Te Taraehara i te Ohiparaa
Ua ite au e e opuaraa ta te Fatu no ta‘u nei tamaiti, i te taime râ a ma‘iti ai oia i te hoê e‘a aita vau i hinaaro ia rave oia, aita vau i papû nahea ra oia i te ho‘i mai.
Ua riro mai au e melo no Te Ekalesia a Iesu Mesia i te Feia Mo‘a i te mau Mahana Hopea nei i te matahiti 1992 i te fenua Holane. Aita râ ta‘u tane faaipoipo i amui mai e aita oia i faatia i ta maua nei mau tamarii, o Alex e Petra, ia bapetizohia (ua tauihia te mau i‘oa). Tera râ, ua haere noa matou e toru i te pureraa e ua tamau i te faatere i te mau pureraa pô utuafare.
E mea maitai te mau mea atoa e rave rahi mau matahiti e tae noa’tu i te taime, ua faaite mai o Alex, 13 matahiti i taua taime ra, e aita oia i hinaaro faahou i te haere i te fare pureraa aore râ i te pureraa pô utuafare. A paari ai oia, ua tamau noa te mau mea i te inoraa. E mea fifi roa no‘u ia vai fatata ia Alex no te mea aita oia i haamata noa i te inu e i te puhipuhi i te avaava, ua haavare atoa râ oia no ni‘a i to’na huru. Ua oto roa vau, e ua haamanii au e rave rahi mau roimata e ua pûpû vau e rave rahi mau pure a taparu ai au i te Metua i te Ao ra ia tauturu i ta‘u nei tamaiti.
E i te hoê pô a parahi hau noa’i au i roto i te hiero, ua ite au i te hoê hoho‘a i roto i to‘u nei feruriraa. E hoho‘a no te hoê tamaiti apî e opere ra i te oro‘a. E au ra e te faahaamana‘o mai nei te Fatu ia‘u te tupuraa mau e te mana no Ta’na Taraehara, ma te faaitoito ia‘u ia here i ta‘u nei tamaiti e ia parahi i pihai iho ia’na.
Area râ, a tere noa’i te taime, ua hau noa’tu â te oraraa i te fifi. I muri i to‘u faataa-ê-raa i te metua tane o Alex, ua haaparuparu roa o Alex. Ua ite au e ua hinaaro oia i te tauturu, aita râ oia i hinaaro i ta‘u tauturu e ore oia e faaroo mai ia tamata ana‘e vau i te paraparau atu ia’na.
I te hoê pô ua ani mai to matou peresideni amaa mai te mea e nehenehe ta’na e paraparau ia Alex. Ua riri o Alex, ua farii râ oia i te paraparau. I muri a‘e i te farereiraa ua riri o Alex i te peresideni amaa no to’na faaitoitoraa ia’na ia tavini i te hoê misioni, i te na ô raa mai, « Ahiri te peresideni amaa e taata no te Atua, e mea iti a‘e ïa oia. E ite ïa oia e e ere vau i te mea parau-tia no te haere – no te aha oia e haapeapea ai ia‘u ? » I taua pô ra ua ite au e e opuaraa ta te Fatu.
Ua haamata te opuaraa i te tupu na roto i te hoê ravea tia‘i-ore-hia a farii ai au i te hoê niuniu na te fare mutoi. Ua tapeahia o Alex. Ua oomo maua e ta‘u tane faaipoipo apî i to maua pereue e i te maororaa pô ua tii atu maua ia Alex i te fare mutoi. Aita maua i riri ia’na, e aita te metia hoovai tane o Alex e o vau nei i paraparau rahi.
I to matou taeraa i te fare, ua parau mai o Alex ia maua eaha tei tupu a eiâ ai oia e to’na hoa i te hoê pereoo tataahi uira. Ua tatarahapa roa oia no te mea ta’na i rave. Ua ite au no te taime matamua i te hoê taurearea tei oto.
Ua riro te tapearaa e hoê taime tauiraa no Alex a haamata ai oia i te ite i te mau hopea no ta’na mau ohipa e te vahi o ta’na e haere tia’tu. Mai taua mahana ra, ua rahi te mau haamaitairaa tei tae mai i ni‘a ia matou.
I te po‘ipo‘i a‘e, ua parau mai o Alex ia maua e ua ani oia i te mutoi ia niuniu mai ia maua no te mea ua ite oia e ua here maua ia’na. Ua ite atoa oia e ua haamauiui rahi oia ia maua, e ua mauruuru oia i to maua faaea-hau-noa-raa.
