TE TIA‘IRAA I TE TI‘A-FAAHOU-RAA
I te taime i ho‘i ai ta‘u vahine faaipoipo here i to tatou Metua i te Ao ra, ua titauhia i to matou utuafare ia imi i te hoê menema huru tano rii. No to matou na reira raa, ua faaruru vau i te pato‘iraa a hinaaro ai au ia papa‘ihia te parau vahi faaearaa i ni‘a i te ofa‘i menema. Aita te parau i tu‘ati i te mau ture a te faatereraa o te vahi hunaraa ma‘i.
Ua tupu mai i muri iho te hoê aroraa fifi roa. I te pae hopea ua ani te orometua o te ekalesia o tei fatu i te vahi hunaraa ma‘i no ni‘a i te parau. Ua nehenehe ia‘u ia faaite i to‘u iteraa papû e te ti‘aturi nei au i te ti‘a-faahou-raa mau o te tino, ma te faahiti i te parau a te Faaora « E faaroo ai te feia atoa i roto i te apoo ra i tana reo, e e haere mai i rapae; e te feia i mau na i te parau maitai ra, e tia mai ïa e rave i te ora » (Ioane 5:28-29). Ua faaite au e vahi faaearaa mo‘a teie menema no tatou e tae noa’tu i te Ti‘a-faahou-raa.
I muri iho ua horo‘a mai te orometua i te hoê mana‘o faauruhia : « Ia papa‘ihia teie nei mau parau i ni‘a i te ofa‘i menema : ‘Te taoto nei te mau utuafare Bohne e Lehmann i ô nei a tia’i noa’tu ai i te Ti‘a-faahou-raa’ ». Ua na reirahia. E na roto i te reira, ua taraihia to‘u nei iteraa papû i roto i te ofa‘i.