Telia e Ngaahi Hoosi ʻAkaú,” p. 38: Kuo hanga ʻe Sētane ʻo ʻomi fakafufū ha ngaahi hoosi ʻakau lahi ʻaupito ʻi hotau kuongá ni. Lau mei he fakamatalá ʻa e talanoa ki he hoosi Tuloí, pea mou fakalau angé ʻa e ngaahi tohi, ngaahi fasi, mo e ʻū heleʻuhila ʻoku ʻi homou ʻapí. ʻAi ke hoko ia ko ha kiʻi vaʻinga pea ui ko e “ʻE Lava Nai ke Fakahaofi ʻEni?” Mou tauhi pē ʻa e ngaahi meʻa ko ia ʻoku māʻoniʻoni, fakaʻofoʻofa, pe ongoongolelei pe feʻunga mo hono vīkivikiʻí (vakai, Ngaahi Tefito ʻo e Tui 1:13). Fakaʻosiʻaki hano lau ʻo e Mōsaia 5:15 mo e Tokāteline mo e Ngaahi Fuakava 45:32.
“Tokoni pea Fiefia,” p. K10: Fakaʻaongaʻi e faingamālie ko ʻení ke kamata ai pe hokohoko atu ha saati ngāue maʻa homou fāmilí. Hiki fakaholoholo ha ngaahi ngāue lahi (ʻo fakafeʻunga pē ki he taʻu motuʻa ʻo e fānaú), pea kole ke nau takitaha fili ha ngāue te nau faí. Lau ʻa e talanoá pea mou aleaʻi hono ʻuhinga ʻoku mahuʻinga ai ke tokoni ʻa e tokotaha kotoa peé. Fokotuʻu haʻamou taumuʻa ke tokoniʻi ha niʻihi kehe lolotonga e uike hoko maí.
“Teuteu ki he Ngāue Fakafaifekau,”, p. K14: Kole ki homou fāmilí ke nau fakafanongo angé ki he ngaahi founga teuteu ʻa ʻEletā ʻŪlise Soalesi ke ʻalu ʻo ngāue fakafaifekaú. Lau ʻa e faleʻi naʻe ʻoange kiate ia ʻe heʻene pīsopé. Mou aleaʻi e founga ʻe lava ke teuteu ai e mēmipa takitaha ʻo e fāmilí ke nau hoko ko ha kau faifekaú.