UA ITE AU E UA ARATA‘IHIA VAU
I te taime a rave ai au i te ohipa ei misionare apî i te fenua Norevetia, ua haaputuputu mai to‘u nei peresideni misioni i te mau misionare atoa no te parau mai ia matou e ua anihia matou ia himene i roto i na oro‘a e piti i te oro‘a haamo‘araa o te Hiero no Ronedona Peretane i te matahiti 1958. Ua anihia ia‘u ia faata‘i i te piana.
I to matou taeraa’tu i te hiero, ua ite au i to‘u maere rahi e e faata‘i ïa vau i te hoê hamonia eiaha râ te piana. Aita vau i matau i te hauti i te hamonia, no reira ua ani au mai te mea e nehenehe ta te hoê taata e tauturu ia‘u ia faatanotano i te mau nota. Ua faaroo te Metua i te Ao ra i ta‘u mau tiaororaa, e ua haere mai te hoê tuahine e tauturu ia‘u, ma te faatano i te hamonia no te pehe omuaraa e no te apeeraa atoa i te pŭpŭ himene.
I ropu i to‘u nei hepohepo, ua tae mai te hoê mana‘o hau i ni‘a ia‘u. E a hauti ai au i te hamonia matau-ore-hia e au e o ta‘u i ore i tamatamata, ua ite au i te here o te Faaora o tei arata‘i ia‘u. I muri a‘e i te hoê himene a te pŭpŭ himene, ua hi‘o atu te Peresideni David O. McKay i ni‘a i to matou peresideni misioni e na ô atura. « E mea maitai roa ». Ua î roa vau i te oaoa no te huru i haamaitaihia’i matou i roto i ta matou himeneraa. Ua tupu maite te reira ma te hape ore.
O Iesu Mesia te Tamaiti a te Atua, te Tamaiti Fanau Tahi a te Metua. O Oia te Mesia mo‘a, te Arii no te Hau. Te ora nei Oia e e haere faahou mai Oia.