Te Haamoriraa na roto i te mau Himene
E nehenehe ta tatou e haafatata’tu i to tatou Faaora na roto i te mau himene.
Ahiri e ua nehenehe ia‘u ia himene mai te Tuahine Schneider ra. Ahiri e ua nehenehe ia‘u ia faata‘i i te piana mai te Taeae Menendez ra. E hea rahiraa taime to tatou faarooraa aore râ mana‘oraa i taua mau mea ra ? I te tahi mau taime, te mana‘o nei tatou, e ua riro te taleni no te upaupa ei hoê taleni taa ê tei horo‘ahia i te tahi noa mau taata, te hoê taleni ta tatou e haafaufaa nei aita râ tatou e mana‘o nei e te vai ra te reira taleni ia tatou nei.
I roto i te Ekalesia a Iesu Mesia i te Feia Mo‘a i te mau Mahana Hopea nei, te vai nei te upaupa e te himene no te mau taata atoa. Na roto i te mau himene, e nehenehe ta tatou e faaite i te mauruuru e te arueraa, e haapii mai i te evanelia a te Faaora tei faaho‘i- faahou-hia mai, e haamana‘oi Ta’na ra Taraehara, e e fafau i te pee atu Ia’na.
A Faaite i te Mauruuru e te Arueraa
I te taime a faaorahia mai ai o Iseraela tahito mai Aiphiti, « ua himene ihora Mose e te tamarii a Iseraela i teie nei himene ia Iehova » (Exodo 15:1). A tere ai te Ati Iareda na ni‘a i te moana, « ua himene noa ratou i te mau himene arue i te Fatu » (Etera 6:9). E i te taime a haamo‘a ai te Feia Mo‘a matamua i te mau Mahana Hopea nei i te Hiero no Ketelani, ua himene ratou i te himene apî a William W. Phelps « Auê Te Varua o te Atua ».1 I te mau tau tuuraa evanelia atoa, ua faateitei te mau tamarii a te Atua i to ratou mau reo no te arue Ia’na ma te himene.
Tei roto i ta tatou mau himene e rave rahi teie varua no te oaoa e no te arue. Ei hi‘oraa, te parau nei te tahi himene herehia e tei papa‘ihia e William W. Phelps:
E te Faaora o Iseraela,
A haamaitai mai ia matou,
To matou nei ata,
To matou nei pou,
To matou Arii maitai na !2
E nehenehe atoa ta te mau himene e faaite i to tatou mauruuru no te mau haamaitairaa taaê, mai tei faahitihia i roto i teie nei irava matauhia:
Mauruuru matou e te Atua,
No ta Oe na peropheta,
Ia arata‘i noa mai ia matou
I teie nei tau hopea.
Mauruuru no te evanelia
E te mau haamaitairaa
E te hinaaro noa nei matou
Ia haapa‘o i to faaueraa.3
A himene ai tatou i teie nei mau himene, te pee ra ïa tatou i te faaueraa « E mai te mea te oaoa nei oe » – oia hoi mai te mea e mea oaoa oe aore râ e mea poupou oe – « a arue atu i te Fatu ma te himeneraa… e i te pure arue e te haamaitai hoi » (PH&PF 136:28).
A haapii mai i Ta’na Evanelia
Taa ê noa’tu i te faaiteraa i te mauruuru e te arueraa, te horo‘a atoa mai nei te mau himene ia tatou te mau taime maitai no te haapii mai i te evanelia a Iesu Mesia. Ei hi‘oraa, te haamaramarama ohie nei e ma te nehenehe teie himene matauhia e te mau tamarii i to tatou aura e to tatou Metua i te Ao ra:
Te faaite mai nei te tahi atu mau himene ia tatou e nahea ia ora i te mau parau tumu a te evanelia, mai teie nei himene au-roa-hia, tei papa‘ihia i te tau o te feia mo‘a matamua:
A haere a, te Feia Mo‘a e, ma te oaoa
E au anei, e ati to outou.
Haere â i mua
Ia tamata tatou atoa
Ia haere puai e maitai ai.