E rave rahi mau hoa to Alex tei toro mai i te rima no te tauturu ia’na. Ua ani te hoê ia’na ia haere i te mau faaoaoaraa a te Ekalesia. Ua horo‘a te tahi hoa ia’na i te hoê Buka a Moromona e ua ani ia’na ia tai‘o. E noa’tu to’na fifi i te tai‘oraa i te mau reta, ua ite ra vau ia Alex ia tai‘o i te reira i tera e tera taime.
Te haamaitairaa i muri mai – mai te mea e nehenehe ta‘u ia tai‘o ia ratou – o te taime ïa a ani mai ai o Alex mai te mea e hoo maua i te hoê pereue no te mea ua faaoti oia i te hinaaro i te haere i te fare pureraa. Ua mana‘o vau e ua hinaaro oia no te Noela noa. I to‘u râ maere rahi, ua tamau noa oia i te haere i te pureraa e tae noa’tu i muri mai i te mau oro‘a Noela.
E au ra ua riro te haamaitairaa i muri iho ei haamaitairaa rahi roa no‘u ia maramarama. Ua faaite o Alex e bapetizohia oia. Aita oia i hinaaro i ta‘u nei tauturu e ua faanaho oia iho i te mau mea atoa ma te tautururaa a to’na mau hoa e te mau misionare tei haapii ia’na. Ua maere roa vau a tae mai ai te mahana, e ua nehenehe ia‘u ia ite i ta‘u tamaiti i roto i te ahu uouo, e rave ra i te mau fafauraa mo‘a.
I muri mai a faaite mai ai oia i te aamu no to’na faafariuraahia, ua ite ihora vau e mea fifi mau te mauiui e te oto o Alex, ua tauturu râ te reira ia’na ia haehaa no te tuu i to’na turi avae i raro e no te ani i te tautururaa. Ua haamaramarama mai o Alex : « I te hoê pô a teiaha roa’i ta‘u mau hopoia i te amo, ua haamana‘o vau i te mau parau a te hoê hoa maitai tei faahaamana‘o mai ia‘u e e nehenehe ta‘u e pure i te mau taime atoa no te tautururaa. Taua pô ra ua faaoti au ia tamata. Aita e uputa ê atu tei matara no‘u, e no te mea hoi e ua haapii to‘u metua vahine ia‘u nahea ia pure, ua tuturi au i raro e ua tapiri i to‘u na mata. A haamata ai au i te ani i te tautururaa, ua tae mai i ni‘a iho ia‘u te mana‘o hau atu i te faahiahia. Eita roa vau e haamo‘e i taua mana‘o ra; ua ite au i te here mau o te Mesia. Ua ite au e ua rave-ê-hia’tu to‘u mau fifi. Aita to‘u mau mana‘o hepohepo i ho‘i faahou mai mai taua taime ra, e ua haamaitaihia vau e te hoê iteraa papû no Iesu Mesia. Ua tauihia to‘u nei aau e ua hinaaro vau i te pee atu ia Iesu Mesia ».
I muri a‘e i to’na bapetizoraa, haamauraa e faatoro‘araa i te autahu‘araa, ua anihia o Alex ia opere i te oro‘a – te mau tapa‘o mo‘a no te tusia a te Faaora. I reira te mea ta‘u i ite i roto i te hiero e rave rahi mau matahiti i ma‘iri a‘e nei i riro mai ai ei ohipa mau i mua noa iho ia‘u. Ua haamauruuru mamû noa vau i te Metua i te Ao ra no te mea ta‘u e ite ra. Ua riro te reira ei taime mo‘a no‘u.
E nehenehe te aamu i te faaea i reira, aita râ i faaea. Ua hi‘o vau mai taua taime ra i te Taraehara i te tamau-noa-raa i te ohipa i roto i te oraraa o ta‘u tamaiti. Te haamana‘o ra outou i to matou peresideni amaa faauruhia ? Ua tamau noa te iteraa papû o ta‘u tamaiti i te tupu i te rahi, e ua riro mai te aniraa a to matou peresideni misioni ei ohipa tei tupu mau. No faaoti noa iho nei o Alex i te taviniraa ei misionare rave tamau. Ua rave oia e piti matahiti no te farereiraa e no te tautururaa ia vetahi ê – mai ta te Fatu i toro i To’na rima ia’na.
Ua mauruuru vau i to‘u riroraa ei metua vahine no Alex, ua hau atu râ to‘u mauruuru no te Taraehara o Iesu Mesia tei ohipa i roto i to tatou oraraa paatoa.