TE HOÊ ITERAA TATA‘ITAHI NO TE FAAORA
Te mana‘o nei au e ua riro to‘u nei bapetizoraa i te 11raa o to‘u nei matahiti te haamataraa no to‘u iteraa papû no ni‘a Ia’na e Ta’na hoi Ekalesia ta‘u e tomo atu ra. Mai taua taime mai â to‘u hinaaro-noa-raa i te pee i te mau haapiiraa a Iesu Mesia e ia ora i te mau parau tumu no te evanelia.
Ua riro te noaaraa i to‘u iteraa papû no Iesu Mesia e hoê raveraa tei tupu noa i te rahi e tei faarahihia na roto i te rave-itoito-raa i te ohipa i roto i te Ekalesia. Ua ite pinepine au i To’na here rahi no tatou na roto i te mau mea nehenehe o te natura, e ua faatupu mai te reira ia‘u i te hoê mauruuru rahi atu â Ia’na. Ua ite au i te Varua i te faaiteraa mai ia‘u a haapae ai au i te maa e a pure ai au e a farii ai au i te mau pahonoraa i taua mau pure ra, ma te iteraa e ua riro Iesu Mesia te arai i rotopu i te Metua i te Ao ra e o tatou nei. Ua oaoa vau i to‘u vai piriraa Ia’na i roto i ta‘u haamori-pinepine-raa i roto i te hiero.
Ua tupu e ua haapuaihia to‘u iteraa papû i roto i te roaraa o to‘u nei oraraa e tae noa mai i teie nei mahana, aita e feaaraa i roto i to‘u nei feruriraa e o Iesu Mesia te Tamaiti a te Atua – to‘u nei Faaora e Taraehara. Na teie nei iteraa e afa‘i mai nei ia‘u te hoê haapapuraa mărû e te hau.