E na reira noa tatou,
A rohi, a rohi.5
Te haapii mai nei te tahi o ta tatou mau himene herehia ia tatou ia pee atu i te mau tavini a te Mesia, Ta’na mau peropheta tei ma‘itihia i to tatou nei anotau. Te tauturu nei « Auê te Taata i Parau ia Iehova » ia tatou ia haamana‘o i te ohipa faufaa rahi a te Peropheta Iosepha Semita i roto i te Faaho‘iraahia mai te evanelia:
Auê te taata i parau ia Iehova !
Parauhia oia ei hi‘o e Iesu.
Ma‘itihia oia no te ohipa.
Faaho‘i mai i te evanelia.6
E nehenehe te feruri-hohonu-raa i ni‘a i teie nei mau himene e te tahi atu mau himene e te tai‘oraa i te mau papa‘iraa mo‘a tei tabulahia i roto i te buka himene, e tauturu ia tatou ia haapii mai i te evanelia e ia haamana‘o i te Faaora i roto i to tatou mau oraraa i te mau mahana atoa.
A Haamana‘o i Ta’na Taraehara
Te hoê o te mau ravea hau atu i te faufaa rahi e haamana‘o ai tatou i te Faaora o te raveraa ïa i te oro‘a i te mau hebedoma atoa. Ei faaineineraa no teie oro‘a mo‘a, e himene tatou i te hoê himene. Te faahaamana‘o mai nei te mau himene oro‘a ia tatou i te tusia a te Mesia e te auraa no te reira no tatou:
Pohe atu te Faaora,
Ei haapa‘o i te ture ra.
Ei tusia no te hara,
Ei tusia no te hara
Ia ora te mau taata.7
E feruri au i to’na ra mamae rahi
A pohe ai oia i ni‘a i te aivi.
E feruri au i te tusia mo‘a ra.
E arue au ia’na no to’na aroha.9
Mai te mea e himenehia ma te feruri e ma te pure, e tauturu ïa te mau parau no te mau himene oro‘a ia tatou ia faatumu i ni‘a i te Faaora. E faaineine te reira ia tatou ia rave i te oro‘a ma te auraa mau e ia haafafau faahou ia tatou ia rave i te i‘oa o te Mesia i ni‘a iho ia tatou, ia haamana‘o noa â Ia’na, e ia haapa‘o i Ta’na ra mau faaueraa.
A fafau i te Pee atu ia Iesu Mesia
E faaitehia te fafauraa ia pee atu i te Faaora i roto i ta tatou mau himene e rave rahi. A himene ai tatou i teie nei mau himene, te faaite ra ïa tatou i to tatou Metua i te Ao ra e te hinaaro nei tatou ia pee atu i Ta’na ra Tamaiti. Ei hi‘oraa, a feruri na i teie nei mau irava:
To matou Metua i te Ao ra,
Mauruuru roa matou ia oe.
No te faaiteraa mai te e‘a.
E arue matou ia oe !10
Te faahiti nei te himene « E pee au ia oe » i te hoê â parau:
E mea au roa na te Fatu ta tatou nei mau himene – no te arue anei, no te mauruuru, no te ite, no te haamana‘o, aore râ no te fafauraa. Ua parau Oia, « No te mea e e oaoa to to‘u nei varua i te himene o te aau; oia ïa, ua riro te himene a te feia parau tia ra ei pure ia‘u nei, e e pahonohia te reira na roto i te haamaitairaa i ni‘a iho i to ratou ra mau upoo » (PH&PF 25:12).
Aua‘e, aita te Fatu i parau, « Te mau himene nehenehe ana‘e o te riro ei pure ia‘u nei », aore râ, « E faaroo ïa vau i te feia ana‘e e taleni himene ta ratou ». I roto i ta tatou mau himene e i roto i to tatou iho mau oraraa, e mea haape‘ape‘a a‘e Oia i te huru o to tatou aau eiaha râ i to tatou aravihi.
Noa’tu eaha te faito o to tatou aravihi, e nehenehe ta tatou paatoa ia haa i roto i te upaupa na roto i te himeneraa i te mau himene. E a himene ai tatou ma to tatou aau atoa, te haere nei ïa tatou i te Mesia ra na roto i te mau himene.